Read Jamaican Patois 1 Piita 14 Bible Online

1 Piita 14 - Jamaican Patois bible

1 Piita 14

¹ So muo dan eniting els, unu fi waahn fi lov ada piipl, bot unu fi wel waahn di gif dem we di Uoli Spirit gi tu. An di gif we unu fi waahn di muos a di wan we lou unu fi kyari mesij chriet fram Gad.

² Kaaz di wan dem we taak iina tongz, dem naa taak tu piipl dem a taak tu Gad; nobadi kyan andastan dem. Di Uoli Spirit gi dem di powa fi taak bout tingz we nobadi no nuo ar andastan.

³ Bot di wan dem we di Spirit lou fi kyari mesij fram Gad, dem a taak fi piipl andastan. Di mesij we dem kyari elp piipl fi get chrang iina wa dem biliiv, push dem fi gwaan biliiv an elp dem wen dem sad.

⁴ Di piipl we taak iina tongz onggl a bil op demself bot di piipl we kyari mesij fram Gad a elp fi bil op di choch.

⁵ Nou mi waahn aal a unu fi kyan taak iina tongz bot muo dan dat mi waahn unu fi kyan kyari mesij fram Gad kom tel di piipl dem. Kaaz di wan dem we kyari mesij fram Gad muo impuotant dan di wan dem we taak iina tongz, ef wen dem taak iina tongz dem kyaahn tel wi wa it miin.

⁶ Nou breda an sista, ef mi kom tu unu an a taak iina tongz ou mi fi elp unu ef unu kyaahn andastan wa mi a se? Ou mi fi elp unu ef mi naa kom tel unu bout sopm we Gad shuo mi ar mek mi andastan wen mi a riid im Wod? Ou mi fi elp unu ef a no wan mesij fram Gad mi a kom tel unu ar a no tiich mi a tiich unu sopm fram Gad wod?

⁷ Ef sumadi a plie wan fluut ar wan aap an a onggl wan soun it kyan mek, ou di piipl dem we a lisn fi nuo wich sang im a plie?

⁸ An di aan we dem yuuz a waar taim, ef wen sumadi bluo it, it no soun klier, wich wan a di suoja dem a-go redi fi fait?

⁹ A di siem ting apm wen unu taak iina tongz! Ef unu no taak so dat piipl kyan andastan unu, ou dem fi nuo wa yu a chrai se?

¹⁰ A nof difrant langwij de iina di worl an iina evri wan a dem, di wod dem miin sopm, so piipl kyan andastan dem.

¹¹ Ef sumadi a taak wan langwij we mi no andastan mi a-go tingk se dem kom fram wan neda konchri. An dem a-go tingk se mi kom fram wan difrant konchri tu.

¹² So sins unu a chrai aad fi get di gif dem we di Uoli Spirit gi, muo dan eniting els unu fi chrai fi get di wan dem we wi elp fi bil op di choch.

¹³ So di piipl dem we a taak iina tongz shuda prie an aks Gad fi mek dem andastan wa dem a se.

¹⁴ Kaaz ef mi a prie iina tongz, a mi spirit a prie. Mi main naa tek paat, it no andastan notn we di Spirit a se.

¹⁵ So wa mi fi du den? Wa mi fi du a mek mi spirit prie bot prie wid mi ed tu an tingk bout wa mi a se. An wen mi a sing priez tu Gad, mi wi sing wid mi spirit an sing wid mi main tu an tingk bout wa mi a sing se.

¹⁶ Kaaz ef yu spirit a prie an sumadi we no taak iina tongz a lisn, ou dem fi se ‘Iemen’ wen dem no nuo we yu a se?

¹⁷ Yu kuda a tangk Gad iina wan nais nais wie bot chuu dem kyaahn andastan, yu wudn a elp dem.

¹⁸ Mi tangk Gad se mi taak iina tongz muo dan unu.

¹⁹ Bot wen choch a kip mi wuda prefa fi se faiv wod we piipl kyan andastan an lorn fram dan fi go se ten touzn wod iina tongz.

²⁰ Breda an sista no tingk laik se unu a pikni, unu fi tingk laik se unu a big piipl. Onggl gwaan laik pikni wen it kom tu wikidnis kaaz pikni no du no iip a wikid sitn.

²¹ It rait dong iina Gad wod dat di Laad se: “Mi a-go sen piipl we taak aal kain-a chrienj langwij an we kom fram nof difrant konchri fi taak tu dem piipl ya, an dem stil naa go lisn tu mi iivn afta mi du aal a dat.”

