Read Jamaican Patois 1 Piita 13 Bible Online

1 Piita 13 - Jamaican Patois bible

1 Piita 13

¹ Ef mi kuda taak aal a di langwij dem iina di worl, aal taak di langwij wa di ienjel dem yuuz bot no av lov iina mi aat, mi komiin laik wan bel ar wan metal pan we jos a mek naiz.

² Ef mi kuda kyari mesij chriet fram Gad, an nuo bout aal a di tingz we Gad kip fram mi an nuo bout evriting we de fi nuo bout, an mi so chrang iina wa mi biliiv dat mi kyan muuv mountn bot mi no av lov iina mi aat, mi a no notn.

³ An ef mi gi we evriting we mi av, an aal gi op mi badi so dat dem kyan bon it op, ef mi du aal a dat bot no av lov iina mi aat, it naa du mi no gud.

⁴ Wen sumadi av lov iina dem aat, dem kain tu piipl an dem tek taim wid dem. Dem no red yai ar gwaan buosi-buosi. Piipl we av lov iina dem aat no lov fi shuo aaf.

⁵ Dem no disrispek ada piipl an dem no du tingz fi elp demself wan. Piipl we av lov iina dem aat no iizi fi get beks an dem no av op piipl iina dem aat.

⁶ Dem no api wen dem si wikidnis a gwaan, bot dem wi api wen dem ier di chuut.

⁷ Piipl we av lov iina dem aat neva eva gi op no mata wa apm tu dem an dem neva tap biliiv iina Gad. Piipl we av lov iina dem aat chos Gad fi tek kier a dem an dem wi go chuu eniting we riich dem an no fos ar komplien.

⁸ Chuu lov neva eva tap — it kyaahn ded. Bot wan die di piipl dem we kyari mesij chriet fram Gad, a-go tap kyari mesij. An di piipl dem we taak iina tongz, wan die dem a-go tap taak iina tongz. An di piipl we kyan andastan di tingz dem we Gad shuo wi, wan die dem a-go tap tu.

⁹ Kaaz Gad no shuo wi evriting an wi no nuo evriting we im nuo. So di gif dem we di Uoli Spirit gi wi a jos fi wan taim,

¹⁰ wen Jiizas Krais kom bak an evriting don wid, wi naa go niid dem gif de agen.

¹¹ Wen mi a did pikni, mi taak laik mi a pikni an mi tingk an gwaan laik ou pikni fi gwaan. Bot wen mi ton man mi tap gwaan laik pikni.

¹² Kaaz jos laik ou wen wi luk pan wiself iina wan shain piis a metal, wi kyaahn mek out evriting, a siem so wi tan nou. Wi nuo som tingz bot wi no nuo evriting. Bot wan die wi a-go si Gad fies tu fies an den wi wi nuo an andastan evriting we de de fi nuo bout Gad. Jos laik ou Gad nuo evriting bout wi.

¹³ So nou a chrii tingz lef we wi fi gwaan du: chos iina Gad, gwaan biliiv se im a-go gi wi wa im se im a-go gi wi an fi lov wi wan aneda. Outa aal a dem di muos impuotant wan a lov.