Read Jamaican Patois 2 Piita 1 Bible Online

2 Piita 1 - Jamaican Patois bible

2 Piita 1

¹ Da leta ya a kom fram mi, Paal, wan a Jiizas Krais apasl dem. Mi a wan apasl kaaz a dat Gad did waahn mi fi bi. Wi breda Timoti, im grii wid evriting we iina da leta ya. So, a di tuu a wi a sen it an wi a sen it tu aal a Gad piipl we kip choch iina Korint an tu aal a di piipl dem we iina Akaiya we biliiv iina Gad.

² Mi prie se wi Faada Gad an wi Laad Jiizas Krais wi shuo unu lov iivn duo wi no dizorv it an gi unu piis iina unu aat.

³ Priez di Gad an Faada fi wi Laad Jiizas Krais. Im a di Faada we gud an kain tu evribadi. Im a di Gad we elp piipl wen dem niid it an we osh dem wen dem sad.

⁴ Wen wi a go chuu aal kain-a kraasiz an sofarieshan, a im kom elp wi an push wi fi gwaan tan chrang. Im du dat so wi kyan ton roun an elp ada piipl we a go chuu sofarieshan, no mata wa kain-a chobl dem av, an elp dem siem laik ou im elp wi.

⁵ Wi an Jiizas a wan, so wi afi go sofa uol iip siem laik im. Bot jos laik ou wi did afi sofa, a siem so im a-go elp wi an tek kier a wi nof nof kaaz wi an im a wan.

⁶ So ef wi sofa, wi a sofa kaaz wi waahn fi elp unu an wi waahn unu fi kip chrang. An ef wi get elp, unu wuda a get elp tu. Kaaz unu wi nuo se wen unu a sofa laik wi, fi unu elp wi kom. An dat wi mek unu gwaan kip chrang wen chobl tek unu.

⁷ Wi biliiv iina unu an wi nuo se unu wi gwaan biliiv no mata wa unu fies kaaz jos laik ou unu sofa wid wi, Gad wi elp unu siem laik ou im elp wi.

⁸ Breda an sista wi waahn unu fi nuo di chuut bout aal a di sitn dem we wi did afi sofa chuu wen wi did de a Iezha. Di sofarieshan a did muor dan wi kuda manij. It did so bad wi did shuor se a ded wi did a go ded.

⁹ It did komiin laik se a sen sumadi sen wi fi ded. Bot Gad mek wi go chuu dem sitn de fi tiich wi se wi mos chos iina im, di Gad we mek piipl kom bak alaiv, an no chrai fi yuuz wi uona chrent fi du notn.

¹⁰ Wi did a go ded wan wikid wikid wie an a Gad mek wi neva ded. A im siev wi an im wi aalwiez kom siev wi wen wi iina chobl. Wi nuo se im wi gwaan kip wi sief.

¹¹ Unu mos prie se Gad wi elp wi tu. Kaaz wen Gad ansa unu prieya an bles wi, nof ada piipl wi staat fi gi Gad tangks fi aal we im du fi wi.

¹² Nou dis a wa wi av we wi kyan buos bout: fi wi kanchens naa bada wi kaaz wi nuo se wi liv gud wid evribadi. Aal unu, muor dan di res a piipl dem, wi chriit gud. Wi neva aid notn fram unu an wi aalwiez liv laik ou piipl we se dem bilang tu Gad fi liv. An wi naa liv so kaaz wi sumaat ar wi av sens, bot kaaz Gad gud tu wi an a im mek wi kyan liv so.

¹³ An unu nuo se wi naa chrai chrik unu kaaz wi no rait notn gi unu we unu kyaahn riid ar andastan. Rait ya nou unu no andastan evriting bout wi bot mi uop se

¹⁴ wan die unu wi andastan evriting. Mi uop se unu wi andastan so dat pan di die wen Jiizas kom bak, unu wi kyan buos bout ou unu nuo wi siem laik ou wi kyan buos bout ou wi nuo unu.

¹⁵ An kaaz mi did shuor se unu wuda andastan an welkom mi, mi did plan fi kom si unu fos, so dat unu kuda get bles tuu taim,

¹⁶ an so unu kuda elp wi fi go a Masiduoniya. An den wen wi lef Masiduoniya wi did plan fi kom bak kom luk fi unu so dat unu kuda elp wi fi go a Judiya.

¹⁷ So wen mi plan dem chienj op an mi neva get fi kom bak kom si unu, a siiros unu tingk mi neva siiros bout di plan dem wa mi mek? Unu tingk se mi komiin laik di piipl dem we liv iina di worl we onggl du tingz fi elp demself an we se “Yes mi a kom” an siem taim se “Nuo mi naa kom”?

¹⁸ Wi kyan chos Gad, im no lai, an im a wi witnis kaaz wi neva tel unu “yes” an den likl afta dat tel unu “nuo.”

¹⁹ Kaaz Gad Bwai Pikni, Jiizas Krais, we mi, Silvanos an Timoti did priich tu unu bout, a no sumadi we se “Yes” wan minit an “Nuo” di neks. Jiizas aalwiez se wa im miin, im aalwiez se “Yes.”

²⁰ No mata umoch pramis Gad mek, a Jiizas Krais mek wi kyan get di uol a dem. A so mek wen taim wi waahn fi big op Gad wi se “Iemen” iina Jiizas niem.

²¹ Nou a Gad mek aal a wi kyan tan chrang an gwaan biliiv iina Jiizas Krais. A im pik wi fi bi im piipl.

²² Im maak wi fi shuo se wi bilang tu im an gi wi di Spirit iina wi aat so wi wuda nuo se im a-go gi wi aal we im pramis fi gi wi.

²³ Nou ef wa mi bout fi tel unu a lai, mek Gad ponish mi: a fi fi unu uona gud mek mi neva kom baka Korint. Mi neva kom bak kaaz mi neva waahn unu fi sofa.

²⁴ Wi a no som baas we a chrai fi ruul uova unu an tel unu wa fi biliiv. Wi a wok wid unu fi mek unu api kaaz unu chrang iina wa unu biliiv.