Read Jamaican Patois Jiemz 14 Bible Online

Jiemz 14 - Jamaican Patois bible

Jiemz 14

¹ Di breda an sista dem we no chrang iina wa dem biliiv, unu mos tek dem iin an mek dem fiil welkom. No aagyu wid dem bout wa dem fiil rait fi du ar rang fi du.

² Som piipl biliiv se dem kyan iit evriting, bot di piipl we no chrang iina wa dem biliiv, dem wi onggl iit vejitebl — dem naa iit no miit.

³ Di piipl we iit evriting dem no fi luk dong pan di piipl dem we no iit miit an di piipl we no iit miit, dem no fi joj di piipl we iit miit kaaz Gad don tek dem fi fi im pikni dem.

⁴ Uu unu tingk unu bi, fi a joj sumadi els sorvant? A onggl di sorvant maasta kyan tel im ef im a du we im fi du ar ef im naa du we im fi du — onggl dem maasta kyan se ef dem a tan op ar dem a faal dong. An dem wi tan op kaaz di Laad kyan mek dem tan op.

⁵ Som piipl biliiv se wan die muor impuotant dan di res a die dem iina di wiik, bot ada piipl tingk se di uol a dem a di siem ting. Evribadi afi mek op dem uona main bout wa dem biliiv an nuo wai dem biliiv it tu.

⁶ Di piipl we se wan die muor impuotant dan di res, dem a yuuz da die de fi ana Gad. Di piipl we iit evriting, dem a du it fi ana Gad, kaaz dem gi Gad tangks fi di fuud we dem a iit. An di piipl dem we no iit miit, dem du dat fi ana Gad tu, kaaz dem gi Gad tangks fi di fuud we dem iit tu.

⁷ Non a wi a liv fi wiself wan an non a wi naa ded fi wiself wan.

⁸ Kaaz ef wi liv, wi a liv fi di Laad; an ef wi ded, wi ded fi di Laad. So den, weda wi liv ar wi ded, wi bilang tu di Laad.

⁹ A dat mek Krais Jiizas did ded an den kom bak alaiv; im du dat so dat im wuda bi Laad uova evribadi — Laad fi di piipl we ded an Laad fi di piipl we alaiv.

¹⁰ So den unu we no iit miit — wa mek unu a joj unu breda an sista? An unu we iit evriting — wa mek unu a luk dong pan unu breda an sista? Aal a wi afi go tan op infronta Gad fi im joj wi.

¹¹ It rait iina Gad wod se: “Di Laad se, ‘Az shuor az mi alaiv, evribadi a-go ben dong pan dem nii infronta mi an aal a dem a-go se out loud dat mi a Gad.’ ”

¹² So den evribadi afi go ansa tu Gad fi demself.

¹³ So mek wi tap joj wi wan aneda. Insted-a dat mek wi chrai wi bes fi no du notn we wi kaaz wi breda an sista fi sin.

¹⁴ Mi an Jiizas a wan an so mi nuo fi shuor se no fuud no de we rang fi mi iit. Bot ef sumadi riili biliiv se it rang fi dem iit sopm, den it wuda rang fi dem iit it.

¹⁵ Ef yu nuo se wen yu iit sortn an sortn fuud yu a-go ton aaf yu breda an sista, an yu du it siem wie, yu naa chriit dem wid lov. No mek di sitn dem we unu a iit mash op unu breda an sista we Krais Jiizas ded fa.

¹⁶ So di sitn dem we unu tingk gud fi du, no du notn we wi mek piipl se dat dem wikid.

¹⁷ Kaaz Gad Kindom no av notn fi du wid wa piipl iit an jringk ar we dem no iit an jringk. Gad kindom a bout ou piipl liv; ef dem a liv rait, ef dem av piis iina dem aat, an ef dem aat api — an aal a dem sitn de kom fram di Uoli Spirit.

¹⁸ Enibadi we liv an sorv Krais Jiizas da wie de, wi kaaz Gad fi api wid dem an piipl wi rispek dem fi wa dem du.

¹⁹ So den mek wi aalwiez chrai fi du di sitn dem we kaaz piipl fi liv iina piis an we wi elp fi bil op wi wan aneda.

²⁰ No mash op di wok we Gad du uova fuud. So iivn duo evriting kliin an gud fi iit, it wuda rang fi yu iit it ef it a-go kaaz sumadi fi sin.

²¹ It gud fi no iit miit ar jringk wain ar fi du notn we wuda kaaz yu breda ar sista fi sin.

²² So den wen it kom tu dem sitn ya, kip wa yu biliiv bitwiin yu an Gad. Di piipl we kyan du wa dem biliiv rait an no wanda at aal ef wa dem a du rang ar fiil gilti bout we dem a du, a dem riili api.

²³ Bot ef sumadi iit sopm, an a wanda ef it rang ar it rait fi dem iit it, Gad a-go joj dem an se dat wa dem a du rang, kaaz dem naa liv azkaadn tu wa dem biliiv. An eniting we no lain op wid wa yu biliiv rait, a sin.