Read Jamaican Patois 1 Piita 15 Bible Online

1 Piita 15 - Jamaican Patois bible

1 Piita 15

¹ Nou mi breda an sista mi waahn fi elp unu memba di mesij bout Jiizas Krais we mi did priich tu unu. A da sed mesij de we unu a kip iina unu aat an we evriting we unu biliiv bies pan.

² A da mesij ya we wi siev unu ef unu uol aan pan it chrang an kip it iina unu aat. Bot ef unu tap biliiv, di biliiv we unu yuus tu biliiv iina Krais a did fi notn.

³ Kaaz mi tel unu di muos impuotant paat a di mesij siem laik ou Gad tel mi. Mi tel unu se Jiizas Krais kom an ded fi wi an siev wi fram wi sin dem jos laik ou Gad wod did se im wuda du it

⁴ Mi tel unu se dem beri im an wen chrii die paas im kom bak alaiv, jos laik ou Gad wod se im wuda kom bak.

⁵ An wen im kom bak alaiv im go an mek Siifas si im an den im twelv falara dem si im.

⁶ Afta dat uol a faiv onjrid a wi breda an sista dem si im wan taim tu. Som a dem breda an sista de ded bot muos a dem stil alaiv.

⁷ Afta dem piipl de si im, im go shuo imself tu Jiemz an afta Jiemz im mek di uol a im apasl dem si im.

⁸ Mi a di laas sumadi fi si im an im mek mi si im iivn duo mi komiin laik sumadi we baan di rang taim.

⁹ Kaaz di res a apasl dem beta dan mi. Mi no gud inof fi dem iivn kaal mi wan apasl kaaz mi yuus tu mek Gad piipl sofa bad bad an mi aal did kil aaf som a dem.

¹⁰ Bot a chuu Gad gud an kain tu mi mek mi kyan du wa mi a du nou, an aal we im du fi mi, a no fi notn. Mi wok aada dan aal a di ada apasl dem. Bot mi neva du it pan mi uon, Gad elp mi fi du it, kaaz im gud an kain tu mi.

¹¹ So it no mata ef a mi ar a dem did priich. Aal a wi priich di siem sitn an aal a unu biliiv di siem sitn.

¹² Nou ef wi a priich se Krais Jiizas kom bak alaiv, ou som a unu kyan a se dat nobadi kyaahn kom bak alaiv?

¹³ Bot ef nobadi kyaahn kom bak alaiv, den Krais Jiizas kudn kom bak alaiv niida.

¹⁴ An ef Jiizas Krais neva kom bak alaiv, den wi a priich fi notn an wa unu biliiv no mek no sens an no wot notn niida.

¹⁵ An ef a chuu se nobadi kyaahn kom bak alaiv afta dem ded den wi a tel lai pan Gad tu wen wi tel piipl se im mek Jiizas Krais kom bak alaiv.

¹⁶ Kaaz ef nobadi kyaahn kom bak alaiv, den Gad neva mek Jiizas kom bak alaiv niida.

¹⁷ Ef Krais Jiizas neva kom bak alaiv den wa unu biliiv naa no yuus, an unu neva get siev niida. Gad stil a-go ponish unu fi unu sin.

¹⁸ Wos di piipl dem we biliiv iina Jiizas Krais an we ded aredi, dem gaan fi gud — Gad a ponish dem fi dem sin.

¹⁹ So ef wi kyan onggl chos Krais Jiizas fi siev wi iina da laif ya an no di neks wan, den muo dan enibadi els, a wi piipl shuda a sari fa.

²⁰ Bot di chuut a dat Jiizas Krais did kom bak alaiv. An im mek wi nuo fi shuor se Gad a-go mek ada piipl we ded an we biliiv iina im kom bak alaiv tu.

²¹ Kaaz jos laik ou piipl ded siek-a wa wan man did du a siem so piipl a-go kom bak alaiv siek-a wa wan neda man did du.

²² Piipl afi ded siek-a wa Adam did du, bot piipl we biliiv iina Gad a-go kom bak alaiv siek-a wa Jiizas Krais did du.

²³ Bot evribadi naa go kom bak alaiv siem taim, evribadi av dem uona taim. Gad mek Jiizas Krais kom bak alaiv fos, an wen Jiizas Krais kom bak agen, di piipl we biliiv iina im an we ded, dem a-go kom bak alaiv tu.

²⁴ An di worl a-go don wen Jiizas gi Faada Gad im kindom. Bot Jiizas naa go gi Gad di kindom til im tek kanchuol uova aal a di wikid spirit dem an tek we dem powa so dat dem kyaahn du notn agen.

²⁵ Kaaz Jiizas afi ruul uova di kindom, til im put di uol a im enimi dem anda im fut.

²⁶ An di laas enimi we im a-go get rid a, a det.

²⁷ Kaaz iina Gad wod it se, “Im put evriting anda im fut — im ruul uova evriting.” Bot wen dem se “evriting,” dem naa taak bout Gad tu. A Gad mek Jiizas ruul uova evriting an put im enimi dem anda im fut.

²⁸ An wen Gad mek im Bwai Pikni ruul uova evriting, im a-go ruul uova im Bwai Pikni, da wie de Gad wi ruul uova evriting.

²⁹ Nou, wa bout di piipl dem we go get baptaiz fi di piipl dem we ded an neva get fi baptaiz bifuo dem ded? Ef nobadi kyaahn kom bak alaiv wa dem a get baptaiz fa?

³⁰ An ef wi kyaahn kom bak alaiv wen wi ded, wa mek wi a tiich Gad wod an a put wi laif iina siiros chobl evridie?

