Read Jamaican Patois Aks 8 Bible Online

Aks 8 - Jamaican Patois bible

Aks 8

¹ An Saal did de de an im did biliiv se dem did rait fi kil Stiivn. Da die de wan torbl sofarieshan tek di choch iina Jeruusilem. An aal a di biliiva dem did get skyata skyata aal uova Judiya an Samieriya. Onggl di apasl dem neva get skyata skyata.

² Som man we worship Gad beri Stiivn an dem ala an baal fi im.

³ Bot Saal staat wok aad aad fi mash op di choch. Im did a go fram ous tu ous an a jrag out man an uman an fling dem iina prizn.

⁴ Di biliiva dem we did get skyata skyata priich di Gud Nyuuz bout Jiizas evriwe dem go.

⁵ Filip go dong a wan siti iina Samieriya an priich tu dem bout Krais Jiizas.

⁶ Wen di kroud a piipl ier Filip an si di mirikl dem wa im did a du, aal a dem lisn gud tu wa im did a se.

⁷ Wikid spirit baal out an kom outa nof piipl an nof kripl piipl an piipl we kudn muuv at aal get beta.

⁸ So di uol a di piipl dem iina di siti did wel api.

⁹ Nou yu did av wan man iina di toun niem Saiman. Fi wan lang taim im did a wok uobiya an di piipl dem kudn biliiv som a di powaful sitn dem we im wuda du. An im yuus tu kliem se im a wan big impuotant sumadi.

¹⁰ Evri jak man iina Samieriya, fram di likl man tu di big impuotant wan dem lisn tu im. Dem se “Da man ya a di gad we niem di Griet Powa. A im kom dong kom ton Saiman.”

¹¹ Dem did lisn tu im aad aad kaaz fi wan lang lang taim dem kudn biliiv di sitn dem we dem si im du.

¹² Bot wen dem biliiv di gud nyuuz we Filip did a priich bout Gad kindom an Jiizas Krais, evribadi, man an uman go get baptaiz.

¹³ Aal Saiman biliiv an get baptaiz tu. Im fala Filip evriwe im go an im kudn biliiv di mirikl dem we Filip did a du.

¹⁴ Wen di apasl dem iina Jeruusilem ier se di piipl iina Samieriya biliiv an staat fala Gad wod, dem sen Piita an Jan tu dem.

¹⁵ Wen dem riich dem prie fi dem dat di Uoli Spirit wuda kom tek kanchuol a dem.

¹⁶ (Kaaz di Uoli Spirit neva tek kanchuol a non a dem yet. Filip did onggl baptaiz dem kaaz dem did biliiv di Gud Nyuuz bout Jiizas.)

¹⁷ So Piita an Jan put dem an pan dem an di Uoli Spirit kom liv iina dem.

¹⁸ Wen Saiman si se piipl get di Uoli Spirit wen di apasl dem put dem an pan dem, im chrai fi bai powa fram dem.

¹⁹ Im se, “Gi mi da powa ya tu mek mi kyan put mi an pan piipl an mek dem get di Uoli Spirit.”

²⁰ Piita se, “Mi uop se yu an yu moni go a el kaaz yu tingk se yu kuda bai di Uoli Spirit wa Gad gi piipl!

²¹ Yu no av no paat iina da wok ya, kaaz yu aat no rait iina Gad yai.

²² Ton we fram di wikid sitn dem we yu a tingk bout an prie an beg Gad fi paadn yu. Da wie de im mait-a paadn yu fi di wikid sitn dem we yu av iina yu aat,

²³ kaaz mi si se yu grojful an bad main an sin av yu laik wan prizna.”

²⁴ Den Saiman se tu dem, “Unu prie tu di Laad fi mi so dat non a di sitn dem we unu taak bout wi no apm tu mi.”

²⁵ Afta Piita an Jan don tel di piipl wa dem nuo bout di Laad, an priich di Gud Nyuuz, dem go baka Jeruusilem. Pan di wie dem priich di Gud Nyuuz iina nof Samaritan dischrik.

²⁶ Nou wan a di Laad ienjel go tu Filip an se tu im, “Git op an go tek di sout ruod, di ruod we go fram Jeruusilem tu Gaaza.” (Piipl no riili yuuz da ruod de agen).

²⁷ So Filip get op an lef. Wen im did a chravl pan di ruod, im bok op wan man we kom fram Iitiyuopiya. Im a did wan impuotant man. A im did inchaaj a aal a di moni fi Kyandiis, kwiin fi Iitiyuopiya. Im did go a Jeruusilem fi go worship Gad an wen im a go baka im yaad

²⁸ im did sidong iina im aas an bogi kyaat a riid di buk we di prafit Aizaiya rait.

²⁹ Di Spirit tel Filip se, “Gwaan go jain da bogi de an stie kluos tu it.”

³⁰ Den Filip ron op tu di bogi an ier di man a riid sitn we di prafit Aizaiya rait. Filip aks im se, “Yu andastan wa yu a riid?”

³¹ Di man se, “Ou mi fi andastan ef nobadi no elp mi an tel mi we it miin?” So im aks Filip fi kom op kom sidong wid im.

³² Di paat a Gad wod we di man did a riid, dis a wa it se: “Dem tek im an liid im we laik ou dem wuda liid wan shiip go a di plies fi kil im, an siem laik ou wan Biebi Shiip tan op an no mek wan soun wen dem a kot aaf im wul, a siem so im neva se a wod.

³³ Dem shiem im an tek im mek preke an im neva get no jostis. Nobadi kyan taak bout fi’im pikni pikni dem? Kaaz dem kil im.”

³⁴ Di man aks Filip se, “Tel mi sopm, a uu di prafit did a taak bout, imself ar sumadi els?”

³⁵ So Filip staat a di siem paat we im did a riid an priich tu im di Gud Nyuuz bout Jiizas.

³⁶ Dem did stil a gwaan pan di ruod wen dem kech a wan plies we waata de. Di man we inchaaj a di moni se tu Filip, “Luk! Si waata de! Wa fi tap mi fram get baptaiz rait nou?”

³⁸ So di man aada im jraiva fi tap di bogi. Den im an Filip go dong iina di puul a waata an Filip baptaiz im.

³⁹ Afta dem kom op outa di waata, aal av a sodn Gad Spirit jos tek we Filip an di man we inchaaj a di moni neva si im agen. So im ed fi im yaad a gi Gad priez.

⁴⁰ Den Filip si se Gad Spirit tek im go a Azuotos. Fram de-so im gwaan priich Gad wod tu aal di toun dem til im riich a Sesuriiya.