Read Jamaican Patois 2 Piita 3 Bible Online

2 Piita 3 - Jamaican Patois bible

2 Piita 3

¹ A shuo aaf unu tingk wi a shuo aaf agen? Ar laik som piipl unu tingk se wi niid unu fi sen wan leta ar sumadi fi sen wan leta gi unu wa se wi a du wan gud jab?

² Wi no niid no leta, wi no niid nobadi fi rait an tel piipl se wi a du gud, kaaz wa dem leta de wuda du unu a du aredi. Piipl wi luk pan ou unu a liv an nuo se wi a du gud wok.

³ Unu shuo se unu a laik wan leta we Krais Jiizas rait, an we kom bout kaaz a di wok we wi du. Da leta ya no rait wid ingk, it rait wid Gad Spirit we kyaahn ded. An it no rait dong pan rakstuon laik wen Gad did gi Muoziz di Laa bot it rait dong iina di aat a evribadi we biliiv iina Jiizas.

⁴ Wi kyan se dem sitn ya an shuor bout dem kaaz wi chos iina Jiizas. An a im mek wi a du di wok we wi a du an kyan tan op infronta Gad an no shiem.

⁵ Wi kyaahn du notn pan wi uon. Wi no av notn iina wi we wuda mek wi kyan du da wok ya. A Gad wan mek wi kyan du it.

⁶ A Gad mek wi kyan sorv im an go roun go tel piipl bout di Nyuu Diil we Gad mek wid wi. Da Nyuu Diil ya no av notn fi du wid di Laa we did rait dong. Iina da Nyuu Diil ya Gad sen im Spirit gi wi; kaaz di Laa kil bot di Spirit gi laif.

⁷ Di Laa did rait dong pan stuon, an wen Gad sen it, im sen it wid im brait brait lait. Da lait de did so brait dat it mek Muoziz fies staat shain. An iivn duo di brait lait did a fied, it mek im shain so moch dat di Izrel piipl dem kudn iivn luk pan im fi lang. Nou ef da Laa de, we kyaahn siev piipl bot sen piipl fi ded, did kom wid so moch powa

⁸ unu no tingk se di Nyuu Diil we di Spirit bring an we kyan siev piipl a-go kom wid nof muor powa dan dat?

⁹ So ef di Laa we sen piipl fi ded did kom wid da powaful lait de, di Nyuu Diil we kyan siev piipl no mos kom wid wan muo powaful lait.

¹⁰ Az a mata a fak, di Nyuu Diil so big an powaful dat di Laa no iivn luk brait agen — it no impuotant nou laik fos taim.

¹¹ Nou ef di Laa we neva laas no taim did kom wid da brait brait lait de, di Nyuu Diil we a-go laas fi eva no mos kom wid wan muor powaful lait dan dat.

¹² So sins wi kyan luk fi Gad gi wi wa im pramis an nuo fi shuor se wi a get dem, wi no afi aid an taak bout Gad.

¹³ An wi no afi du laik Muoziz an kova op wi fies wid piis a klaat so dat di Izrel piipl wudn si se di brait brait lait we did a shain roun im did a go we.

¹⁴ Bot di Izrel piipl dem, dem komiin laik piipl we naa no sens. Kaaz aal tide die, wen dem ier di uol Laa a riid out, a laik sopm a tap dem fram andastan se di taim fi di Laa don. A laik se di piis a klaat stil a kova op di chuut an a tap dem fram si. An dem naa go kyan muuv da piis a klaat de kaaz a onggl Krais Jiizas wan kyan muuv it.

¹⁵ Yes, aal nou wen Muoziz Laa riid out loud, a laik di klaat stil a kova dem, an dem main blak aaf.

¹⁶ Bot wen yu biliiv iina di Laad, im tek we da piis a klaat de.

¹⁷ So wen wi chos iina Jiizas Krais an biliiv di Nyuu Mesij, Gad di Faada sen im Uoli Spirit gi wi, an di Uoli Spirit frii wi.

¹⁸ An so aal a wi we bilang tu Jiizas, fi wi fies no kova op an wi kyan luk pan di Laad brait brait lait. An di Uoli Spirit we a di Laad kaaz wi fi shain brait brait tu. An muor an muor im a mek wi laik imself, til wan die wi a-go luk jos laik im.