Read Jamaican Patois 1 Piita 16 Bible Online

1 Piita 16 - Jamaican Patois bible

1 Piita 16

¹ Nou bout di moni we unu niid fi kalek op fi elp Gad piipl dem — di siem ting we mi tel di piipl dem a di choch iina Gyaliesha fi du, a di siem ting mi waahn unu fi du.

² Pan di fos die a evri wiik, unu mos pudong paat a di moni we unu mek. Unu fi pudong moni bies pan ou Gad bles unu. Da wie de unu wi av di moni pudong an wi no afi go kalek op notn wen mi riich de.

³ An wen mi riich de, mi wi sen uu eva unu pik fi kyari di moni we unu kalek, go a Jeruusilem. Mi wi sen dem wid leta so di piipl dem iina Jeruusilem wi nuo a uu dem bi.

⁴ An ef it mek sens fi mi go, dem kyan go wid mi.

⁵ Mi a-go go chuu Masiduoniya, so afta mi go chuu de-so, mi wi kom luk fi unu.

⁶ An mi mait-a stie wid unu fi a taim, laik di uol a winta. Mi wi tan wid unu, so wen a taim fi go wan neda plies — unu kyan elp mi fi go we eva mi afi go.

⁷ Kaaz mi no jos waahn paas chuu, mi waahn fi stie wid unu likl. So ef Gad wi lou mi, a dat mi wi du.

⁸ Bot mi wi tan a Efisos til di die a Pentikas,

⁹ kaaz mi av a gud chaans fi du som wok dong de we wi elp fi siev piipl, iivn duo nof piipl we fait gens mi dong de.

¹⁰ Nou ef Timoti kom tu unu, mek shuor se unu no du notn we wi kaaz im fi fried a unu. Tek im iin an chriit im gud, kaaz jos laik mi, im a du Gad wok.

¹¹ No mek nobadi luk dong pan im ar chriit im laik se im a notn. Unu mos elp im fi gwaan go wich paat im a-go iina piis, kaaz mi a luk fi im an di res a breda dem we a du Gad wok, fi kom bak tu mi.

¹² Nou bout wi breda Apalos, a nof taim mi push im an tel im fi kom si unu, bot im no fiil laik se a nou im fi kom. Bot wen im get di chaans, im wi kom.

¹³ Kip unu yai dem uopm, tan op chrang fi wa unu biliiv, no fried a notn an gwaan kip chrang.

¹⁴ Mek shuor se evriting we unu du, a siek-a di lov we de iina unu aat.

¹⁵ Nou breda an sista, unu nuo bout Stefanos an im fambili. Dem a did di fos set a piipl iina Akaiya fi biliiv iina Gad an get siev. An dem du aal we dem kyan du fi elp Gad piipl dem. So mi a beg unu

¹⁶ breda an sista fi fala wa dem piipl de se, an no jos we dem se bot wa enibadi we wok wid dem se tu.

¹⁷ Mi did api fi si Stefanos, Faachyunietos an Akaikos dem kom, kaaz wen dem de ya wid mi it komiin laik se a unu de ya.

¹⁸ An dem mek mi aat api siem laik ou dem mek fi unu aat api. So lisn gud tu wa piipl laik dem av fi se.

¹⁹ Di choch dem we iina Iezha sen oudi fi unu. Akwila, Priska an di uol a di piipl dem we gyada a dem yaad fi kip choch a sen oudi fi unu iina di Laad niem.

²⁰ Aal a di breda an sista dem sen oudi fi unu. Unu fi tel unu wan aneda oudi an du it wid lov iina unu aat.

²¹ Mi Paal a rait dong dem oudi ya wid mi uona an.

²² Ef sumadi no lov di Laad, mi uop se Gad wi joj im an sen im fi ded. Kom wi Laad Kom!

²³ Mi prie se di Laad Jiizas wi shuo unu lov iivn duo wi dizorv it an bles unu.

²⁴ Mi lov di uol a unu, an siek-a Jiizas Krais di uol a wi a wan.