Read Jamaican Patois Jiemz 15 Bible Online

Jiemz 15 - Jamaican Patois bible

Jiemz 15

¹ Nou wi we chrang iina wa wi biliiv, wi fi tek taim wid an elp di wan dem we wiik. Wi no fi jos du di sitn dem we wi waahn an wa wi mek wi api.

² Insted-a dat mek evri wan a wi du di sitn dem we wi mek wi breda an sista api, mek wi du di sitn dem we gud fi dem an wa wi elp fi bil dem op.

³ Iivn Krais Jiizas neva du di sitn dem we im du fi mek imself api. It rait iina Gad wod dat Jiizas se tu Gad se, “Wen piipl chat bad bout yu an shiem yu, aal we dem se bout yu, dem riili a se bout mi tu.”

⁴ Evriting we rait dong iina Gad wod, rait dong fi tiich wi an fi elp push wi fi tan op chrang an no gi op so dat wi kyan gwaan luk fi get di sitn dem we Gad pramis wi.

⁵ Mi prie se Gad, Gad uu kyan mek piipl chrang an kaaz dem fi eng aan an no gi op, mi prie se im wi kaaz unu fi liv iina piis wid unu wan aneda wail unu a fala Krais Jiizas.

⁶ So dat aal a unu kyan kom tugeda wid wan aat an wan vais an priez di Gad an Faada fi wi Laad Jiizas Krais.

⁷ So den tek unu wan aneda siem laik ou Krais Jiizas did tek unu, so dat piipl wi priez Gad.

⁸ Kaaz mi a tel unu, Krais Jiizas did kom fi elp di Juu dem. Im did kom fi shuo dem se Gad wi aalwiez du wa im se im a-go du — im did kom fi shuo dem se Gad wuda du aal we im did pramis di Juu dem faada faada go bak se im wuda du.

⁹ Krais Jiizas did kom tu, so dat di piipl we a no Juu kuda priez Gad kaaz im did gud an kain tu dem. A siem so it rait iina Gad wod se: “So mi wi gi yu tangks wen mi de mongks di piipl we a no Juu, an mi wi sing priez tu yu.”

¹⁰ Wan neks paat se: “Aal di piipl we a no Juu get api an priez Gad wid im piipl di Juu dem.”

¹¹ An wan neda paat se: “Priez di Laad aal a unu we a no Juu, an mek evribadi evriwe priez im.”

¹² An iina wan neda paat a Gad wod, Aizaiya se: “Sumadi fram Jesi fambili a-go kom, an im a-go ruul uova di piipl we a no Juu, an dem a-go luk fi im gi dem aal we im pramis fi gi dem.”

¹³ Mi prie se Gad, Gad we kaaz piipl fi luk fa an nuo fi shuor se dem wi get wa im pramis, mi prie se im wi gi unu piis iina unu aat an mek unu aat api, api kyaahn don kaaz unu biliiv iina im. Mi prie se im du dat, so dat di Uoli Spirit wi kaaz unu muor an muor fi luk fi get di sitn dem we Gad pramis an nuo fi shuor se yu wi get dem.

¹⁴ Mi breda an sista, mi muor dan shuor bout unu, mi nuo se unu a gud piipl, unu nuo evriting we unu sopuoz fi du an unu kyan tiich unu wan aneda.

¹⁵ Bot iina da leta ya mi diil wid unu aad, mi no uol notn bak wen it kom tu sortn an sortn tingz kaaz mi waahn unu fi memba dem. Mi no uol notn bak kaaz Gad gud an kain tu mi,

¹⁶ im mek mi wan a Krais Jiizas sorvant dem an sen mi fi wok mongks di piipl dem we a no Juu. Mi a laik wan priis, fi mi jab a fi priich di Gud Nyuuz we Gad gi mi tu di piipl we a no Juu, so dat di Uoli Spirit kyan mek dem kliin an gi dem op tu Gad laik wan sakrifais, wan sakrifais we Gad kyan api wid.

¹⁷ So kaaz mi an Krais Jiizas a wan, mi kyan proud a di wok we mi a du fi Gad.

¹⁸ Mi wudn mad fi taak bout notn bot di wok we Krais Jiizas yuuz mi fi du — di wok we kaaz di piipl we a no Juu fi staat du aal a wa Gad se dem fi du. Dem staat fala Gad siek-a di sitn dem we mi se an du,

¹⁹ an siek-a di sain dem an di mirikl dem we Gad Spirit gi mi di powa fi du. So fram Jeruusilem go klier a Ilirikom, mi priich di Gud Nyuuz bout Krais Jiizas aal bout.

²⁰ Wa mi did aalwiez waahn fi du a fi go priich di Gud Nyuuz bout Krais Jiizas wich paat nobadi neva go priich yet. Da wie de mi wudn a bil pan di wok we sumadi els di staat fi du,

²¹ bot insted-a dat, siem laik ou it rait dong iina Gad wod: “Di piipl we nobadi neva tel bout Jiizas, dem wi si an di wan dem we neva ier bout im, dem wi andastan.”

²² A siek-a di wok we mi did a du, mek nof taim mi no get fi kom luk fi unu.

²³ Bot nou mi naa notn a kip mi wich paat mi de, mi wok don an a nof ier nou mi waahn kom si unu.

²⁴ Wen mi a go a Spien, mi uop se mi kyan paas chuu an si unu an dat afta mi spen likl taim wid unu, unu wi elp mi fi go we mi a go.

²⁵ Bot rait ya nou mi a go a Jeruusilem fi elp Gad piipl.

²⁶ Kaaz di choch dem iina Masiduoniya an Akaiya did muor dan api fi gi moni tu Gad piipl iina Jeruusilem we puor.

²⁷ A dem mek op dem main fi du it, nobadi neva afi se notn tu dem, bot di chuut a dat dem sopuoz fi elp Gad piipl we puor. Kaaz ef di Juu dem did shier aal a di nais sitn dem we Gad Spirit gi dem wid di piipl we a no Juu, dem no fi shier dem moni an tingz wid dem tu.

²⁸ So den afta mi don aal a dis an mek shuor di moni riich dem sief, mi wi ed out fi Spien bot mi a-go kom fi unu wie,

²⁹ an mi nuo se wen mi kom de, Krais Jiizas a-go bles unu nof nof.

³⁰ Kaaz aal a wi biliiv iina Jiizas Krais, an siek-a di lov we di Uoli Spirit gi wi, mi a beg unu breda an sista fi prie tu Gad fi mi. Kom prie wid mi an prie aad aad.

³¹ Prie se di piipl iina Judiya we no biliiv iina Jiizas Krais, prie se dem no ort mi. An prie tu se Gad piipl iina Jeruusilem wi api wid wa mi did du fi dem an tek wa mi bring fi dem.

³² So prie bout dem sitn de so dat mi kyan kom luk fi unu, ef dat a wa Gad waahn, an dat wen mi kom mi aat wi api an mi kyan get som res wail mi dong de wid unu.

³³ Nou mi prie se Gad we gi piipl piis iina dem aat wi tan wid di uol a unu. Iemen!