²² So den di piipl we taak iina tongz, dem a wan sain fi di piipl dem we no biliiv iina Gad, dem a no fi piipl we biliiv. Bot di piipl dem we kyari mesij fram Gad, dem a fi di piipl we biliiv iina Gad, no fi di wan dem we no biliiv.

²³ Nou se di uol a unu gyada fi choch an evribadi iina di choch a taak iina tongz, wa apm wen sumadi we no biliiv iina Gad ar sumadi we no nuo bout Gad kom iina di choch an ier unu? Dem naa go se di uol a unu mad?

²⁴ Bot ef sumadi we no biliiv ar sumadi we no nuo Gad kom iina di choch an evribadi iina di choch a kyari mesij fram Gad, wen dem ier wa unu a se dem a-go nuo di chuut an si se dem a sina. Dem wi si se dem a sin an waahn fi chienj dem wiez.

²⁵ Gad mesij a-go kaaz aal a di sitn dem we dem did aid op iina dem aat fi kom out iina di uopm, an dem a-go go dong pan dem nii, put dem fies a grong an staat worship Gad. Dem a-go se, “Gad riili de mongks unu.”

²⁶ So mi breda an sista, a wa unu fi du den? Mi a-go tel unu! Wen unu gyada tugeda fi av choch, evriting we unu du, unu fi du it so dat unu wi elp evribadi. A so it fi tan wen sumadi a sing wan sang ar a tiich, ar a kyari mesij fram Gad. A so it go wen sumadi a taak iina tongz ar wen sumadi a tel unu we di piipl we a taak iina tongz a se.

²⁷ Ef unu a-go av piipl we a taak iina tongz, a tuu unu fi av ar di muos chrii, no muo dan dat. Di uol a dem no fi taak wan taim niida, dem fi go wan wan. An ef dem a-go taak iina tongz sumadi afi de de we a-go tel di piipl dem wa dem a se.

²⁸ Bot ef nobadi no de de fi tel di piipl dem wa dem miin, unu fi tap di piipl dem we a taak iina tongz fram taak out loud, mek dem taak tu Gad wan.

²⁹ Wen unu a kip choch, unu fi mek tuu ar chrii a di piipl dem we kyari mesij fram Gad taak. An di res a piipl iina di choch fi lisn an tingk bout we dem se, an joj fi demself ef wa dem a ier a chuu sopm.

³⁰ Ef sumadi a taak tu di choch, an Gad shuo sumadi els we sidong iina choch sopm nyuu, we nobadi neva nuo bout bifuo, di wan we a taak fi tap an mek di ada wan tel di piipl wa Gad shuo im.

³¹ Kaaz aal a unu kyan kyari mesij fram Gad, bot aal a unu kyaahn a taak wan taim, unu afi go wan wan. Da wie de evribadi wi lorn an unu wi elp evribadi fi tan op chrang iina wa dem biliiv.

³² Di wan dem we kyari mesij chriet fram Gad kyan kanchuol di gif we di Uoli Spirit gi dem.

³³ Kaaz Gad no diil wid kanfyuuzhan, im waahn im choch fi ron sortn an sortn wie. An im waahn aal a di choch dem fi ron so.

³⁴ Di uman dem no fi taak wen choch a kip, an dem no fi inchaaj niida, a so di Laa se.

³⁵ Ef dem av sopm we dem waahn aks bout, mek dem aks dem ozban wen dem go a dem yaad. Kaaz ef wan uman taak wail choch a kip a shiem shi a shiem arself.

³⁶ Wa! Unu tingk se Gad wod staat wid unu ar se a unu wan it kom fa?

³⁷ Ef enibadi se dem a wan a di piipl we kyari mesij chriet fram Gad ar dat dem av wan a di gif dem we di Uoli Spirit gi, dem fi si se wa mi a rait iina da leta ya, a di siem ting we Gad se wi fi du.

³⁸ Bot ef dem no si se wa mi a rait a we Gad se wi fi du, no pie dem no main.

³⁹ So mi breda an sista, unu fi wel waahn di Uoli Spirit gi unu di gif we wi mek unu kyan kyari mesij chriet fram Gad. An unu no fi tel nobadi se dem no fi taak iina tongz,

⁴⁰ bot mek shuor se unu du evriting iina di prapa wie jos laik ou Gad se it fi go.