Read Jamaican Patois Aks 9 Bible Online

Aks 9 - Jamaican Patois bible

Aks 9

¹ Roun dem siem taim de, Saal stil did a chretn fi kil aaf di biliiva dem. Im go tu di liida fi di priis dem

² an aks im fi gi im leta fi kyari go gi di liida fi di Juu dem choch a Damaskos. So dat ef im fain nobadi we a fala wa Jiizas tiich, weda man ar uman, im wuda ares dem an kyari dem bak go a Jeruusilem.

³ Wen dem did de pan dem wie an did nier Damaskos, aal av a sodn wan brait brait lait fram evn shain roun Saal.

⁴ Im jrap a grong an ier sumadi se tu im se, “Saal, Saal, wa mek yu a mek mi sofa?

⁵ Saal aks, “A uu yu, Sa?” Jiizas ansa, “Mi a Jiizas, di wan we yu a mek sofa.

⁶ Git op an go iina di toun. Sumadi iin de wi tel yu wa yu mos du.”

⁷ Di man dem we did a chravl wid Saal tan op de bot dem did so shak, dem kudn se a wod. Dem ier di sumadi we did a taak tu Saal, bot dem neva si nobadi.

⁸ Saal get op, bot wen im uopm im yai dem im kudn si a ting. So dem uol im an an liid im go a Damaskos.

⁹ Fi chrii die Saal kudn si notn an im neehn nyam ar jringk notn niida.

¹⁰ Nou yu did av wan man iina Damaskos niem Ananaiyas we did biliiv iina Jiizas. Iina wan vijan di Laad se tu im se, “Ananaiyas!” Im ansa, “Yes, Laad.”

¹¹ Di Laad se tu im se, “Go uova Juudas ous pan chriet chriit an aks fi wan man fram Taasos niem Saal. Im de de a prie

¹² an get wan vijan a wan man niem Ananaiyas we kom kom put im an pan im fi mek im kyan si agen.”

¹³ Ananaiyas se, “Bot Laad, nof piipl tel mi bout da man de an di uol iip a wikid sitn dem we im du tu yu piipl dem iina Jeruusilem.

¹⁴ An im get di powa an di rait fram di ed priis fi kom dong ya kom ares enibadi we kaal pan yu niem.”

¹⁵ Bot di Laad se tu Ananaiyas se, “Gwaan! Kaaz mi pik da man ya fi sorv mi. Mi pik im fi go tel piipl bout mi, piipl we a no Juu, di king dem an di Izrel piipl dem tu.

¹⁶ Mi a-go shuo im umoch im afi go sofa fi fi mi siek.”

¹⁷ So Ananaiyas go a di ous we Saal did de. Im go iina di ous, put im an pan Saal an se, “Breda Saal, di Laad Jiizas, di wan we yu did si wen yu did de pan yu wie a kom ya, im sen mi tu yu. Im sen mi so yu wi kyan si agen an fi mek di Uoli Spirit kom liv iina yu.”

¹⁸ Siem taim im a taak, som sitn we komiin laik fish skiel jrap aafa Saal yai an im kuda si agen. Den im get op an get baptaiz.

¹⁹ An afta Saal get sopm fi iit, im get bak chrang agen. Saal tan a Damaskos fi kopl die wid di piipl dem we biliiv iina Jiizas.

²⁰ Saal neva wies no taim. Im staat priich siem taim iina di Juu dem choch se Jiizas a Gad Bwai Pikni.

²¹ An aal a di piipl we ier im shak. So dem staat fi aks dem wan aneda se, “A no da siem man ya did a chrai fi kil aaf di piipl dem iina Jeruusilem we worship Jiizas? A no im kom dong ya fi ares piipl an kyari dem go baka di ed priis?”

²² Bot Gad gi Saal muor an muor powa fi priich. Im did a pruuv fram Gad wod se Jiizas a di wan we Gad sen fi siev piipl. An di Juu dem we liv iina Damaskos did kanfyuuz kaaz dem kudn fain notn rang wid wa im did a tiich.

²³ Afta wan lang taim paas dem siem Juu de gyada op an plan fi kil Saal.

²⁴ Bot Saal did fain out bout it. Die an nait dem wach di siti giet fi si ef dem kuda kech im fi kil im.

²⁵ So wan nait som a Saal falara dem tek im an let im dong iina wan baaskit chuu wan uol iina di siti waal.

²⁶ Wen Saal kech a Jeruusilem, im chrai fi jain op wid di piipl dem we biliiv iina Jiizas, bot aal a dem did fried a im kaaz dem neva biliiv se im did riili get siev.

²⁷ Bot Baanabas elp im. Im tek im tu di apasl dem. Im tel dem ou Saal si di Laad Jiizas wen im did a go a Damaskos, ou di Laad taak tu im, an ou im neva fried fi priich tu di piipl iina Damaskos bout Jiizas.

²⁸ So Saal tan wid di apasl dem an muuv roun wid dem iina Jeruusilem. An im neva fried fi priich tu di piipl bout Jiizas.

²⁹ Im taak bout Jiizas an riizn wid di Juu dem we taak Griik. Bot dem chrai fi kil im.

³⁰ Wen di piipl we biliiv iina Jiizas fain out se di Juu dem did a chrai fi kil Saal, dem tek im dong a Sesuriiya an sen im we go a Taasos.

³¹ Den di choch dem we did iina Judiya, Gyalalii, an Samieriya get a briek fram di sofarieshan we dem did a go chuu fi a wail. Di choch gruo muor an muor kaaz dem di a du we de Laad waahn dem fi du an di Uoli Spirit did a wok wid dem.

³² Wail Piita did a go fram plies tu plies im go a Lida go luk fi Gad piipl.

³³ Im fain wan man dong de niem Ieniyas we did kripl fi iet ier an kudn get op outa im bed.

³⁴ Piita se tu im se, “Ieniyas, Jiizas Krais mek yu beta! Git op an ruol op yu bed!” Siem taim Ieniyas get op.

³⁵ Evribadi we liv iina Lida an Sheran ton tu di Laad wen dem si wa apm tu im.

³⁶ Nou yu did av wan uman we biliiv iina Jiizas we liv a Japa. Shi did niem Tabita, bot iina Griik shi niem Daakas. Shi did eva a du gud an a elp puo piipl.

³⁷ Wail Piita did de a Lida, shi tek sik an ded. Dem wash ar badi an put it iina wan opstiez ruum.

³⁸ Lida neva faar fram Japa. So wen di piipl we biliiv iina Jiizas ier se Piita did de a Lida, dem sen tuu man tu im wid wan mesij se “Ori op kum ya kwik kwik!”

³⁹ So Piita get op siem taim an go wid dem. Wen im kech de, dem kyari im opstiez tu di ruum. Aal a di uman dem uufa ozban did ded tan op saida im a baal an a shuo im aal a di kluoz dem we Daakas yuus tu mek wen shi did alaiv.

⁴⁰ Piita sen aal a dem outa di ruum. Den im go dong pan im nii an prie tu Gad. Den im ton tu di ded uman an se, “Tabita, git op!” Shi uopm op ar yai dem, an wen shi si Piita, shi sidong op.

⁴¹ Im uol ar an an elp ar tan op. Den im kaal aal a Gad piipl, an di uman dem uufa ozban dem did ded tu an shuo dem se Daakas kom bak alaiv.

⁴² Piipl aal uova Japa ier bout wa apm an ton tu di Laad.

⁴³ Piita tan a Japa fi wan gud likl wail wid Saiman, wan man we mek leda.