Read Jamaican Patois 2 Piita 10 Bible Online

2 Piita 10 - Jamaican Patois bible

2 Piita 10

¹ Som piipl se mi saaf wen mi de de mongks unu bot gwaan laik mi rof wen mi de faar. Bot mi, Paal, mi a beg unu, iina Jiizas niem, Jiizas we kain an jengkl,

² no push mi fi rof wid unu wen mi kom de fi si unu, laik ou mi shuor se mi afi go rof wid di wan dem we tingk se wi a liv laik di piipl dem we de iina di worl an no nuo Gad.

³ Kaaz iivn duo wi liv iina di worl wi no fait laik ou di worliyan dem fait.

⁴ Kaaz di sitn dem we wi fait wid, a no di siem kain-a sitn we di worliyan dem fait wid. No man neva mek di sitn dem we wi yuuz; di sitn dem we wi yuuz fi fait, a Gad mek dem an im gi dem di powa fi mash dong eniting we di enimi chrai fi bil op gens wi. Wi mash op dem aagiment,

⁵ an di sitn dem we dem se chuu dem ful-a demself, an we komiin laik wan waal a tap piipl fram nuo Gad. Wi a-go tier it dong. Di sitn dem we dem tingk an se, komiin laik wi enimi an siem laik ou suoja kech dem enimi an fling dem iina prizn, a siem so wi a-go kech evriting we dem tingk an fuos dem fi fala wa Krais Jiizas se.

⁶ An wen wi si se unu a fala Krais Jiizas iina evri wie, wi wi redi fi ponish enibadi we naa fala wa im se.

⁷ Unu onggl luk pan wa de pan di outsaid. Ef enibadi fiil shuor se dem bilang tu Krais Jiizas, mek dem tingk bout dis, siem laik ou unu bilang tu Jiizas, a siem so wi bilang tu im tu.

⁸ Kaaz iivn ef mi buos likl tu moch bout di powa an di rait we di Laad gi mi, mi no shiem. Im gi mi da powa de no fi mash unu dong bot fi elp unu get chrang.

⁹ An mi no waahn it luk laik se mi a chrai fi fraitn unu wid mi leta dem.

¹⁰ Kaaz som piipl se, “Im rof wen im a rait wi. Iina im leta dem im taak tu wi aad bot wen im de mongks wi im saaf an wa im tel wi no wot notn.”

¹¹ Mek enibadi we se dat andastan dis, wa wi se iina di leta dem we wi rait unu wen wi no de de, a di siem ting wi a-go du wen wi de de wid unu.

¹² Mi wudn mad fi chrai mach op miself wid di wan dem we eva a sing dem uona priez. Dem mek op dem main fi demself wa rait an den joj demself bies pan wa dem fiil rait. Wen dem du dat it shuo se dem no andastan notn.

¹³ Bot wi, wi no komiin laik dem. Wi naa go brag an buos bout sopm we wi no av no bizniz a brag an buos bout. Wi onggl buos bout di wok we Gad gi wi fi du, an unu a paat a da wok de.

¹⁴ So wi neva did a paas wi plies wen wi buos bout unu kaaz wi a di fos wan fi kom tu unu an priich di Gud Nyuuz bout Krais Jiizas. Ef a neva wi kom priich tu unu, wi kudn a brag an buos bout unu.

¹⁵ So wi no brag bout ada piipl wok laik se a wi did du it. Aal wi du a uop se unu wi get chrangga an chrangga iina wa unu biliiv, so dat wi wok mongks unu wi gruo tu.

¹⁶ Den, wi kyan go paas unu an go priich di Gud Nyuuz bout Krais Jiizas tu piipl we liv iina di ada konchri dem an we nobadi neva priich tu yet. Da wie de wen wi redi fi taak bout di wok we wi a du, wi nuo se wi naa brag an buos bout wok we sumadi els did du.

¹⁷ Bot it rait dong iina Gad wod se, “Ef enibadi waahn fi buos mek im buos bout we di Laad du.”

¹⁸ Kaaz it no mata ef yu tingk se yu a du gud, it onggl mata ef Gad tingk se yu gud.