Read Jamaican Patois Jiemz 11 Bible Online

Jiemz 11 - Jamaican Patois bible

Jiemz 11

¹ So den mek mi aks unu sopm, unu tingk se a waahn Gad no waahn im piipl no muor? No sa! Notn no go so! Kaaz mi a wan Izrelait tu, mi a wan a Iebriyam fambili an mi kom fram Benjamin chraib.

² Gad no ton im bak pan im piipl — di piipl we im pik fram bifuo im mek di worl! Unu no memba wa Gad wod se did apm wen Ilaija go komplien tu Gad bout aal we di Izrel piipl did a du? Ilaija se,

³ “Laad, dem kil aaf yu prafit dem, dem mash op yu alta dem; a mi wan lef an dem a luk fi kil mi!”

⁴ Bot wa Gad did tel im? Gad tel im se, “Mi kip fi miself, sevn touzn piipl we neva go dong pan dem nii an worship Bieyal.”

⁵ A siem so nou, iina dem taim ya, yu av wan sumaal gruup a piipl we Gad pik kaaz im mek op im main fi shuo dem lov iivn wen dem no dizorv it.

⁶ A no notn we dem du mek im pik dem, im pik dem kaaz im mek op im main fi shuo dem lov iivn wen dem no dizorv it. Ef a neva so it go, ef Gad did a pik piipl bies pan wa dem du, den a no gud an kain im wuda a gud an kain tu piipl.

⁷ So den, wa wi kyan jraa fram aal a dat? Di sitn dem we di Izrel piipl did a luk fa aad aad, dem neva fain it, bot di piipl we Gad pik, dem did fain it. Di res a dem, Gad mek dem ton dem aat gens im.

⁸ A siem so it rait iina Gad wod se, “Gad mek it so dat dem kyaahn fiil ar andastan notn; dem av yai we kyaahn si an iez we kyaahn ier, an tu da die ya, a so dem tan.”

⁹ An Dievid did se, “Mi prie se Gad wi set wan chrap fi dem an kech dem wen dem a av dem big big iit op. Gad, mek dem faal dong an ponish dem fi di rang we dem du;

¹⁰ mek dem yai daak so dat dem kyaahn si an fiks dem bak mek dem ben uova fi eva.”

¹¹ So mek mi aks unu dis: wen di Juu dem did faal dong, unu tingk se dem did jrap so faar dat dem kudn kom bak? Nuo sa, notn no go so! Bot kaaz dem did sin, Gad mek it so dat di piipl dem we a no Juu kuda get siev, an im du dat fi mek di Izrel piipl dem jelos.

¹² So, wen di Juu dem did a sin, Gad bles di worl wid nof nof gud sitn. Wen dem neva fala wa im se dem fi du an luuz out pan aal we im did av fi dem, Gad bles di piipl dem we a no Juu nof nof. So ef Gad du aal a dat wen di Juu dem did ton dem bak pan im, unu no tingk se im a-go bles piipl nof nof muor wen di Juu dem kom bak kom biliiv iina im?

¹³ Aal di piipl we a no Juu, mi a taak tu unu nou: mi a di apasl we Gad sen fi priich tu di piipl we a no Juu, an mi tingk da wok de wel impuotant, so mi tek it siiros.

¹⁴ Mi tek it siiros kaaz mi uop se wa mi a du wi mek som a fi mi piipl, di Juu dem, jelos an waahn wa unu av, da wie de som a dem wi get siev.

¹⁵ Kaaz ef wen Gad did ton we fram dem, im mek it so dat di piipl iina di worl kuda ton im pikni, wa unu tingk a-go apm wen im tek dem bak? Wen Gad tek bak di Juu dem fi bi im piipl, it a-go komiin laik se dem did ded an im mek dem kom bak alaiv.

¹⁶ Nou ef yu gi di fos paat a di bred tu Gad, a riili gi yu a gi im di uol a di bred; an ef yu gi op di ruut paat a wan chrii tu Gad, yu a gi im di branch dem tu.

¹⁷ Bot ef som a di branch dem brok aaf, an dem tek unu, unu we a wan wail piis a aliv shuut, an bod di aliv chrii so dat unu kyan liv aafa di gud sitn dem we kom fram di ruut,

¹⁸ unu kyaahn a gwaan laik se unu beta dan di branch dem. Bot ef eni a unu waahn fi brag an buos, jos memba se a no unu a sopuot di ruut bot a di ruut a sopuot unu.

