Read Jamaican Patois 1 Piita 12 Bible Online

1 Piita 12 - Jamaican Patois bible

1 Piita 12

¹ Nou breda an sista, mi waahn unu fi andastan evriting bout di gif dem we di Uoli Spirit gi.

² Unu nuo se bifuo unu di staat biliiv iina Gad, sopm did jraa unu we an mek unu a fala aal kain-a faalz gad we kudn iivn taak.

³ So mi waahn unu fi andastan se nobadi we av Gad Spirit a liid dem kyan se dat, “Gad joj Jiizas an se im fi ded.” An sumadi kyan onggl se, “Jiizas a Laad” ef dem av di Uoli Spirit a liv iina dem.

⁴ A nof difrant sitn di Uoli Spirit mek wi kyan du bot wi fi memba se a di siem Spirit mek wi kyan du aal a dem.

⁵ An wi av nof difrant wie fi sorv di Laad bot a di siem Laad di uol a wi a sorv.

⁶ Wen wi a sorv Gad, evri wan a wi av di powa fi du sopm bot a di siem Gad gi di uol a wi di powa fi du it.

⁷ Gad gi evribadi sopm fi shuo se di Uoli Spirit riil an im du dat fi wi uon gud an fi di gud a evribadi.

⁸ Gad Spirit mek som piipl kyan taak tingz we waiz, an ada piipl, Gad Spirit mek dem se tingz we ful op a wa Gad waahn piipl fi nuo.

⁹ Gad Spirit mek som piipl kyan biliiv iina Gad nof nof, an ada piipl, di Spirit gi dem di powa fi mek sik piipl get beta.

¹⁰ Som piipl, Gad Spirit mek dem kyan wok mirikl. Wan neda set a piipl, di Spirit mek dem kyan priich Gad mesij. Ada piipl di Spirit gi dem di powa fi nuo ef a Gad Spirit a mek som piipl kyan du sortn tingz ar ef a som ada spirit a mek dem du it. Di Spirit aal mek som piipl kyan taak iina tongz an a di siem Spirit kaaz ada piipl fi andastan dem.

¹¹ Di powa fi du aal a dem sitn de kom fram di siem Spirit an im gi da powa de tu enibadi im waahn gi it tu.

¹² Jos laik ou di badi av nof difrant paat, an yu niid aal a dem paat de fi mek op di badi, a siem so Krais Jiizas tan.

¹³ Wen wi did get baptaiz, Gad gi aal a wi im Spirit an so di uol a wi a wan. It no mata ef yu a Juu ar yu a no Juu, ef yu a sliev ar yu frii, Gad gi aal a wi di siem Spirit.

¹⁴ Nou wi badi, it no mek op a jos wan paat. A nof difrant paat mek op di badi.

¹⁵ So ef di fut paat get op an se, “Mi a no di an so mi a no paat a di badi,” notn kyaahn go so, im a stil paat a di badi.

¹⁶ An ef di iez se, “Mi a no paat a di badi kaaz mi a no di yai,” it rang, it a stil paat a di badi.

¹⁷ Ef a did yai wan mek op di badi, a wa wi wuda yuuz fi ier? Ef di badi did mek op a iez wan, a wa wi wuda yuuz fi sumel?

¹⁸ Aal a di paat dem iina di badi, evri wan a dem, Gad put dem de. Im put dem wich paat im waahn dem an im put dem de fi du wa im waahn dem fi du.

¹⁹ A no wan badi ef a onggl wan paat de de. Ou yu fi av wan badi ef a onggl wan paat yu av?

²⁰ So iivn duo yu av nof difrant paat iina di badi, aal a dem kom tugeda fi mek wan badi.

²¹ So den di yai kyaahn go tel di an se, “Mi no niid yu,” siem laik ou di ed kyaahn go tel di fut se, “Mi no niid yu.”

²² Az a mata a fak, di paat dem we unu tingk se unu kuda du widout kaaz unu fiil se dem wiik, a dem de paat de unu kyaahn du widout.

²³ An a di paat dem we wi no tingk wot nof, dem a di wan we wi mek shuor wi tek kier a. An di paat dem we wi no tingk luk gud, wi mek shuor se wi kova dem op gud gud.

²⁴ Wi no niid fi du dat fi di paat dem we wi fiil luk gud. Bot Gad put aal a di paat dem tugeda iina di badi an im mek it iina wan wie we mek wi tek gud gud kier a di paat dem we wi no tingk riili impuotant.

²⁵ Im mek it da wie de so dat di difrant difrant paat dem iina di badi wi wok tugeda an fi mek shuor se dem tek kier a dem wan aneda.

²⁶ Ef wan paat a di badi a sofa, di uol badi a sofa tu. Ef wan paat a di badi fiil gud den di uol badi fiil gud.

²⁷ Nou unu mek op Jiizas Krais badi, evri wan a unu a paat a im badi.

²⁸ Evribadi av wan plies iina Gad choch. A di tap tap pozishan yu av di apasl dem. Afta dat yu av di prafit dem, den di tiicha dem, di piipl dem we wok mirikl an piipl we mek sik piipl get beta. Afta dem de piipl de, yu av di piipl dem we lov fi elp ada piipl, den di wan dem we elp fi kip di choch iina aada an afta dem yu av di piipl we taak iina tongz.

²⁹ A evribadi a apasl? An a evribadi a prafit? Evribadi a tiicha? An a evribadi kyan wok mirikl?

³⁰ An a evribadi kyan mek piipl beta? A evribadi kyan taak iina tongz? An a evribadi kyan andastan di piipl dem wen dem taak iina tongz?

³¹ So unu fi set unu aat pan di muor impuotant gif dem. An nou mi a go shuo unu wan wie we beta.