Read Jamaican Patois 2 Piita 11 Bible Online

2 Piita 11 - Jamaican Patois bible

2 Piita 11

¹ Mi uop se unu wi tek taim wid mi iivn ef unu tingk se wa mi bout fi se a fuulinish. Mi se fi tek taim wid mi!

² Mi wori bout unu siem laik ou Gad wori bout unu. Siem laik ou wan faada wi tek im gyal pikni we neva sliip wid nobadi yet an pramis fi marid ar tu wan man, a siem so mi did tek unu an pramis fi marid unu tu Krais Jiizas.

³ Bot mi fried se, jos laik ou di siniek di chrik op Iiv, sumadi a-go chrik unu an kaaz unu fi ton we fram Krais Jiizas an tap fala im wid aal a unu aat.

⁴ Kaaz wi tel unu bout Jiizas an unu tek di Uoli Spirit we Gad gi unu an unu biliiv di mesij we wi priich. Bot mek sumadi nyuu kom an tel unu bout wan difrant Jiizas an unu redi fi lisn an tek di spirit we dem a gi an biliiv di mesij we dem a priich.

⁵ Mi no tingk se fi unu “big apasl” dem beta dan mi.

⁶ Kaaz iivn ef mi no taak gud laik dem wen mi infronta unu, mi nuo muor dan dem. An wi shuo evribadi plien plien se wi nuo muor dan dem iina evriting we wi du.

⁷ Wen mi priich Gad Gud Nyuuz bout Jiizas tu unu, mi did du it fi frii, mi neva chaaj unu notn. Mi put miself dong luo so dat mi kuda lif unu op. A sin mi did a sin wen mi du dem sopm de?

⁸ A laik se mi did a tiif di ada choch dem, kaaz mi did tek moni fram dem so dat mi kuda kom elp unu.

⁹ Wen mi did de mongks unu an wel niid som tingz mi neva aks unu fi notn, kaaz wi breda an sista dem we did kom fram Masiduoniya did bring evriting we mi niid. Mi neva presha non a unu fi notn an mi naa go presha non a unu fi notn niida.

¹⁰ An nobadi iina Akaiya kyan tap mi fram buos bout dat. Siem laik ou unu nuo fi shuor se wa mi tiich bout Gad a chuu, a siem so unu kyan shuor bout dat.

¹¹ Wa mek mi naa presha unu fi gi mi notn? Unu tingk se a kaaz mi no lov unu? Gad nuo se mi lov unu.

¹² Mi neva presha unu fi notn an mi naa go presha unu fi notn. Mi naa du it so dat di piipl dem we wuda waahn fi buos se dem a wok siem laik mi, naa go av no chaans fi se so.

¹³ Kaaz dem piipl de, dem se dem a apasl, bot dem a no no apasl. Dem gwaan laik se a Gad sen dem an chrai fi chrik piipl an mek dem biliiv se dem a wan a Jiizas apasl dem, bot dem a no no apasl.

¹⁴ An mi no sopraiz se dem chrai fi du dat kaaz iivn sietan imself chrai fi chrik piipl an jres op imself laik wan a Gad ienjel wid wan brait lait roun im.

¹⁵ So den it no fi sopraiz nobadi se fi im sorvant dem a chrai fi chrik piipl tu an gwaan laik se di wok we dem a du a gud sopm. Bot di die gweehn kom wen dem a-go get aal we dem a wok fa.

¹⁶ Mi wi se it agen, mi no waahn non a unu fi tingk se mi a fuul. Bot ef unu tingk se mi a wan fuul, chriit mi laik ou yu wuda chriit di ada fuul dem an lou mi fi brag an buos likl.

¹⁷ Nou wen mi taak dem wie ya, mi naa taak ou di Laad waahn mi fi taak. Mi a taak laik se mi a fuul.

¹⁸ Sins nof piipl a brag an buos laik ou di piipl dem iina di worl a buos, mi a-go brag an buos tu.

¹⁹ Unu so waiz, unu eva redi fi tek iin an lisn tu di fuul dem.

²⁰ Unu put op wid piipl wen dem kom an chrai tek unu an ton unu iina sliev. Unu put op wid dem wen dem yuuz unu, unu put op wid dem wen dem tek advaantij a unu. Wen dem put unu dong an gwaan laik dem beta dan unu, wen dem baks unu iina unu fies, unu put op wid dem.

²¹ (Mi ges mi shuda shiem fi se dat wi did tuu wiik fi du dem sitn de tu unu.) Bot wat-eva dem tingk dem bad inof fi buos bout, mi a-go buos bout di siem sitn dem tu. (Mi a taak laik wan fuul ya nou).

²² Dem a Iibruu? Mi a Iibruu tu. Dem a Izrelait? Mi a Izrelait tu. Dem a Iebriyam fambili? Mi a Iebriyam fambili tu.

²³ Dem a Krais Jiizas sorvant? (Mi a taak laik wan riil madman nou.) Mi a muor Krais sorvant dan dem. Mi wok aada dan dem. Mi get lak op iina prizn nof muor taim dan dem. Mi get nof muor biitn dan dem an a nof taim mi aalmuos ded.

²⁴ A faiv taim di Juu dem yuuz wan wip an lik mi toti-nain taim — dat a wan shaat a faati.

²⁵ A chrii taim di Ruoman dem yuuz kien biit mi. Wan taim som piipl aal stuon mi. A chrii taim mi outa sii an di ship we mi de pan mash op. Wan a dem taim de a wan uol nait an wan uol die mi iina di waata a fluot.

²⁶ Nof taim wen mi a chravl, mi aalmuos ded. Riva nieli tek mi laif. Tiif chrai kil mi. Mi uona piipl di Juu dem an aal piipl we a no Juu chrai fi kil mi tu. Mi no sief iina di siti. Mi no sief iina di dezot. Mi de a sii, mi aalmuos ded. Mi aal av piipl we gwaan laik dem a mi breda, bot a kil dem waahn fi kil mi.

²⁷ Mi chogl an wok aad aad, nof nait mi no get no sliip. Mi did onggri an waahn sopm fi jringk an nof taim neva av no fuud fi iit. Yu did av taim wen mi kuol an no av inof kluoz fi kip mi waam.

²⁸ A nof sitn mi naa tel unu bout, bot pan tap a aal a dat, evridie mi wori bout aal a di choch dem. Mi wori so til mi aat evi.

²⁹ Wen sumadi wiik, mi no fiil wiik tu? Wen sumadi get chrik an go sin, mi no beks til mi blod bwail?

³⁰ Sins mi afi brag an buos, mi wi brag an buos bout di sitn dem we shuo se mi wiik.

³¹ Di Gad an Faada fi di Laad Jiizas Krais, nuo se mi naa lai. Mek piipl priez im niem fi eva!

³² Iina Damaskos, wan a King Aretas govana dem sen suoja fi gyaad di siti giet so dat dem kuda ares mi.

³³ Bot dem neva kech mi, kaaz som piipl let mi dong chuu wan winda iina di siti waal.