Read Jamaican Patois Jiemz 2 Bible Online

Jiemz 2 - Jamaican Patois bible

Jiemz 2

¹ Unu si aal a unu we a joj ada piipl, no mata uu unu bi, unu naa go kyan se notn wen Gad kom fi joj di worl. Kaaz wen unu a joj ada piipl, it komiin laik unu a joj unuself, kaaz di rang sitn dem we dem a du, a di siem sitn unu a du tu.

² An aal a wi nuo se Gad rait fi joj evribadi we a du dem sitn de.

³ Bot aal a unu we a joj ada piipl, di sitn dem we unu a joj ada piipl fa an we unu a du, unu no tingk se Gad a-go joj unu fi dem tu? Unu riili tingk im a-go jos mek unu get we so?

⁴ Gad tek im taim wid unu, im put op wid unu an im no ponish unu siem taim wen unu du rang. Unu no si se Gad gud tu unu? Ar a kier unu no kier bout dem sitn de? Unu no si se Gad kain tu unu, kaaz im chrai fi get unu fi ton we fram sin an sari fi di rang we unu du?

⁵ Bot kaaz unu aad-iez an mek op unu main se unu naa ton we fram unu sin — unu a mek tingz aad fi unuself. Pan di die wen Gad kom bak fi joj di worl, im a-go ponish unu. Im a-go shuo se im beks wid di piipl dem we a sin, an im a-go ponish dem. An im a-go ponish unu aada dan di res a piipl dem.

⁶ Gad “wi gi evribadi wa dem fi get — im wi pie dem bies pan wa dem du.”

⁷ Yu av som piipl we a liv rait an we aalwiez a du gud fi ada piipl. Dem piipl de waahn Gad fi taak gud bout dem. Dem waahn im fi big dem op an mek dem liv fi eva. An a dem de piipl de Gad a-go mek liv fi eva an eva.

⁸ Bot yu av som ada piipl we onggl bizniz bout demself — dem no du notn fi elp ada piipl. Dem mek op dem main se dem naa du wa rait — dem onggl a-go du we Gad se rang. Dem piipl de Gad a-go shuo dem se im beks wid dem, im a-go ponish dem aad aad.

⁹ Di piipl dem we a du aal kain-a wikidnis, Gad a-go mek dem fiil nof pien — im a-go mek dem sofa. Im a-go du dat tu piipl we a Juu an tu piipl we a no Juu.

¹⁰ Bot di piipl dem we eva a du gud an we a liv rait, Gad a-go big dem op an taak gud bout dem. Im a-go gi dem piis iina dem aat. Gad a-go du dat fi piipl we a Juu an fi piipl we a no Juu tu.

¹¹ Kaaz Gad no paashal, im chriit evribadi di siem.

¹² Di piipl we no nuo Gad Laa stil a-go get ponish fi dem sin. Gad a-go joj dem bies pan wa dem du. Di piipl we nuo Gad Laa an stil a sin, a-go get ponish tu. Gad a-go yuuz di Laa fi joj dem.

¹³ Kaaz Gad mek tingz rait bitwiin im an di piipl we ier di Laa an fala aal we it se, no wid di piipl dem we jos ier it bot naa fala it.

¹⁴ Di piipl we a no Juu, dem neva get Gad Laa, so dem no nuo wa di Laa se. So wen dem du di sitn dem we di Laa se piipl fi du, dat shuo se dem nuo wa rait fram wa rang.

¹⁵ Wa dem du shuo se di sitn dem we di Laa tiich rait dong iina dem aat. An di sitn dem we dem tingk, shuo se a chuu tu. Kaaz dem uona kanchens wi tel dem ef wa dem a du rait ar ef it rang.

¹⁶ Di siem ting we mi priich a di siem ting we a-go apm pan di die wen Jiizas kom bak fi joj di worl. Im a-go joj piipl bies pan wa dem tingk an wa dem du, iivn di sitn dem we dem du iina siikrit.

¹⁷ So nou, wa bout unu? Unu se unu a Juu, unu put unu chos iina di Laa an buos bout ou unu bilang tu Gad.

¹⁸ Unu nuo wa Gad waahn unu fi du an kaaz unu nuo di Laa, unu nuo wa rait an unu nuo se a dat unu fi du.

¹⁹ Unu biliiv se a unu a liida fi di piipl we blain an dat unu a wan lait fi di piipl we de iina daaknis.

²⁰ Kaaz unu nuo di Laa unu fiil se unu nuo an andastan evriting an dat evriting we unu se a chuu sopm. An siek-a dat unu fiil se unu kyan karek di piipl dem we no nuo rait fram rang an unu kyan tiich di piipl dem we no nuo di chuut.

²¹ Unu a tiich ada piipl, so ou kom unu naa lorn? Ou kom unu naa fala wa unu tiich? Ou kom unu a priich se piipl no fi tiif bot unu a tiif?

²² Unu tel piipl se dem no fi sliip wid piipl we dem no marid tu, so wa mek unu a sliip wid piipl we unu no marid tu? Unu taak gens di faalz gad dem, unu se unu iet dem, bot unu a tiif tingz outa di ous wich paat piipl worship dem.

²³ Unu brag an unu buos bout ou unu nuo Gad Laa bot unu naa fala it. Unu no si se wen unu du dat unu a kaaz piipl fi no av no rispek fi Gad?

²⁴ It aal rait dong iina Gad wod se, “Unu we se unu a Juu, unu a kaaz di piipl we a no Juu fi se aal saat a wikid sitn bout Gad.”

²⁵ Ef unu a fala di Laa, den di fak se unu sorkomsaiz miin sopm. Bot ef unu naa fala di Laa, unu kuda sorkomsaiz likl muor, it no miin a ting — a laik se unu neva sorkomsaiz iina di fos plies.

²⁶ So nou, di piipl dem we a no Juu an we no sorkomsaiz, ef dem a du aal a wa di Laa se dem fi du, unu no tingk se Gad a-go chriit dem siem laik ou im chriit di piipl we sorkomsaiz? Unu no tingk se im a-go tek dem fi fi im piipl?

²⁷ An unu we sorkomsaiz an nuo di Laa bot a brok it, unu no tingk se di piipl dem we no sorkomsaiz bot a fala di Laa naa go joj unu?

²⁸ No chuu sumadi sorkomsaiz an a liv laik wan Juu miin se dem a riili wan Juu.

²⁹ Di piipl dem we a riili Juu a di wan dem we Gad tek fi bi im piipl kaaz dem lou di Uoli Spirit fi chienj dem aat, no kaaz dem sorkomsaiz ar nuo di Laa. Dem de piipl de, Gad a-go big op, iivn ef ada piipl naa big dem op.