Read Jamaican Patois 1 Piita 11 Bible Online

1 Piita 11 - Jamaican Patois bible

1 Piita 11

¹ Unu mos fala mi, an du wa mi du. Jos laik ou mi fala Krais Jiizas, an du we im du.

² Mi afi big unu op kaaz unu a du gud. Unu eva memba di sitn dem we mi did tiich unu an unu aalwiez a fala dem. Unu fala dem jos laik ou mi did se.

³ Bot mi waahn unu fi andastan se Krais, im a di ed fi evri man, evri ozban a di ed fi im waif, an Gad a di ed fi Krais.

⁴ Dat miin se ef wan man a prie ar a pred Gad mesij tu di piipl wid im ed kova op, a disrispek im a disrispek di wan we a di ed.

⁵ Bot eni uman we prie an pred Gad mesij tu piipl an no kova op ar ed, a shiem shi a bring dong shiem pan ar ozban. Siem laik ou a shiem wan uman wuda a shiem arself ef shi kot aaf aal a ar ier.

⁶ So ef wan uman se shi naa go kova op ar ed, shi shuda jos go kot aaf ar ier. Bot sins a shiem fi wan uman kot ar ier shaat ar kot aaf aal a it, shi fi kova op ar ed.

⁷ Man no niid fi kova im ed kaaz Gad mek man fi bi laik im an man shuo ou Gad griet. Bot uman, uman shuo ou man griet.

⁸ Kaaz wen Gad did a mek man im neva tek notn fram di uman fi mek im. Bot im tek paat a di man fi mek uman.

⁹ Man neva mek fi uman niida, bot uman did mek fi man.

¹⁰ A siek-a dat an siek-a di ienjel dem dat uman mos av ar ed kova op. Shi fi av ar ed kova op fi shuo se ar ozban av ruul uova ar.

¹¹ Dat no miin se man kyan du widout uman ar uman widout man, kaaz Gad neva mek dem fi du widout dem wan aneda.

¹² Memba se wen Gad did a mek uman im yuuz paat a di man fi du it, an nou fi man baan im niid wan uman. So evriting kom fram Gad.

¹³ Tingk bout dis an ansa da kwestiyan ya fi unuself: It rait fi wan uman prie tu Gad an no kova op ar ed?

¹⁴ It naamal fi wan man gruo im ier lang? A no shiem im a shiem imself?

¹⁵ Bot ef wan uman av taal ier, a no api shi fi wel api se shi av it? Kaaz a Gad gi ar da ier de fi ak laik wan kova fi ar ed.

¹⁶ Bot ef enibadi tingk se mi rang wen mi se dem tingz ya, a wan ting mi av fi se tu unu — mi an di res a Gad choch no tingk se eniting els rait.

¹⁷ Nou wen it kom tu di ruul dem we mi bout fi gi unu, mi kyaahn se unu a du gud, kaaz wen unu gyada fi choch unu du muor bad dan gud.

¹⁸ Fos ting fos, mi ier se wen unu gyada tugeda fi av choch unu plit op iina gruup an aagyu wid unu wan aneda. A dat piipl a tel mi an mi biliiv se som a wa dem a se a chuu sopm.

¹⁹ Mi no fraitn fi ier se unu plit op iina gruup kaaz a so wi a-go nuo uu Gad riili api wid.

²⁰ Wen unu gyada tugeda, a no riili di Laad sopa unu a iit.

²¹ Kaaz wen a taim fi iit, evribadi iit wen dem fiil laik, dem no wiet pan nobadi. Som piipl no get no fuud so dem onggri, wail ada piipl jringk til dem jongk.

²² Wa apm? Unu no av yaad wich paat unu kyan nyam an jringk? Ar a shuo unu a chrai shuo se unu iet Gad choch wen unu shiem di piipl dem we no av notn? Wa mi fi se tu unu? Unu waahn mi tel unu ou unu gud? Mi kyaahn tel unu se unu a du gud wen unu du dem tingz ya.

²³ Di siem ting we di Laad did tiich mi a di siem ting we mi tiich unu: pan di nait Juudas sel out Jiizas, Jiizas tek di bred,

²⁴ an wen im gi tangks fi it, im brok it an se, “Dis a mi badi we mi gi op fi unu. Iit da breda ya an memba mi.”

²⁵ Jos laik ou im tek di bred, wen dem don iit im tek op di kop an se, “Dis a mi blod an it a di nyuu pramis we Gad mek tu unu. Evritaim unu jringk wain fram da kop ya, unu fi memba mi.”

²⁶ Kaaz til di Laad kom bak, evritaim unu iit di bred an jringk fram di kop, unu a tel di piipl dem se Jiizas did ded.

²⁷ So enibadi we iit di bred ar jringk fram di kop iina wan wie we disrispek di Laad, da sumadi de, dem a sin gens di Laad badi an im blod.

²⁸ Bifuo dem nyam di bred ar jringk fram di kop, evribadi mos luk pan demself an mek shuor se dem a tek paat fi di rait riizn.

²⁹ Kaaz ef sumadi iit di bred an jringk fram di kop an no rispek di fak se a di Laad badi, a jojment dem a bring dong pan demself.

³⁰ A so mek nof a unu wiik an sik an a so mek som piipl ded.

³¹ Ef wi did a luk pan wiself an riili a tingk bout wa wi a du wen wi nyam di Laad sopa, Gad wudn ponish wi so.

³² Bot wen Gad ponish wi a tiich im a chrai fi tiich wi. Im waahn wi lorn wa rait so dat wen im kom bak fi joj di worl, wi naa go ded laik di piipl we no biliiv iina im.

³³ So mi breda an sista wen unu gyada tugeda fi tek Laad sopa, unu fi wiet pan unu wan aneda.

³⁴ Ef sumadi onggri mek dem nyam a dem yaad, so dat wen unu gyada tugeda unu no bring dong jojment pan unuself. Wen mi kom, mi wi gi unu som muor ruul bout som ada tingz we mi waahn unu fi fala.