¹⁹ Wen unu memba dat unu wi se, “Di branch dem did afi brok aaf, fi mek ruum fi mi.”

²⁰ Nou dat a di chuut. Dem did get brok aaf kaaz dem neva biliiv bot kaaz unu biliiv unu a go tan wich paat unu de. Bot no mek dat get tu unu ed, insted-a dat unu beta wach unuself!

²¹ Kaaz ef Gad did chap aaf di branch dem we did a gruo pan di chrii, im wi chap unu aaf tu.

²² Unu fi tek nuot a dis! Gad kain bot im aad tu. Di piipl we sin an tap biliiv iina im, im chriit dem aad, bot im kain tu unu, an im wi gwaan kain tu unu ef unu gwaan chos iina im. Bot ef unu tap chos iina im, im wi kot unu aaf tu.

²³ An iivn dem we Gad did kot aaf, ef dem chienj dem wiez an staat biliiv, im wi tek dem an bod dem bak iin, kaaz Gad av di powa fi put dem bak pan di chrii.

²⁴ Unu kom fram wan wail aliv chrii an Gad tek unu an bod unu pan wan aliv chrii we im did plaant. Nou it no naamal fi tek di branch aafa wan kain-a chrii an put it pan wan neda kain-a chrii bot a dat Gad did du. Nou ef Gad kyan du dat, im no kyan muor dan tek di branch dem we im did brok aaf an bod dem bak pan di chrii we dem did kom fram?

²⁵ Breda an sista mi waahn unu fi andastan da siikrit ya we piipl neva nuo bout bifuo. Mi waahn unu fi andastan it so dat unu no get ful-a unuself an tingk se unu waiz: Di Izrel piipl dem mek op dem main se dem naa biliiv iina Jiizas, bot dat naa go gwaan fi eva. It a-go tap wen aal a di piipl dem we a no Juu an we Gad did pik kom fi biliiv iina im.

²⁶ An so aal a di Izrel piipl a-go get siev, a siem so it rait dong iina Gad wod se: “Di wan we siev piipl a-go kom outa Zaiyan; An Jiekob fambili, di Izrel piipl, im a-go tek aal a di wikidnis outa dem aat.

²⁷ An dis a wa mi pramis dem wen mi tek we dem sin.”

²⁸ Kaaz di Juu dem did ton dem bak pan di Gud Nyuuz, dem a Gad enimi, an dat wok out gud fi unu we a no Juu. Bot dem a di piipl we Gad did pik an so im stil lov dem kaaz a dat im did pramis fi dem faada faada go bak se im wuda du.

²⁹ Gad naa go chienj im main bout di piipl we im did pik an im naa go tek bak di gif dem we im gi dem.

³⁰ A siem so unu we a no Juu, unu neva yuus tu fala wa Gad se, bot Gad mek op im main fi gud an kain tu unu kaaz di Juu dem neva did a fala wa im se.

³¹ So wan taim unu neva did a fala wa Gad se, a siem so nou di Juu dem naa fala wa im se, an siem laik ou Gad did gud an kain tu unu a siem so im a-go gud an kain tu di Juu dem.

³² Piipl neva waahn fi du wa Gad se dem fi du. So Gad lef dem fi du di sitn dem we dem waahn. Gad lef dem an mek di sitn dem we dem waahn fi du av dem laik prizna, so dat lieta im kuda gud an kain tu di uol a dem.

³³ Gad gud an kain tu aal piipl nof nof! Nobadi no waiz laik im an nobadi no nuo aal we im nuo. Uu kyan se wai im mek op im main fi du di sitn dem we im du? Uu kyan andastan di wie im du tingz?

³⁴ Kaaz “Uu nuo wa di Laad a tingk? Uu kyan tel im wa im fi du ar wa im no fi du?

³⁵ Uu gi Gad notn we mek im afi pie dem bak?”

³⁶ Kaaz a Gad mek evriting! A im kaaz evriting fi liv an evriting mek fi sorv im. Gad fi get priez fi eva an eva! Iemen!