Read Jamaican Patois Jiemz 10 Bible Online

Jiemz 10 - Jamaican Patois bible

Jiemz 10

¹ Breda an sista, wid aal a mi aat mi a uop an a prie tu Gad se fi mi piipl, di piipl a Izrel, wi get siev.

² Kaaz mi kyan tel unu fi shuor se dem wel waahn fi sorv Gad. Bot dem no andastan se wa dem a du no lain op wid di chuut.

³ Dem neva waahn fi andastan di wie Gad mek tingz rait bitwiin im an piipl, so dem go chrai fain dem uona wie fi mek tingz rait wid Gad; dem neva tek Gad wie fi mek tingz rait bitwiin im an dem.

⁴ Bot Krais Jiizas mek it so dat wi no afi fala di Laa no muor; Gad wi mek tingz rait bitwiin im an enibadi we biliiv iina Krais Jiizas.

⁵ Di piipl dem we fala di Laa so dat Gad wuda put tingz rait bitwiin im an dem, dis a wa Muoziz did rait bout dem: “Ef sumadi du evriting we di Laa se, di Laa wi mek dem liv.”

⁶ Bot dis a wa Gad wod se bout di piipl we get put rait wid Gad kaaz dem biliiv, it se: “No bada tingk tu unuself, ‘A uu a-go go op iina evn?’” (an wen unu a tingk dat, wa unu miin se, a uu a-go go op iina evn an aks Krais Jiizas fi kom dong kom siev wi.)

⁷ “No aks niida, ‘A uu a-go go dong wich paat di ded piipl dem spirit de?’” (An wen unu a aks dat, wa unu riili a aks a uu a-go go dong de go tek Krais Jiizas fram mongks di ded piipl an bring im bak op ya.)

⁸ Wa els Gad wod se? It se: “Gad mesij de kluos tu unu, it de iina unu mout an iina unu aat.” A da siem mesij de wi a priich; di mesij we se yu afi chos Gad.

⁹ Kaaz ef yu se wid yu uona mout infronta piipl dat “Jiizas a Laad” an ef yu biliiv iina yu aat se Gad mek im kom bak alaiv, yu wi get siev.

¹⁰ Kaaz yu biliiv wid yu aat an wen yu biliiv, Gad wi mek tingz rait bitwiin yu an im; an wen yu se infronta piipl se yu biliiv iina Krais Jiizas, yu wi get siev.

¹¹ Jos laik Gad wod se, “Nobadi we put dem chos iina im a-go shiem,”

¹² an dat go fi di Juu dem an di piipl we a no Juu tu. Di siem sitn go fi di tuu a dem kaaz di tuu a dem av di siem Laad, an di Laad bles nof nof enibadi we kaal pan im.

¹³ Kaaz “Enibadi we kaal pan di Laad niem wi get siev.”

¹⁴ Bot ef dem no biliiv iina im, ou dem fi kaal pan im? An ou dem fi biliiv iina im ef dem neva ier di mesij bout im? Ou dem fi ier ef sumadi no go priich tu dem?

¹⁵ An ef nobadi no sen dem, ou dem fi go priich tu nobadi? Jos laik it se iina Gad wod, “A wan gud gud sopm wen Gad mesinja dem kom priich di Gud Nyuuz.”

¹⁶ Bot a no evribadi did biliiv an fala wa di Gud Nyuuz se. Laik Aizaiya did se “Laad, mi priich yu mesij, bot uu biliiv it?”

¹⁷ So den, piipl kyan onggl kom fi biliiv wen dem ier di mesij, an dem kyan onggl ier, ef sumadi go priich tu dem bout Krais Jiizas.

¹⁸ So mek mi aks unu sopm, di Juu dem, dem neva ier? Dem no mos did ier! It rait iina Gad wod se, “Fi dem vais riich evri paat a di ort, an piipl aal uova di worl ier di wod we dem priich.”

¹⁹ So den mek mi aks unu sopm els: Di Izrel piipl dem, a andastan dem neva andastan? Dem did andastan, yes, bot dem neva waahn fi fala wa dem ier. Fos, Muoziz did tel dem we Gad did se. Gad se, “Mi a-go du tingz fi di piipl dem we a no Juu, we a-go kaaz unu fi bad main dem; an unu a-go beks kaaz a wa mi du fi di piipl we unu tingk fuul-fuul.”

²⁰ Den Aizaiya tel dem plien plien we Gad did se, im tel dem se Gad se, “Di piipl we neva did a luk fi mi, a dem fain mi; di piipl we neva did a aks fi mi, a dem mi mek nuo mi.”

²¹ Dat a wa im se bout di piipl we a no Juu, bot dis a wa im se bout di Izrel piipl dem, “Uol die lang, mi av mi an dem uopm, redi fi welkom dem piipl ya we naa fala wa mi se an we eva a go gens mi.”