Read Jamaican Patois 1 Piita 3 Bible Online

1 Piita 3 - Jamaican Patois bible

1 Piita 3

¹ Breda an sista, bifuo mi kudn taak tu unu laik ou mi wuda taak tu piipl we av Gad Spirit a kanchuol dem. Mi did afi taak tu unu laik piipl we mek dem badi kanchuol dem — mi did afi taak tu unu laik se unu a biebi we no andastan di sitn dem bout Gad.

² Mi did afi fiid unu milk, mi kudn gi unu no aad fuud kaaz unu neva redi fi it. An unu stil no redi fi it.

³ Unu stil a mek di sitn dem we unu badi waahn kanchuol unu. Ef unu eva a kos unu wan aneda, an ef unu eva red yai an waahn waahn unu wan aneda sitn dem, unu no tingk se unu a mek unu badi kanchuol unu? Unu no tingk se unu a gwaan laik di piipl dem we no nuo Gad?

⁴ Kaaz wen wan sumadi se, “Mi a fala Paal” an wan neda wan se, “Mi a fala Apalos,” unu no tingk se unu a gwaan laik piipl we no nuo Gad?

⁵ Afta aal, uu a Apalos? An uu a Paal? A wi kom priich tu unu an mek unu biliiv bot di tuu a wi did onggl a du wa Gad se wi fi du. Wi a onggl Gad sorvant.

⁶ Luk pan it da wie ya, ef unu a did wan plaant, a mi wuda did plaant di siid. Apalos a di wan we did waata unu bot a Gad mek unu gruo.

⁷ So di wan we plaant an di wan we waata, dem no impuotant. Di onggl wan we riili impuotant a di wan we kaaz unu fi gruo.

⁸ Nou di wan we plaant an di wan we waata, di tuu a dem a wok tugeda kaaz dem waahn di siem sitn fi apm. An di tuu a dem a-go get pie bies pan we dem du.

⁹ Mi an Apalos, wi a jos Gad sorvant an di tuu a wi a wok tugeda fi Gad. Bot unu, unu a Gad fiil we wi a plaant op, unu a Gad bildin.

¹⁰ Mek mi put it wan neda wie. Gad gud an kain tu mi, so im mek mi wan a im ed bilda dem. A mi go iin go bil di foundieshan we sumadi els a-go bil pan. Nou aal a wi afi wach ou wi a bil.

¹¹ Kaaz nobadi kyan go bil wan neda foundieshan pan tap a di wan we de de aredi. An di foundieshan we de de aredi a Jiizas Krais. Im a di wan an onggl foundieshan.

¹² Nou som piipl a-go yuuz guol, silva ar ada stuon we kaas nof moni wen dem a bil pan da foundieshan de. An som ada piipl a-go yuuz wud, jrai graas ar chraa wen dem a bil.

¹³ Pan di die wen Krais Jiizas kom bak evribadi a-go nuo wa evribadi bil wid an evribadi a-go nuo ef wa evribadi bil gud kaaz Gad a-go tes it wid faiya.

¹⁴ Ef di faiya no bon op wa dem bil pan di foundieshan, Gad a-go pie dem fi di wok we dem du.

¹⁵ Bot ef di faiya bon op wa dem bil, Gad naa go pie dem. Dem naa go ded bot evriting els we dem av a-go bon op iina di faiya.

¹⁶ Unu no nuo se unu badi a Gad ous an dat im Spirit a liv iina unu?

¹⁷ Enibadi we mash op Gad ous, Gad a-go mash dem op. Kaaz Gad ous uoli an unu a Gad ous.

¹⁸ No bada fuul unuself. Ef unu tingk unu waiz jos chuu di piipl we no biliiv iina Gad se so, mi a tel unu a beta unu ton fuul so dat unu kyan riili get waiz.

¹⁹ Kaaz wa dem piipl de se waiz, Gad tek fi fuulinish. It aal rait dong iina Gad wod se, “Di piipl dem we tingk se dem waiz, Gad tek di siem sitn dem we dem tingk waiz an yuuz it ton dem iina fuul.”

²⁰ An it se agen se, “Di piipl dem we tingk dem waiz Gad nuo aal we dem a tingk. An im nuo se aal we dem a plan no wot notn.”

²¹ So tap buos bout uu unu a fala, kaaz evriting a fi unu uon.

²² Gad sen aal a wi: Paal, Apalos an Siifas fi elp unu. Evriting we de iina di worl, Gad mek fi unu. Wa apm wen unu a liv an wa apm wen unu ded, Gad mek it so evriting wok out gud fi unu. Aal di sitn dem we apm nou an aal a di sitn dem we a-go apm — apm fi elp unu. Evriting bilang tu unu.

²³ An unu bilang tu Krais Jiizas, an Krais Jiizas bilang tu Gad.