Read Jamaican Patois 1 Piita 8 Bible Online

1 Piita 8 - Jamaican Patois bible

1 Piita 8

¹ Nou bout di fuud we unu sakrifais an gi faalz gad: wi nuo se aal a wi nuo bout da kain-a sakrifais de. Wen yu nuo sopm it kaaz yu fi get buosi bot lov, lov bil op piipl — it elp dem get chrang.

² Di piipl dem we tingk se dem nuo sopm no riili nuo it yet laik ou dem fi nuo it.

³ Bot ef sumadi lov Gad, Gad nuo dem.

⁴ So den dis ting bout weda wi shuda iit ar no iit di fuud we piipl sakrifais gi faalz gad: di uol a wi nuo se dem faalz gad de no riili alaiv. An wi nuo se a onggl wan riil Gad de bout.

⁵ Som piipl se dat yu av nof difrant gad, som we liv pan ort an som we liv iina evn (an wi nuo se a nof tingz piipl kaal gad an laad).

⁶ Bot wi nuo se a onggl wan Gad de bout. Im a di Faada we mek evriting an im a uu wi a liv fa. An wi nuo se a onggl wan Laad de bout an dat a Jiizas Krais, a im mek evriting an a im mek wi kyan liv.

⁷ Bot a no evribadi nuo dis. Som piipl get so yuus tu worship faalz gad dat wen dem iit di fuud dem stil tingk se a wan sakrifais tu di faalz gad dem. An chuu dem stil yong iina wa dem biliiv, dem tingk se dem a sin wen dem nyam da fuud de.

⁸ Bot fuud naa go mek wi an Gad kluosa, so a notn ef wi iit di fuud ar wi no iit di fuud. It naa du wi notn bad.

⁹ Wach unuself duo! Unu frii fi iit di fuud bot mek shuor se wen unu a iit it, unu naa kaaz di wan dem we yong iina wa dem biliiv fi sin.

¹⁰ Kaaz ef wan a dem piipl de si wan a unu we chrang a iit di fuud we dem gi op tu di faalz gad dem, unu no tingk se dem a-go nyam it tu iivn duo dem tingk a sin?

¹¹ An iivn duo unu nuo se it aarait, da breda ar sista ya we no chrang laik unu an we Jiizas ded fa, mait-a tap biliiv siek-a wa unu du.

¹² Wen yu kaaz sumadi fi go gens wa dem biliiv, an sin dem wie de, yu a sin tu. A laik unu a se Krais ded fi notn.

¹³ So ef wa mi nyam a-go kaaz mi breda fi sin, mi wi tap nyam it. Da wie de mi wudn kaaz im fi sin.