Read Jamaican Patois Jiemz 16 Bible Online

Jiemz 16 - Jamaican Patois bible

Jiemz 16

¹ Nou mi waahn unu fi nuo se wi sista Fiibi a wan gud sumadi — shi sorv di choch iina Senkriya.

² Tek ar iin an chriit ar laik ou unu nuo unu fi chriit Gad piipl, kaaz shi bilang tu Gad, an Gad piipl sopuoz fi chriit dem wan aneda gud. Eniting shi niid fram unu, gi it tu ar, kaaz a nof piipl shi elp — shi aal elp mi.

³ Tel Priska an Akwila oudi fi mi. Dem wok wid mi fi Jiizas Krais

⁴ an dem put demself iina siiros chobl fi mi — dem did redi fi ded fi mi. Mi kyaahn tangk dem inof, an a no jos mi a tel dem tangks bot aal a di piipl we go a di choch dem fi piipl we a no Juu, a tangk dem tu.

⁵ Di uol a di piipl dem we gyada fi choch a Priska an Akwila ous, tel dem oudi fi mi tu. Mi gud gud fren Epiniitos tel im oudi fi mi. Im a did di fos wan iina Iezha fi biliiv iina Jiizas Krais.

⁶ Mieri we wok aad aad fi unu, tel ar oudi.

⁷ Anjranikos an Juuniyas, mi kombolo uu did iina prizn wid mi, oudi tu unu. Aal a di apasl dem nuo dem gud gud an rispek dem an dem did biliiv iina Krais Jiizas bifuo mi.

⁸ Tel Ampliyaatos oudi fi mi. Im a mi gud gud fren an im an Jiizas a wan.

⁹ Orbanos we wok wid wi fi Jiizas Krais an mi gud gud fren Stiekis, tel di tuu a dem oudi fi mi.

¹⁰ Tel Apelez we go chuu nof chraiyal an kraasiz an pruuv se im a Gad sorvant oudi fi mi. An tel aal a di piipl we liv a Aristobyuulos ous oudi fi mi tu.

¹¹ Tel mi kombolo Eruodiyan oudi an se oudi tu aal di piipl we liv a Narsisos yaad an we biliiv iina Jiizas Krais.

¹² Tel Chraifiina an Chraifuosa we a wok fi di Laad oudi fi mi an mi waahn fi sen oudi fi mi gud gud fren Porsis tu. Porsis wok aad aad fi di Laad.

¹³ Tel Ruufos oudi fi mi. Im a wan a di Laad gud gud sorvant dem an tel im mada oudi fi mi tu — a laik shi a fi mi mada tu.

¹⁴ Asingkritos, Flegan, Ormiiz, Pachrobas, Ormas an di uol a di breda an sista dem we de wid dem, tel dem oudi fi mi.

¹⁵ Tel Filalogos an Juuliya, Neriyos an im sista, Olimpas an aal a Gad piipl we de de wid dem oudi fi mi.

¹⁶ Unu fi tel unu wan aneda oudi an du it wid lov. Aal a Krais Jiizas choch dem we out ya sen oudi fi unu.

¹⁷ Nou breda an sista, mi a beg unu wach out fi di piipl we kaaz di piipl iina di choch fi plit op an fait wid dem wan aneda, we kaaz piipl fi ton we fram wa dem biliiv an we taak gens an tiich tingz we no lain op wid wa unu did lorn. No av notn fi du wid dem!

¹⁸ Kaaz dem piipl de, dem naa sorv wi Laad Jiizas Krais, dem onggl a sorv demself. Dem a swiit-mout, dem yuuz aal kain-a fansi wod fi chrik an miks op di piipl dem we no nuo beta.

¹⁹ Evribadi ier bout ou unu biliiv an a fala di Gud Nyuuz bout Krais Jiizas wid aal a unu aat an unu mek fi mi aat wel api wid aal we unu a du. Bot mi waahn unu fi waiz — mi waahn unu fi aalwiez nuo wa rait fi unu du an no av notn fi du wid no kain-a wikidnis.

²⁰ Suun, Gad we gi piipl piis iina dem aat, wi put Sietan anda yu fut an mash im op. Mi prie se di Laad Jiizas Krais wi shuo unu lov iivn duo wi no dizorv it.

²¹ Timoti, we wok wid mi sen oudi fi unu. Mi kombolo dem: Luushos, Jiesn an Sosipieta sen oudi fi unu tu.

²² An mi, Torshiiyos we bilang tu Gad an we a rait dong da leta ya fi breda Paal, a sen oudi fi unu tu.

²³ Gaiyos uu mi a stie wid an iina uufa yaad dem kip choch, sen oudi fi unu. Irastos we kip di moni fi di siti an wi breda Kwaatos sen oudi fi unu tu.

²⁵ Mek wi priez Gad — Gad we kyan mek unu tan op chrang iina wa unu biliiv azkaadn tu di Gud Nyuuz we mi priich bout Krais Jiizas, an azkaadn tu di chuu sitn dem we a did siikrit fram lang lang taim a bak,

²⁶ bot we Gad mek wi nuo bout nou. Gad we liv fi eva an eva, tel di prafit dem fi rait dong dem sitn ya iina Gad wod, an sen out piipl fi priich bout it so dat evribadi wuda nuo di chuut an staat fi biliiv an fala Gad.

²⁷ Gad a di onggl riil Gad, notn an nobadi no waiz laik im. So siek-a wa Jiizas Krais du fi wi, mek wi priez Gad fi eva an eva. Iemen!