³¹ Mi breda an sista, evridie mi put miself iina siiros chobl — mi kyan ded enitaim. Mi kyan se dem sopm ya jos laik ou mi kyan buos an se gud sitn bout unu kaaz unu biliiv iina Gad nof nof an unu an Jiizas kluos kluos.

³² Ef nobadi kyaahn kom bak alaiv, wa gud it du mi ef mi fait wid di piipl dem rait ya-so iina Efisos, we a fait mi laik se dem a wail animal? Ef nobadi kyaahn kom bak alaiv, “Mek wi nyam an jringk, kaaz tumaro wi mait-a ded.”

³³ No mek dem fuul unu, “Ef yu kip fren wid wikid piipl, dem wi kaaz yu fi ton we fram we yu nuo rait, an mek yu du wikid sitn tu.”

³⁴ Unu fi wiek op, tek kanchuol a unuself an tap sin. Unu shuda shiem, kaaz som a unu no nuo Gad at aal.

³⁵ Bot som a unu a-go aks, “Ou ded piipl a-go kom bak alaiv? Wa kain-a badi dem a-go av?”

³⁶ Unu a fuul! Wen yu a plaant siid, it no afi ded an jrai out fos bifuo yu kyan plaant it.

³⁷ An wa yu plaant, a no so it a-go luk wen it gruo. Yu plaant suo-so siid, miebi wan wiit grien ar som ada kain-a siid, bot wen it gruo it no luk siem wie.

³⁸ Bot Gad mek evriting luk di wie im waahn it fi luk. Im mek aal di difrant difrant siid dem luk an shiep difrant fram dem wan aneda.

³⁹ Kaaz evriting kyaahn luk an shiep siem wie — animal badi difrant fram man badi, bod badi difrant fram fish badi.

⁴⁰ Di sitn dem we de a evn av wan kain-a badi an di sitn dem we de pan ort av wan neda kain-a badi. Dem badi difrant bot di tuu a dem priti iina dem uon wie.

⁴¹ Di son brait, di muun brait an iivn di staar dem brait, bot di chrii a dem no brait siem wie. Iivn wen yu luk pan di staar dem wan, aal a di staar dem no brait siem wie.

⁴² A so it a-go go wen Gad mek im piipl we ded kom bak alaiv. Di badi wa wi av nou, it kyan ded. An wen wi ded an dem beri wi, it a-go ratn. Bot wen Gad mek wi kom bak alaiv, di badi we wi a-go get, naa go kyan ded — it naa go ratn.

⁴³ Wen yu badi ded an beri, it ogli bad bad an it wiik bot wen Gad mek it kom bak alaiv it a-go wel priti an chrang chrang.

⁴⁴ Wen yu badi beri, it mek op a buon an blod, bot wen Gad mek it kom bak alaiv, it a-go bi wan spirit. Siem laik ou yu av wan badi we mek op a buon an blod, a siem so yu av wan badi we a spirit.

⁴⁵ It aal rait dong iina Gad wod se, “Di fos man, Adam, Gad did afi mek im — Gad did afi gi im laif.” Bot di laas Adam, im a-go bi wan spirit we kyan gi piipl laif.

⁴⁶ Di spirit badi neva kom fos, a di badi we mek outa flesh an blod kom fos. Afta da badi de, den di spirit badi kom.

⁴⁷ Di fos man, Gad tek dot mek fi im badi, bot di sekan man, fi im badi kom fram evn.

⁴⁸ Di piipl we liv pan ort, dem a laik di man we badi mek fram dot. An dem we liv iina evn, dem a-go bi laik di man we kom fram evn.

⁴⁹ An jos laik ou wi did av wan badi laik di man we mek outa dot, a siem so wan die wi a-go av wan badi laik di man we kom fram evn.

⁵⁰ Mi breda an sista, dis a wa mi a chrai fi se tu unu, notn we mek op a buon an blod kyan tek paat iina Gad kindom. An sitn we ded kyaahn liv fi eva a di siem taim, a dat mek di badi we wi av nou, a no di badi wi a-go av wen Gad mek wi kom bak alaiv.

⁵¹ Lisn an lisn gud kaaz mi a-go tel unu sitn we nobadi no nuo bout — a no aal a wi a-go ded bot Gad a-go chienj di uol a wi.

⁵² An wi a-go chienj faas tu, bifuo yu kyan kwint yu yai it apm. Wen dem bluo di laas aan, Gad wi mek di ded piipl dem kom bak alaiv an di badi we im a-go gi dem naa go kyan ded agen. An im a-go chienj di uol a wi.

⁵³ Kaaz di badi dem we wi av nou wi ded an ratn an so wi afi chienj dem an get wan badi we kyaahn ded. Di sitn dem we kyan ded afi go chienj an ton iina sitn we kyaahn ded.

⁵⁴ An wen dat apm, a dem taim de di sitn dem we rait dong iina Gad wod a-go apm tu. Mi a taak bout di paat we se, “Det luuz, it naa no powa uova wi.”

⁵⁵ “Ou yu fi se yu win iihn det? A wich paat yu powa de?”

⁵⁶ Sin a wa gi det di powa fi ort piipl an sin get fi it powa fram di laa.

⁵⁷ Bot tangk Gad kaaz a im sen wi Laad Jiizas Krais so dat wi kuda win an dat det kuda luuz.

⁵⁸ Mi breda an sista tan op chrang an no mek notn mek yu tap biliiv. Mek shuor se unu eva a du di Laad wok sins unu nuo se aal we unu du fi Gad — unu naa du fi notn.