Read Jamaican Patois 2 Piita 6 Bible Online

2 Piita 6 - Jamaican Patois bible

2 Piita 6

¹ So sins wi wok wid Gad, wi a beg unu, im so gud an kain tu unu, no mek it kom tu notn, no bada wies it.

² Kaaz Gad se, “Wen a did taim fi mi shuo yu gud fies, mi lisn tu yu prieya dem an ansa dem. Wen di die kom fi mi siev yu, mi elp yu.” Unu lisn mi! Nou a di taim fi Gad shuo unu gud fies. Tide a di die fi unu get siev.

³ Wi mek shuor se wi no du notn we wuda kaaz piipl fi no biliiv iina di mesij we wi a tiich. Wi no waahn nobadi fi av notn bad fi se bout di wok we wi a du.

⁴ So insted-a kaaz piipl fi ton we, wa wi du a shuo dem se wi a Gad sorvant iina evriting we wi du. Wi shuo dem se wi a Gad sorvant wen wi no gi op wen nof chobl an chraiyal an kraasiz tek wi.

⁵ Piipl biit wi, dem fling wi iina prizn, kroud an kroud a piipl chrai kil wi aaf bot wi stil a wok. Wi a wok aal wen wi no av di chrent fi wok no muor. Nof nait wi no get no sliip an wi naa no fuud fi iit, bot wi stil a wok.

⁶ Wi shuo se wi a Gad sorvant wen wi kip wiself kliin. Gad mek wi andastan im mesij an mek wi nuo ou im waahn wi fi liv. Wi shuo se wi a Gad sorvant wen wi kain tu piipl, an tek taim wid dem an no kwik fi get beks ar grombl grombl. Wi mek di Uoli Spirit elp wi fi du wi wok, wi no du it pan wi uon. Wi shuo se wi a Gad sorvant wen wi shuo piipl lov, no mata uu dem bi ar we dem du, wi aalwiez shuo dem lov.

⁷ Wi onggl tiich di chuut an Gad powa a wok iina wi. An siem laik ou suoja yuuz di wepan iina dem lef an fi protek demself an di wan iina dem rait an fi fait di piipl dem we a kom gens dem a siem so di gud we wi du wi fait an protek wi fram evriting we wuda kom gens wi.

⁸ Som piipl big wi op ada piipl chrai fi put wi dong. Som piipl rispek wi ada piipl chrai fi shiem wi. Som piipl se wi a laiyad bot wi aalwiez tel di chuut.

⁹ Som piipl no nuo wi bot som piipl nuo wi. Som piipl tingk wi a ded bot luk wi stil a liv. Dem ponish wi an mek wi sofa bot wi no ded.

¹⁰ Wi aalwiez api iivn wen wi a sofa. An iivn duo wi puor wi a mek nof piipl rich. Mi no miin se wi elp dem mek moni, dem rich kaaz dem biliiv iina Gad an siek-a wa im a go gi dem wen dem biliiv. A siem so wid wi, it komiin laik se wi naa notn bot wi riili av evriting kaaz wi biliiv iina Gad.

¹¹ Unu we iina Korint wi aalwiez chriet wid unu; wi aalwiez tel unu di chuut wi no aid notn fram unu. An wi lov unu wid evriting we de iina wi aat.

¹² Wi naa uol bak wi lov fi unu bot unu a uol bak fi unu lov fi wi.

¹³ So fi bi fier, mi a aks unu, sins wi stil lov unu, lov wi bak. Mi a taak tu unu laik se unu a mi uona pikni dem, lov wi wid evriting we de iina unu aat.

¹⁴ No jain op jain op wid piipl we no biliiv iina Jiizas. Kaaz wa sumadi we a liv rait av fi du wid sumadi we a diil wid bier wikidnis? Ar ou lait an daak fi shier spies?

¹⁵ Krais Jiizas an Belaiyar kyan grii bout notn? Sumadi we biliiv iina Krais Jiizas an sumadi we no biliiv iina im kyan grii bout notn?

¹⁶ Faalz gad kyan de iina Gad choch? Unu badi a di ous fi di Gad we kyaahn ded. Gad imself se: “Mi wi liv iina dem aat an mi wi waak wid dem. Mi wi bi dem Gad an dem a-go bi mi piipl.”

¹⁷ Di Laad se tu, “Kom fram mongks di piipl dem we no biliiv iina mi, mek shuor se piipl kyan si se unu an dem difrant. No av notn fi du wid no kain-a sin, an mi wi uopm mi an dem tu unu.

¹⁸ Mi wi bi unu faada, an unu wi bi mi bwai an gyal pikni dem.” Dat a wa di Laad we muor powaful dan evri an eniting se.