Read Jamaican Patois Jiemz 3 Bible Online

Jiemz 3 - Jamaican Patois bible

Jiemz 3

¹ So den, piipl mait-a aks, wa gud it du wi, fi bi wan Juu? Wa wi get we di piipl dem we a no Juu no get? Wa gud it du wi fi get sorkomsaiz?

² An mi wuda tel dem se it gud fi bi wan Juu, a nof difrant sitn wi get, we elp wi iina nof difrant wie. Fos, a wi Gad did gi im Wod tu — a wi im chos wid im mesij.

³ Nou som a di Juu dem brok dem pramis an neva fala wa Gad wod se. So wa unu tingk? Unu tingk se kaaz dem de piipl de brok dem pramis, Gad naa go du wa im se im wuda du?

⁴ Notn kyaahn go so! Gad wi aalwiez du wa im se im a-go du, iivn wen piipl lai an se dem du wa dem did pramis fi du. It aal rait dong iina Gad wod se: “Evritaim Gad taak, piipl wi si se wa im a se a chuu sopm. No mata wa piipl se gens Gad, a Gad a-go win.”

⁵ So wa ef wen wi du rang, piipl si klier klier se Gad aalwiez a du we rait? Wa wi kyan se bout dat? Unu tingk wi kyan se Gad a du rang wen im ponish wi? (Mi jos a taak ou som piipl taak)

⁶ Nuo sa! Kaaz ef Gad no joj wi, ou im fi go joj di res a di worl?

⁷ Nou som piipl mait-a se, “ef wen wi du rang an no fala we Gad se, wi a elp ada piipl fi si klier klier se Gad a di chuut an im aalwiez du we im se im wi du, an siek-a dat dem staat priez im, ou kom Gad stil a joj wi laik se wi a sina?”

⁸ Ef unu a go se dat, mek unu no jos se, “Kom mek wi go du aal kain-a wikid sitn, so dat wi wi kaaz nof gud sitn fi apm” — no dat som piipl we lov tel lai pan wi, a kliem se wi se. Dem piipl de, Gad a-go ponish dem — dem a-go get jos wa dem fi get.

⁹ So wa? Unu tingk se wi we a Juu beta aaf dan di piipl dem we a no Juu? Nuo sa! Kaaz mi don shuo unu aredi se evribadi, weda dem a Juu ar dem a no Juu, sin kanchuol dem laif — evribadi a sina.

¹⁰ A siem so it se iina Gad wod. It rait dong se: “Nobadi, no iivn wan sumadi, du we rait iina Gad yai.

¹¹ Nobadi no riili nuo we rait, Nobadi no riili waahn fi nuo Gad.

¹² Evribadi ton dem bak pan Gad, dem ton bad — dem naa no yuus tu Gad. Nobadi no du gud. Nobadi at aal!”

¹³ “Fi dem mout komiin laik wan uopm griev, wid dem tong a bier lai dem tel an chrik piipl. Di wod dem we kom outa dem mout kil piipl, a laik dem lip ful op a di siem paizn we siniek av.

¹⁴ Dem eva a kos an a wish bad tingz pan piipl, an evriting wa dem se shuo se dem bita.”

¹⁵ “Dem kwik fi kil piipl,

¹⁶ an evriwe dem go dem kaaz piipl fi sofa an dem mash op evriting.

¹⁷ Dem no du notn we wuda kaaz piipl fi liv iina piis.”

¹⁸ “Dem no fried a Gad — dem no rispek im fi uu im bi.”

¹⁹ Nou wi nuo se evriting we rait dong iina di Laa a fi di piipl we a fala di Laa. Gad gi dem di Laa so dat nobadi kyan se notn wen im kom fi ponish dem — nobadi kyan se dem neva nuo rait fram rang. So Gad a-go ponish evribadi we de iina di worl, weda dem a Juu ar dem a no Juu.

²⁰ Evribadi a-go get ponish, kaaz Gad naa go mek tingz rait bitwiin yu an im jos chuu yu a fala di Laa. Di Laa kyaahn du dat, wa di Laa du a mek wi nuo se wi a sina.

²¹ Bot nou Gad shuo wi ou im plan fi mek tingz rait bitwiin im an piipl. Da plan de no av notn fi du wid di Laa, (iivn duo di Laa an di prafit dem did taak bout da plan de). It no av notn fi du wid di Laa, so no chuu yu a fala di Laa dat miin se Gad a-go mek tingz rait bitwiin yu an im.

²² Gad onggl mek tingz rait bitwiin im an piipl wen dem biliiv iina Jiizas Krais. A so it go fi evribadi weda yu a Juu ar yu a no Juu.

²³ Kaaz evribadi du rang — evribadi a sina. Gad did mek wi laik im an wi did fi tan laik im bot siek-a sin dat neehn apm.

²⁴ Bot iivn duo wi no dizorv it, Gad shuo wi lov. So moch so dat im mek tingz rait bitwiin wi an im, an wi neva iivn afi du notn. Im sen Jiizas Krais fi ded fi wi an tek we wi sin dem.

²⁵ Gad sen Jiizas fi gi op im laif an siev wi. Wen Jiizas ded pan di kraas, fi im blod pie fi wi sin dem an so wi no afi get ponish. Aal wi afi du fi get wi sin dem paadn, a biliiv iina Jiizas. Wen Gad sen Jiizas im shuo se im no paashal — im chriit evribadi siem wie, kaaz bifuo Jiizas did kom, im neva ponish nobadi fi dem sin, im tek taim wid dem.

²⁶ Bot iina dem ya taim ya Gad naa go tek taim wid piipl, im a-go ponish dem fi di rang we dem du. Wen im sen Jiizas im shuo wi se im aalwiez du we rait an dat im wi mek tingz rait bitwiin im an piipl, aal dem afi du fi get dem sin dem paadn, a fi biliiv iina Jiizas.

²⁷ So den, wa wi av fi brag an buos bout? Notn at aal! Wa? Unu tingk se wi kyan go buos bout se wi a fala di Laa? Afta Gad no mek tingz rait bitwiin im an piipl kaaz dem a fala di Laa, Gad onggl mek tingz rait bitwiin im an piipl kaaz dem biliiv iina Jiizas.

²⁸ So wi kyaahn se dat nobadi a-go get Gad fi mek tingz rait bitwiin im an dem, jos chuu dem a fala di Laa. Dem wi onggl get Gad fi du dat wen dem biliiv.

²⁹ Anles wa unu a se a dat Gad a onggl Gad fi di Juu dem. Gad a no Gad fi di piipl dem we a no Juu tu? Afkuors im a fi dem Gad tu!

³⁰ A onggl wan Gad de, an a im a Gad fi di Juu dem an di piipl dem we a no Juu. Gad a-go mek tingz rait bitwiin im an di Juu dem wen dem biliiv siem laik ou im wi mek tingz rait bitwiin im an di piipl dem we a no Juu wen dem biliiv.

³¹ So wa dat miin fi di Laa? Ef Gad onggl mek tingz rait bitwiin im an piipl wen dem biliiv, dat miin se di Laa no wot notn? Nuo notn no go so! Wen wi biliiv iina Gad wi a shuo se di Laa riili wot sopm, a da taim de wi riili a fala di Laa.