Read Jamaican Patois 1 Piita 10 Bible Online

1 Piita 10 - Jamaican Patois bible

1 Piita 10

¹ Breda an sista mi waahn unu fi memba se fi wi faada an fi dem faada faada go bak, di kloud did protek di uol a dem wen dem did a kraas di red sii.

² Wen dem waak anda da kloud de an kraas di sii, it komiin laik se dem did baptaiz an ton wan wid Muoziz, siek-a aal a wa dem go chuu.

³ Di uol a dem did nyam di siem fuud we Gad iina im powa gi dem fi nyam.

⁴ An di uol a dem did jringk di siem jringks we Gad iina im powa did gi dem fi jringk. Gad wok wan mirikl an mek waata kom outa rak, an a dat dem jringk. An di rak we di waata kom fram a did Krais Jiizas.

⁵ Bot iivn afta aal a dat, Gad neva api wid muos a dem. An so im kaaz dem fi ded an dem badi fi skyata skyata aal uova di dezot.

⁶ Nou aal dem sitn de apm so dat wi kuda si dem an lorn fram dem. Dem a waan wi fi no tan laik dem piipl de an waahn fi du bier wikid sitn.

⁷ Wi no fi du laik dem an worship no faalz gad. It rait dong iina Gad wod se, “Di piipl dem sidong fi nyam an jringk an den dem git op an staat daans.”

⁸ Wi no fi tek paat iina no kain-a seks sin laik dem. Kaaz a so mek twenti chrii touzn a dem ded aaf iina wan die.

⁹ Wi no fi stie laik dem an tes Krais Jiizas. Som a dem did tes Gad an siniek bait dem an kil dem.

¹⁰ Wi no fi komplien an grombl grombl laik som a dem. Kaaz di wan dem we yuus tu grombl grombl, di ienjel we kom fi kil, kil dem aaf.

¹¹ Aal a dem sitn de we apm tu dem a fi waan wi no fi liv laik dem. An it rait dong iina Gad wod fi waan aal a wi we a liv iina da taim ya wen di worl suun don.

¹² So ef yu tingk se yu a tan op chrang, yu beta wach yuself so dat yu no jrap dong.

¹³ Di siem sin dem we unu a chogl wid, evribadi els a chogl wid dem tu. Bot Gad gud, im naa go mek yu fies no sin an no gi yu wan wie fi diil wid it — im naa go gi yu muor dan yu kyan manij.

¹⁴ So mi gud gud fren, no worship no faalz Gad — ron we fram dem sitn de.

¹⁵ Mi a taak tu unu laik piipl we av sens, so joj wa mi a se fi yuself.

¹⁶ Di kop we wi yuuz wen wi av Laad sopa an we wi gi Gad tangks fa: wen wi jringk fram it wi naa tek paat iina wa Jiizas Krais did du fi wi wen im blod bliid out pan di kraas? An wen wi brok di bred a no tek wi a tek paat iina im badi tu?

¹⁷ So a onggl wan bred de bout an aal a wi ton wan badi wen di uol a wi iit da bred de.

¹⁸ Luk pan di Juu dem: wen dem a bon sakrifais gi Gad, di wan dem we a gi op di sakrifais dem nyam som a di fuud tu. An wen dem nyam it, a no shuo dem a shuo se dem an Gad a wan?

¹⁹ Wa unu tingk mi a chrai fi se? Unu tingk se mi a se dat di fuud we dem bon gi sakrifais tu di faalz gad dem wot notn? Ar se di faalz gad dem we dem a gi di sakrifais tu a riil sopm?

²⁰ Nuo! Wa mi a se a dat di piipl dem we no biliiv iina Gad bon sakrifais gi diiman, dem naa bon it gi Gad. An ef yu go nyam da fuud de, a laik yu a se dat yu an di diiman dem a wan, an mi no waahn unu fi av notn fi du wid no diiman.

²¹ Yu kyaahn a jringk fram di Laad kop an a jringk fram diiman kop tu. An yu kyaahn a nyam a di Laad tiebl an den go nyam a di diiman tiebl.

²² A mad unu a chrai fi mek Gad mad? Unu tingk se unu chrangga dan im?

²³ Som piipl se, “Mi kyan du eniting wa mi waahn fi du,” bot a no evriting gud fi yu. Dem se, “Mi kyan du eniting wa mi waahn fi du,” bot a no evriting a-go elp yu fi gruo.

²⁴ Nobadi fi a luk out fi demself wan, dem fi a luk out fi dem nieba dem tu.

²⁵ Yu kyan nyam di miit we dem sel iina di maakit an no afi wori ef it rait ar rang

²⁶ kaaz “Di uol worl an evriting we de iina it bilang tu Gad.”

²⁷ Ef sumadi we no biliiv iina Gad invait yu a dem yaad fi iit dina, an yu waahn go, gwaan an nyam di fuud we dem gi yu. No bada wori bout ef da fuud de rait ar rang fi yu iit.

²⁸ Bot ef sumadi se tu yu se, “Kom iit som a di fuud we wi yuuz fi bon sakrifais gi di faalz Gad dem,” no nyam dat. No iit it kaaz di man we tel yu bout di fuud an piipl we no biliiv iina Gad wi si yu a iit it an tingk se yu a du sopm rang.

²⁹ So wail fi yu kanchens naa bada yu, no nyam it kaaz it wi kaaz ada piipl fi av prablem. Nou yu mait-a aks wai mi no fi iit wa mi waahn jos chuu ada piipl a-go av prablem wid it?

³⁰ Ef mi prie an gi Gad tangks fi di fuud, it no aarait den fi mi iit it? Dem shudn av no prablem wid it ef mi du dat.

³¹ Wel, di chuut a weda yu a iit fuud ar jringk jringks — evriting we yu du, yu fi du it iina wan wie we wi kaaz piipl fi priez Gad.

³² No du notn we a-go kaaz di Juu dem, di piipl we a no Juu ar Gad choch fi sin.

³³ Unu fi du laik mi. Mi chrai fi du tingz we wi kaaz evribadi fi api. Mi no du tingz fi elp miself wan bot mi du tingz we wi elp evribadi. Mi du dat so dat evribadi kyan get siev.