Read Jamaican Patois Jiemz 7 Bible Online

Jiemz 7 - Jamaican Patois bible

Jiemz 7

¹ Breda an sista, mi nuo se unu wi andastan wa mi bout fi se, kaaz aal a unu nuo di Laa. Unu nuo se di Laa av powa uova piipl fi dem uol laif — az lang az dem alaiv, dem afi fala di Laa.

² Mek mi shuo unu wa mi miin. Di Laa se ef wan uman marid, az lang az ar ozban stil alaiv shi afi tan wid im. Bot ef ar ozban ded, di Laa se shi frii.

³ So den, ef wan uman go marid wan neda man wen ar ozban stil alaiv, shi a liv iina sin kaaz shi a brok di Laa. Bot ef ar ozban ded, shi frii fi go marid agen. Shi wudn a brok no Laa.

⁴ Breda an sista a siem so it go wid unu wen it kom tu di Laa. Wen Jiizas did ded a laik unu did ded wid im, so di Laa naa no powa uova unu. Gad mek Jiizas kom bak alaiv an nou wi bilang tu im. Wi bilang tu Jiizas an siek-a dat wi a sorv Gad wen wi liv rait.

⁵ Wan taim wi did a liv ou wi waahn fi liv — wi did a mek wi badi kanchuol wi. Di sitn dem we wi badi did wel waahn fi du, did a kaaz wi fi sin. An chuu wi did nuo Gad Laa, wi staat fi sin muor an muor. Wid aal a di rang sitn dem we wi did a du a onggl ded wi did a go ded.

⁶ Bot nou Gad frii wi fram di Laa. Di Laa did av wi laik prizna bot kaaz wi did ded, wi a no prizna no muor. Nou wi sorv Gad, no wen wi fala di Laa, dat a di uol wie, nou wi sorv im wan nyuu wie. Wi sorv im wen wi liv ou Gad Spirit se wi fi liv.

⁷ So den wa wi kyan se? Unu tingk wi kyan se di Laa a sin? Unu tingk wi kyan se it rang? Nuo! Notn kyaahn go so! Ef a neva fi di Laa mi wudn iivn nuo wa sin bi! Mi wudn nuo wa it miin fi red yai ef di Laa neva se, “Unu no fi red yai.”

⁸ Siek-a di Laa, sin get a chaans fi stor op aal kain-a sitn iina mi. It mek mi waahn fi du aal a di sitn dem mi no fi du. Ef no Laa neva de, sin wudn av no powa.

⁹ Wen mi neva nuo bout di Laa, mi did alaiv. Bot wen mi kom fi nuo wa di Laa se, sin riez op iina mi an mek mi wel waahn fi du di sitn dem mi no fi du,

¹⁰ an a dat mek mi ded. So mi did fain se di siem Laa we Gad sen we did fi kaaz mi fi liv, a it kaaz mi fi ded.

¹¹ Siek-a di Laa, sin get a chaans fi chrik mi an it yuuz di Laa fi kil mi.

¹² So den di Laa kom fram Gad. Evri wan a di ruul dem kom fram Gad. An aal a di ruul dem gud kaaz dem elp piipl an dem tiich piipl wa rait.

¹³ So wa unu tingk mi a se? Unu tingk mi a se di Laa we gud, se a it kaaz mi fi ded? Nuo sa! Notn kyaahn go so! A sin kil mi. An sin shuo wi uu im riili bi wen im tek di Laa, sopm we gud, an yuuz it fi kil mi. So di Laa, it elp wi fi riili si ou torbl sin bi.

¹⁴ Nou wi nuo di Laa kom fram Gad an dat it afi du wid wi spirit. Bot mi, mi a jos wan man. Mi komiin laik wan sliev. Mi a wan sliev an sin a mi maasta — mi afi du wa it se.

¹⁵ Mi no andastan di sitn dem we mi a du, kaaz mi naa du di sitn dem we mi waahn fi du. Insted-a dat mi a du di sitn dem we mi iet.

¹⁶ An ef mi a du di sitn dem we mi no waahn fi du, dat a shuo se mi a se, “Yes, di Laa rait”.

¹⁷ So a no riili mi a du dem sopm ya bot a di sin we a liv iina mi a du it.

¹⁸ Mi nuo se notn gud no de iina a mi, mi badi naa go mek mi du we rait. Kaaz mi waahn fi du we gud bot mi kyaahn du it.

¹⁹ Di gud sitn dem wa mi waahn fi du, mi no du dem. Bot di wikid sitn dem we mi no waahn fi du, a dat mi du.

²⁰ So ef mi a du di sitn dem we mi no waahn fi du, a no mi riili a du dem. A di sin we a liv iina mi a du it.

²¹ So mi fain se dis a wa a apm iina mi laif. Wen mi waahn fi du we rait, mi kyan onggl chuuz fi du wa wikid.

²² Iina mi aat, mi api bout di Laa we kom fram Gad.

²³ Bot fi mi badi a fala wan difrant laa, an da laa de a go gens di Laa we iina mi ed. Fi mi badi a fala sin laa, an it av mi laik prizna — mi badi du evriting we it se.

²⁴ Mi sari iihn, mi a wan sari kies fi chuu! Uu a-go siev mi fram da badi ya we a kil mi?

²⁵ Mi tangk Gad kaaz im wi siev mi an im yuuz wi Laad Jiizas Krais fi du it. So dis a ou tingz stie wid mi: iina mi ed, mi a wan sliev an Gad Laa a mi maasta. Mi waahn fi fala evriting we it se, bot mi badi, a laik sin a fi it maasta an it a fala evriting we sin se it fi du.