Read Jamaican Patois 1 Piita 4 Bible Online

1 Piita 4 - Jamaican Patois bible

1 Piita 4

¹ Dis a ou unu fi tingk bout wi we a tiich unu: unu fi luk pan wi an si se wi a jos Krais Jiizas sorvant dem an di wan dem we de ya fi tel unu bout aal a di sitn dem we unu no nuo bout Gad.

² Nou ef yu a wan sorvant, di onggl sitn yu maasta waahn, a fi yu du wa im gi yu fi du, an fi yu du it gud tu.

³ So yu si mi, mi no bizniz wid wa piipl av fi se bout mi. It no mata tu mi ef unu ar di piipl we de a kuot waahn joj di wok we mi du. Mi no iivn joj miself.

⁴ Az faar az mi nuo, mi no du notn rang, bot dat no pruuv se wa mi a du rait. Bot a no unu a-go joj mi, a di Laad a-go joj mi.

⁵ So no bada joj nobadi til di taim rait. Wiet til di Laad kom. Aal a di rang sitn dem we piipl du an chrai fi aid, im wi mek evribadi nuo bout dem an im wi shuo wa riili de iina piipl aat. An den Gad wi big op di wan dem we du di wok we im gi dem an we du it gud.

⁶ Breda an sista, unu mait-a tingk se aal a di sitn dem we mi se onggl a taak bout mi an Apalos bot it a taak bout unu tu. Mi did a yuuz mi an Apalos laif fi shuo unu an mek unu andastan se unu no fi du eniting els bot we rait dong iina Gad wod. Kaaz ef unu fala wa rait dong, unu wi no buos bout wan tiicha an iet di ada wan.

⁷ Kaaz a uu mek unu beta dan enibadi els? Wa unu av we a no get unu get it? An ef a get unu get it, mek unu a buos laik se a no get unu did get it?

⁸ Uo! So unu av aal we unu kuda waahn aredi! An unu don rich! Wos unu ton king lef wi. Mi wish se unu did riili ton king fi chuu, so dat wi kuda ton king wid unu tu.

⁹ Kaaz it komiin laik se Gad put wi, im apasl dem, iina di luowis pozishan, laik se wi a som man we get sen fi go ded. Kaaz di worl, di ienjel dem — evribadi tek wi fi papi shuo.

¹⁰ Nof piipl tingk wi a fuul kaaz wi biliiv iina Krais Jiizas. Bot unu, unu tingk se unu waiz kaaz unu bilang tu Krais. Nof piipl tingk se wi naa no powa fi du notn bot unu, unu tingk se unu av nof powa. Piipl shuo unu rispek bot dem no rispek wi.

¹¹ Aal nou wi onggri an wi chuot jrai. Fi wi kluoz komiin laik piis a uol tier op klaat, piipl chriit wi bad bad an wi no av no we fi liv.

¹² Wi tek wi uona an dem an wok aad aad. Wen piipl kos wi an se aal kain-a sopm bout wi, aal wi du a bles dem. Wen piipl mek wi a sofa, wi no gi op wi jos gwaan uol chrang.

¹³ Wen piipl tel lai pan wi, wi stil taak tu dem nais. Aal nou di worl gwaan laik se wi a jos gyaabij, wi komiin laik jregs we lef bak.

¹⁴ Mi naa rait dem sitn ya fi shiem unu. Mi a rait dem fi tiich unu kaaz unu a laik mi pikni dem an mi lov unu.

¹⁵ Kaaz iivn duo unu mait-a av ten touzn tiicha fi elp unu liv ou Gad waahn unu fi liv, a no aal a dem a-go komiin laik wan faada tu unu. Bot mi a unu faada kaaz a mi fos bring di Gud Nyuuz kom gi unu an elp unu fi biliiv.

¹⁶ So mi a beg unu, liv unu laif laik ou unu si mi a liv fi mi uon.

¹⁷ A so mek mi a sen Timoti tu unu, Timoti we mi lov an we komiin laik mi pikni kaaz di tuu a wi biliiv iina di siem Gad. Mi a sen im fi elp unu memba aal a di sitn dem we mi did tiich unu bout Krais Jiizas. A di siem sitn mi a tiich aal bout iina aal a di choch dem.

¹⁸ Nou som a unu staat get buosi kaaz unu tingk se mi naa go kom si unu.

¹⁹ Bot mi a-go kom de suun, ef dat a wa di Laad waahn mi fi du. Mi a-go kom de an mi wi fain out fi miself no jos wa dem buosi piipl a se, bot mi a-go fain out a wa kain-a powa dem av.

²⁰ Kaaz Gad kindom no bies pan wa piipl se, Gad kindom bies pan powa.

²¹ Wich wan unu wuda waahn mi fi du? Unu wuda waahn mi fi kom tu unu wid wan tik fi biit unu ar unu wuda waahn mi kom wid wan spirit we kain an jengkl an shuo unu lov?