Read Jamaican Patois 2 Piita 2 Bible Online

2 Piita 2 - Jamaican Patois bible

2 Piita 2

¹ So mi mek op mi main se mi naa kom si unu ef wa mi av fi tel unu a-go kaaz unu pien.

² Kaaz ef mi mek unu sad, uu a-go de de fi mek mi api? No onggl di siem piipl we mi mek sad?

³ A so mek mi rait da leta de — mi neva waahn di sed piipl we fi mek mi api, fi mek mi sad. So mi rait unu so unu kuda chienj we niid fi chienj, an da wie de wen mi kom luk fi unu, mi wuda api. Kaaz mi nuo fi shuor se ef mi api unu api tu.

⁴ Wen mi did rait da leta de mi did sad bad bad. Mi aat did so evi mi aal baal wen mi a rait it. Mi neva rait it fi mek unu sad, bot mi rait it fi mek unu nuo umoch mi lov unu bad bad.

⁵ Nou sumadi mongks unu did du sitn we kaaz unu fi fiil pien iina unu aat. Mi nuo se it ort unu muor dan it ort mi kaaz wa dem did du did ort aal a unu wan wie ar aneda (mi no waahn fi mek tingz soun wosa dan dem bi).

⁶ Muos a unu did ponish da sumadi de an di ponish we unu ponish im, it inof.

⁷ Iiz im op nou, no ponish im no langga. Insted-a dat unu fi paadn im an kain tu im. Unu fi du dat so dat im no get so sad dat im gi op.

⁸ An kaaz mi no waahn im fi gi op, mi a beg unu fi shuo im se unu stil lov im.

⁹ Mi did sen unu wan leta we se unu fi sen im fram mongks unu. A tes mi did a tes unu mek mi rait dat. Mi did waahn fi si ef unu wuda du aal we mi se unu fi du.

¹⁰ Enibadi we unu paadn, mi paadn dem tu (dat a ef mi av notn fi paadn). Jiizas Krais si an nuo se mi riili paadn dem an mi du it fi elp unu.

¹¹ Wi fi paadn im so dat Sietan no win kaaz wi nuo se im eva a luk fi wan wie fi kaaz chobl an mek piipl ton we fram Gad.

¹² Nou wen mi go a Chuowas fi priich di Gud Nyuuz bout Jiizas, mi fain se di Laad did don mek wan wie fi mi taak tu di piipl dem.

¹³ Bot iivn duo di piipl dem did api fi ier wa mi av fi se, mi main kudn res, kaaz mi neva si mi breda Taitos. Bot sins mi neva fain im, mi tel di piipl dem iina Chuowas ba-bai an lef go a Masiduoniya.

¹⁴ Wi tangk Gad we mek wi eva a win gens di wikid sitn dem we wi fies, chuu wi an Jiizas a wan. Gad yuuz wi fi pred di Gud Nyuuz bout Jiizas aal bout, an da Gud Nyuuz de komiin laik wan swiit swiit sumel.

¹⁵ Kaaz wi komiin laik di swiit sumel we insens gi aaf — di insens dem we Jiizas gi Gad. An da sumel de pred out mongks di piipl we a get siev an mongks di piipl dem we naa go get siev.

¹⁶ Tu di wan dem we no biliiv, it tingk laik ded sitn bot tu di wan dem we biliiv, it sumel gud laik sopm we wuda gi yu laif. So uu den av wa it tek fi du da wok ya?

¹⁷ Wi no komiin laik nof ada piipl we chriit Gad wod laik a sopm chiip we dem kyan sel an mek moni. Nuo! Gad sen wi fi tiich im Wod an chuu wi a Jiizas sorvant dem wi aalwiez tiich di chuut laik se Gad did tan op rait infronta wi.