Read Jamaican Patois 2 Piita 8 Bible Online

2 Piita 8 - Jamaican Patois bible

2 Piita 8

¹ Breda an Sista mi waahn fi tel unu ou Gad shuo di choch dem iina Masiduoniya lov iivn duo dem no dizorv it.

² Iivn duo aad taim tek dem an dem did puor so til, dem did eva api fi shier wa dem av wid ada piipl. Dem gi we nof nof sitn.

³ Mi a tel unu, dem gi aal dem kuda gi an muor, an nobadi did afi aks dem fi du it, dem du it kaaz dem waahn fi du it.

⁴ Dem beg wi an beg wi fi tek wa dem av gi it tu Gad piipl we de iina Judiya kaaz dem did wel waahn fi elp.

⁵ Dem gi muor dan wi kuda aks dem fi gi, muor dan wi did tingk dem kuda gi. Di fos ting dem du a fi gi dem laif tu Jiizas Krais an fala aal a di sitn dem we wi tiich. Dem du evriting jos laik ou Gad did waahn dem fi du it.

⁶ So sins Taitos a di wan we did elp unu fi staat gyada op di sitn dem fi gi we, wi a push im fi go bak go finish di gud wok we im did staat.

⁷ Nou, unu a du beta dan nof ada piipl. Unu biliiv iina Gad chrang chrang, unu nuo ou fi taak an priich gud, unu waiz an unu neva gi op. Unu lov wi nof nof tu. So sins unu a du so gud, mi waahn unu fi mek shuor se unu du gud wen unu a gi tu. Mek shuor se jos laik ou unu get muor dan ada piipl, unu gi muor dan ada piipl.

⁸ A no wan ruul mi a gi unu, mi naa se unu afi du it. Wa mi a du a tes unu. Mi a shuo unu di gud we ada piipl du, fi si ef di lov we unu se unu av iina unu aat, ef it riili riil.

⁹ Kaaz unu nuo ou wi Laad Jiizas Krais shuo wi lov iivn duo wi no dizorv it. Im did rich bot im gi op evriting an mek imself puor so dat unu we puor kuda get rich.

¹⁰ Nou mek mi tel unu wa mi tingk bout di sitn dem we unu a gyada op an a gi we: A unu it a-go elp, laik ou laas ier unu a did di fos wan dem fi gyada op wa unu kyan an gi tu ada piipl, an unu gi kaaz a dat unu did waahn fi du, nobadi neva afi aks unu fi du it.

¹¹ So nou, unu niid fi don di wok we unu did staat laas ier. Gi aal we unu kyan gi, da wie de piipl wi si se unu wel waahn fi si di wok don, siem laik ou unu di wel waahn it fi staat.

¹² Umoch yu av no mata, Gad no bizniz wid umoch yu av ar no av. Wa mata a umoch yu waahn fi gi outa we yu av.

¹³ Mi naa se unu fi gi so moch dat unu naa notn lef fi unuself. Mi naa chrai fi mek fi dem luod lait an fi unu uon evi, bot mi waahn evribadi fi av, mi no waahn som fi av, an som no av notn.

¹⁴ Rait ya nou unu av muor dan unu niid an dem no av notn, so unu fi shier wa unu av wid dem. An den wen dem av muor dan dem niid an unu no av notn, dem wi shier wa dem av wid unu. Da wie de evribadi wi av wen dem niid it.

¹⁵ Jos laik it rait dong iina Gad wod se, “Di wan dem we did gyada op nof, neva av tu moch an di wan dem we did gyada op likl, neva av tuu likl.”

¹⁶ Wi tangk Gad kaaz im mek Taitos lov an kier fi unu siem laik wi lov an kier fi unu.

¹⁷ Wen wi did beg im fi go luk fi unu, im kwik taim se yes. Im lov unu so moch dat im did wel waahn fi du it — wi neva riili afi aks im fi du it.

¹⁸ A no jos Taitos a kom, wi a sen wan a wi breda dem wid im. Da breda de, im priich Gad wod, an aal a di choch piipl dem rispek im siek-a di gud wok we im a du.

¹⁹ Dem no jos rispek im, bot di choch dem pik im fi go wid wi wen wi go a Judiya fi gi out aal a di sitn dem we dem kalek op an sen. Wi a kyari dem sitn ya go a Judiya, so dat Gad wi get di priez an fi shuo di piipl dem se wi wel waahn fi elp dem.

²⁰ Wi a sen da breda de wid Taitos kaaz unu si di sitn dem wa unu sen, wi no waahn nobadi fi se wi naa anggl dem rait.

²¹ Wi a du evriting fi mek shuor se wi diil wid dem rait, kaaz wi no jos waahn fi mek Gad api, bot wi waahn evribadi fi api wid di wok we wi a du.

²² Wi no jos sen Taitos an da breda de wan, wi sen wan neda wan a wi breda wid dem tu. Wi tes da breda ya an wi fain se im eva redi fi elp, an nou im waahn fi elp unu iivn muor dan bifuo kaaz im chos unu nof nof.

²³ Nou yu si Taitos, im a mi fren we wok wid mi fi elp unu. An di tuu breda dem, a di choch dem pik an sen dem, an di wok we dem du wi kaaz piipl fi priez Krais Jiizas.

²⁴ So shuo dem lov an chriit dem gud so dat aal a di choch dem wi si se aal a di sitn dem we wi se bout unu, a chuu.