Read Jamaican Patois Jiemz 4 Bible Online

Jiemz 4 - Jamaican Patois bible

Jiemz 4

¹ So aal a wi we a Juu, wa wi kyan se den bout wi faada Iebriyam? A wa did apm wid im?

² Ef Gad did mek tingz rait bitwiin im an Iebriyam, kaaz a di sitn dem we Iebriyam did du, den Iebriyam wuda av nof fi buos bout, bot im kudn buos infronta Gad.

³ Bot a wa Gad wod se? It se “Iebriyam did biliiv iina Gad an so Gad mek tingz rait bitwiin im an Iebriyam.”

⁴ Nou ef sumadi go du wan wok, di moni we dem get wen dem don, dem naa go luk pan it an se a wan prezent. Nuo, dem a-go se a dat dem wok fa.

⁵ Bot ef sumadi no afi du notn fi Gad mek tingz rait bitwiin im an dem, ef aal dem afi du a chos iina Gad, Gad we tek we piipl sin an se dat dem kliin, no wan gif im a gi wi? A no sopm wi did afi wok fa.

⁶ Dat a wa Dievid did miin wen im did a taak bout ou piipl wel api wen Gad mek tingz rait bitwiin im an dem. Dem wel api kaaz aal dem did afi du a chos iina Gad, dem neva afi du notn els. Dievid rait iina Saamz se:

⁷ “Di piipl uufa sin Gad paadn, a dem riili api. Gad paadn dem fi aal a di rang we dem du.

⁸ Di piipl we Gad luk pan an se im naa uol dem sin gens dem, a dem riili api.”

⁹ A onggl di piipl dem we sorkomsaiz Dievid did a taak bout? A dem wan Gad a-go paadn an mek api? Nuo, im did a taak bout di piipl we no sorkomsaiz tu. Wi se dat Iebriyam did biliiv iina Gad an so Gad mek tingz rait bitwiin im an Iebriyam.

¹⁰ A wen unu tingk Gad did du dat? Unu tingk im du it bifuo ar afta Iebriyam get sorkomsaiz? Gad did mek tingz rait bitwiin im an Iebriyam bifuo Iebriyam did sorkomsaiz.

¹¹ An a lang afta dat apm Iebriyam go get sorkomsaiz. Im go get sorkomsaiz fi shuo se Gad did mek tingz rait bitwiin di tuu a dem iivn duo im neva sorkomsaiz, an Gad did du it kaaz Iebriyam did biliiv iina im. So Iebriyam komiin laik di faada fi aal a di piipl dem we neva get sorkomsaiz bot uu Gad mek tingz rait bitwiin im an dem kaaz dem biliiv iina im.

¹² An a no jos dem piipl de im a faada fa, Iebriyam a faada tu fi di piipl dem we sorkomsaiz an we biliiv iina Gad laik ou Iebriyam did biliiv iina Gad bifuo im get sorkomsaiz.

¹³ Gad did pramis Iebriyam se di worl wuda bilang tu im an im pikni dem. Gad neva mek im da pramis de kaaz im did a fala di Laa, bot kaaz Iebriyam did biliiv iina Gad an Gad did mek tingz rait bitwiin di tuu a dem.

¹⁴ Ef a onggl di piipl we a fala di Laa a-go get di sitn dem wa Gad pramis, den it no mek no sens fi wi chos iina Gad an aal a di pramis dem we Gad mek no miin notn.

¹⁵ Kaaz Gad beks wen piipl brok im Laa, an kaaz a di Laa im a-go joj dem piipl de. Bot ef no laa no de de, nobadi kyan brok it, kaaz notn wudn de de fi brok.

¹⁶ A dat mek Gad neva mek im pramis bies pan weda piipl fala ar no fala di Laa, bot bies pan weda dem chos ar no chos iina im. Gad mek it da wie de so dat piipl wuda nuo se di sitn dem we im pramis a fi im frii gif tu aal a Iebriyam pikni dem. No jos di pikni dem we a fala di Laa bot tu di wan dem we biliiv laik Iebriyam tu. Iebriyam a di faada fi evribadi.

¹⁷ It aal rait dong iina Gad wod dat Gad tel Iebriyam se, “Mi a-go mek yu di faada fi nof difrant piipl fram aal uova di worl.” Da pramis ya, gud, siek-a uu Gad bi. Dis a di Gad we Iebriyam did biliiv iina, di Gad we mek ded piipl kom bak alaiv an we kaaz evriting fi de bout, aal di sitn dem we neva de bout bifuo.

¹⁸ Iivn duo im neva av no riizn fi biliiv se im wuda get we Gad pramis im, Iebriyam did biliiv siem wie. Im biliiv se Gad wuda mek im di faada fi nof difrant piipl fram aal uova di worl an dat it wuda apm siem laik ou it se iina Gad wod. It se, “Yu a-go av so moch pikni dat nobadi a-go kyan kount dem jos laik ou dem kyaahn kount di staar dem we iina di skai.”

¹⁹ Iebriyam a did aalmuos wan onjrid ier uol, im did nuo se im suun ded an dat im waif kudn av no pikni, bot iivn wid aal a dat Iebriyam stil biliiv. No taim at aal im did biliiv se Gad naa go du we im pramis fi du.

²⁰ Iebriyam neva tap biliiv an im neva kwestiyan Gad. Im gi Gad priez an kaaz im chos iina Gad, im get chrang.

²¹ Iebriyam biliiv wid aal a im aat, im did shuor se Gad kuda du evriting we im pramis fi du.

²² An a dat mek Gad did mek tingz rait bitwiin im an Iebriyam. Im du it kaaz Iebriyam did chos iina im.

²³ Bot di paat iina Gad wod we it se, “Gad mek tingz rait bitwiin dem,” dat neva rait dong fi Iebriyam wan,

²⁴ it rait fi wi tu. It rait dong fi aal a wi we Gad a-go mek tingz rait wid kaaz wi biliiv iina im. Wi biliiv iina di Gad we mek wi Laad Jiizas kom bak alaiv.

²⁵ Gad sen Jiizas fi ded siek-a fi wi sin dem an Gad mek im kom bak alaiv so dat tingz kyan rait bitwiin wi an Gad.