Read Jamaican Patois Jiemz 9 Bible Online

Jiemz 9 - Jamaican Patois bible

Jiemz 9

¹ Mi a taak di chuut; mi bilang tu Krais Jiizas an mi naa lai. Di Uoli Spirit kanchuol fi mi kanchens an mi kanchens naa bada mi. So mi nuo fi shuor se mi a taak di chuut wen mi se

² mi sad so til mi waahn baal. Mi aat no tap pien mi

³ wen mi tingk bout fi mi piipl, di piipl we kom fram fi mi konchri, Izrel. Fi fi dem siek mi wish se a did mi. Mi wish se a did mi Gad joj an se fi ded an we no bilang tu Krais Jiizas no muor. Di piipl we kom fram fi mi konchri,

⁴ di Izrel piipl, a dem Gad did pik fi bi im pikni. Gad shuo dem ou big, brait an powaful im bi an a dem Gad mek nof diil wid — im pramis fi gi dem nof sitn ef dem du wa im se. Gad mek nof pramis tu dem, an im gi dem di Laa. Gad aal shuo dem ou fi riili worship im.

⁵ Di Izrel piipl, dem a di pikni fi di uol taim liida dem — di liida dem we Gad did pik an we a did di ed fi di difrant difrant chraib dem. A fi dem fambili Krais Jiizas kom fram. Mek evribadi priez Gad, Gad we ruul uova evriting, fi eva an eva. Iemen!

⁶ Mi naa se Gad brok im pramis dem — Gad du evriting we im pramis fi du, bot a no evribadi we baan iina Izrel a riili Gad piipl.

⁷ Siem laik ou a no evribadi we kom fram Iebriyam fambili a riili Gad piipl. Gad did tel Iebriyam se, “Mi onggl a kount Aizak pikni dem an fi dem pikni pikni go dong, a dem a-go bi fi mi piipl.”

⁸ Dat miin se a no evribadi we baan iina Iebriyam fambili Gad tek fi im pikni. Gad did pramis Iebriyam se im wuda av wan pikni. Da pikni de a Aizak, so a onggl di piipl we kom fram Aizak fambili Gad tek fi fi im piipl.

⁹ Kaaz wen Gad did mek di pramis tu Iebriyam im did se, “Bout da taim ya neks ier, mi wi kom bak an Siera wi av wan bwai pikni.”

¹⁰ An a no jos dat, memba wa apm tu Ribeka tuu bwai pikni dem. Di tuu a dem a did Aizak pikni — Aizak fi wi faada faada go bak.

¹¹ Bifuo Aizak bwai pikni dem did baan, bifuo eni a dem kuda du notn gud ar bad, Gad pik wan fi ruul uova di ada wan. Gad pik im bifuo im baan fi shuo se a no notn we im did du mek Gad pik im — Gad pik uu im waahn fi pik fi du we im waahn im fi du.

¹² So bifuo di bwai pikni dem did baan, Gad se tu Ribeka se “Di bwai pikni we uolda, im a-go sorv di yongga wan.”

¹³ It aal rait dong iina Gad wod se Gad se, “Mi did pik Jiekob, mi neva pik Iisaa.”

¹⁴ So den wa unu tingk bout dat? Unu tingk wi kyan se dat Gad no fier? Nuo Sa! Notn kyaahn go so!

¹⁵ Gad tel Muoziz se, “Mi wi gud an kain tu uu mi waahn fi gud an kain tu, an mi wi tek piti pan uu mi waahn fi tek piti pan.”

¹⁶ So den Gad no pik piipl bies pan wa dem waahn ar pan we dem du; Gad pik piipl bies pan uu im waahn fi gud an kain tu.

¹⁷ Iina Gad wod it rait dong se Gad se tu Fiero se, “Dis a wai mi mek yu ton king: mi mek yu ton king so dat mi kuda yuuz yu fi shuo piipl ou powaful mi bi an so dat piipl aal uova di worl wuda nuo bout mi.”

¹⁸ So den Gad gud an kain tu uu im waahn fi gud an kain tu an ef im waahn fi mek sumadi ton dem aat gens im, im wi mek dem ton dem aat gens im.

¹⁹ So wan a unu a-go aks mi se, “Ef a so Gad du tingz, ou im fi bliem wi wen wi du rang? Uu kyan du notn bot wa Gad waahn dem fi du?”

²⁰ So wiet, a uu unu tingk unu bi? Unu we a jos man, wa mek unu tingk se unu kyan chat bak tu Gad? “Di klie pat kyan ton roun an aks di sumadi we mek it, ‘Wa mek yu mek mi so?’ ”

²¹ Di sumadi we a mek di pat, im no av di rait fi tek piis a klie an mek wan speshal pat we im yuuz sortn an sortn taim, an den tek wan neda piis a klie an mek wan pat fi yuuz evridie?

²² Gad did waahn fi shuo piipl se im beks, im did waahn dem fi nuo umoch powa im av. Bot im tek taim wid dem an put op wid di siem piipl we did a beks im; di piipl we im did redi fi waip out.

²³ Gad tek taim wid dem kaaz im did waahn fi shuo dem ou big, brait an powaful im bi. Im did waahn dem, di piipl we im gud an kain tu, fi si se dem a-go ton laik im. Im did waahn dem, di piipl we im pik an get redi fram lang taim, fi si se im a-go mek dem ton laik im.

²⁴ Wi a dem piipl de. Gad kaal wi, an a no jos piipl we a Juu im kaal, im kaal piipl we a no Juu tu.

²⁵ Iina di buk we Ozeya rait, it rait dong se Gad se: “Di piipl we neva bilang tu mi, mi a-go kaal dem ‘Fi mi piipl.’ An di piipl we kom fram difrant difrant konchri an we mi neva lov, mi a-go kaal dem ‘Mi lov.’

²⁶ An siem plies wich paat Gad se tu dem se, ‘Unu a no fi mi pikni’ a da siem plies de Gad, Gad we alaiv, a-go kaal dem im pikni.”

²⁷ An dis a wa Aizaiya did se bout Izrel: “Iivn duo di Izrel piipl nof laik di san we de a sii-said, a onggl likl bit a dem a-go get siev.

²⁸ Kaaz suun Gad a-go joj di uol worl; im a-go joj dem aad an it a-go apm faas.”

²⁹ A jos laik wa Aizaiya did se wie bak wen. Im se: “Ef di Laad we av aal a di powa, neva lou som a wi faada faada dem go bak, fi liv, wi wuda don fa. Wi wuda komiin laik Sadam an Gomara.”

³⁰ So den wa wi kyan se bout aal a dat? Wi kyan se dat di piipl we a no Juu, dem neva did a luk fi Gad put tingz rait wid dem, bot Gad mek tingz rait bitwiin im an dem kaaz dem chos iina im.

³¹ Bot Izrel, di piipl we Gad pik, dem di a luk fi wan laa we wuda put dem rait wid Gad. Bot dem neva fain it so dem neva get put rait wid im.

³² Ou kom? Ou kom dem neva fain it? Dem neva fain it kaaz dem di uop se di sitn dem we dem did a du wuda mek Gad put tingz rait wid dem. Dem did a du dat insted-a chos Gad fi siev dem. Dem chrip an faal dong. Dem chrip uova di stuon we de de fi kaaz piipl fi faal dong.

³³ A dat Gad wod did a taak bout. It rait dong se Gad se: “Lisn Gud! Mi a put wan stuon iina Zaiyan we a-go chrip piipl — wan stuon we a-go kaaz piipl fi faal dong. Bot di piipl we biliiv iina mi, mi naa go mek dem shiem.”