Read Jamaican Patois 1 Piita 2 Bible Online

1 Piita 2 - Jamaican Patois bible

1 Piita 2

¹ Breda an sista, wen mi did kom priich Gad chuu mesij tu unu, we nobadi neva ier bifuo, mi neva yuuz no big wod ar chrai fi soun waiz.

² Kaaz mi did mek op mi main se wail mi did de de wid unu, mi wuda onggl priich bout Jiizas Krais an ou dem kil im pan di kraas.

³ Wen mi did kom tu unu, mi did wiik, an mi did fried so til mi did a chrimbl.

⁴ An wen mi did a tiich an a priich mi neva yuuz no fansi taak laik we di piipl dem we tingk dem waiz yuuz. Mi neva afi du dat fi mek unu biliiv kaaz Gad Spirit yuuz im powa fi shuo unu se aal a wa mi did a se a chuu sopm.

⁵ Mi priich da wie de so dat unu wudn biliiv jos kaaz piipl tingk se wa mi se waiz, bot kaaz unu si Gad powa fi unuself.

⁶ Nou iivn duo mi no yuuz no big fansi wod, di piipl dem we biliiv iina Gad nof nof, dem tingk se di mesij we mi priich waiz. It no waiz kaaz a sopm we som sumaat piipl tingk op. An it no waiz kaaz di ruula dem we de bout nou an we a-go luuz dem powa an ded, tingk se it waiz.

⁷ Nuo! mi no tiich we dem tingk waiz. Insted-a dat mi taak bout ou Gad, di onggl wan we riili waiz, did plan fi siev wi fram lang taim. Nobadi neva nuo bout da plan de bifuo kaaz im kip it fram wi. Bot lang bifuo im iivn mek di worl, Gad mek a plan fi siev wi — a so im waiz.

⁸ Non a di piipl dem we a ruul iina dem taim ya did andastan da plan de. Kaaz ef dem did andastan it dem wuda neva tek wi big an powaful Laad, an niel im op pan wan kraas kil im.

⁹ Bot it rait dong se: “No yai no si, no iez no ier, aal a di sitn dem we Gad pudong fi di piipl we lov im. Nobadi kudn iivn tingk dem op.”

¹⁰ Bot Gad yuuz im Spirit fi shuo wi aal a dem sitn de. Gad Spirit sorch an fain out evriting, it aal nuo di sitn dem we Gad a tingk we nobadi els no nuo bout.

¹¹ Wich wan a unu kyan tel we sumadi els a tingk? Jos laik ou a onggl fi wi spirit nuo we wi a tingk bout, a siem so a onggl Gad Spirit nuo we im a tingk bout.

¹² Di spirit we wi av neva kom fram di worl. Di spirit we wi av kom fram Gad, an a chuu wi av im Spirit mek wi kyan andastan an nuo aal a di sitn dem we Gad kwik fi du fi wi.

¹³ Dat a wa wi eva a priich tel unu. An wen wi a priich wi no yuuz no wod we di piipl we waiz se wi fi yuuz. Nuo, wen wi priich wi se di sitn dem we di Spirit tel wi fi se, so dat wi kyan mek unu we av di Spirit andastan aal a wa di Spirit shuo wi.

¹⁴ Di piipl we no av Gad Spirit, naa go biliiv notn we di Spirit se kaaz it a-go komiin laik fuulinish tu dem. Dem naa go kyan andastan it, kaaz a onggl wen yu av di Spirit yu kyan andastan dem sitn de.

¹⁵ Di piipl we av Gad Spirit a liv iina dem, dem kyan andastan evriting bot piipl we no av di Spirit naa go kyan andastan dem.

¹⁶ Kaaz it rait dong iina Gad wod se, “Uu kyan nuo we di Laad a tingk? Uu kyan tel im wa fi du?” Bot kaaz wi av di Uoli Spirit wi tingk laik ou Krais Jiizas tingk.