Read Jamaican Patois 2 Piita 13 Bible Online

2 Piita 13 - Jamaican Patois bible

2 Piita 13

¹ Da taim ya wen mi kom, dat a-go mek chrii taim mi kom luk fi unu. An siem laik ou it rait dong iina Gad wod se, “Ef sumadi du sopm rang, wi kyaahn jos ponish dem, tuu ar chrii sumadi we si wa apm, afi kom taak we dem si an pruuv se da sumadi de did du rang. Afta dat wi kyan ponish dem.”

² Laas taim mi did de de, dat a did di sekan taim mi kom luk fi unu, mi did waan unu. Mi did tel di piipl dem we did a du rang, an di res a unu tu fi tap it. Tap du rang kaaz wen mi kom bak mi naa go tek it iizi pan unu. Evribadi we du rang a-go get ponish. A dat mi did tel unu wen mi de de an nou iivn duo mi de faar fram unu, mi a tel unu agen.

³ Mi naa go tek it iizi pan nobadi sins unu did waahn mi fi pruuv se Krais Jiizas a yuuz mi fi taak tu unu. Wen im diil wid unu im no wiik, im shuo im powa mongks unu.

⁴ A chuu se, wen dem did niel im op pan di kraas, im neva shuo im powa — im mek imself wiik, bot Gad powa mek im kom bak alaiv an a liv nou. An siem laik ou im did wiik a siem so mi wiik, bot wan die unu wi si se Gad powa a-go mek mi liv laik ou Krais Jiizas a liv an mi a-go gwaan liv wid im.

⁵ Unu fi luk pan unuself. Luk an tes fi si ef unu riili a liv laik ou piipl we biliiv iina Gad sopuoz fi liv. Unu no nuo se Jiizas Krais a liv iina unu? Ef unu no si se im a liv iina unu a fiel unu fiel di tes.

⁶ Mi uop se unu wi kom fi si se wi neva fiel di tes.

⁷ Nou wi prie tu Gad se unu wi no du notn we rang, no kaaz wi waahn fi mek wiself luk gud bot kaaz wi aalwiez waahn unu fi du we rait. Wi aalwiez waahn unu fi du we rait iivn ef it luk laik se wi did fiel di tes.

⁸ Kaaz wi no av di powa fi tap di chuut ar uol it bak. Aal wi kyan du a elp fi pred it.

⁹ Wi api wen unu chrang an wi wiik an wa wi a prie se, a dat Gad wi mek unu gwaan gruo chrang iina wa unu biliiv.

¹⁰ So mi a rait dem sitn ya tel unu wail mi no de de, so dat wen mi riich, mi no afi taak tu unu rof. Kaaz Gad gi mi di powa an di rait fi karek unu, bot im gi mi da powa de fi elp bil unu op, no fi tier unu dong.

¹¹ Breda an sista, aal mi av fi se fi don da leta ya a dat mi uop se unu wi api. Chienj unu wiez an liv ou unu sopuoz fi liv. Mi a beg unu lisn an fala aal we mi tel unu. Kom tugeda an biliiv di siem ting an liv iina piis wid unu wan aneda. An Gad we lov wi an we gi wi piis wi tan wid unu aalwiez.

¹² Unu fi tel unu wan aneda oudi an du it wid lov. Aal a di breda an sista dem sen oudi fi unu.

¹³*** POSSIBLE ERROR IN BIBLE, TEXT MISSING HERE ***