Read Jamaican Patois 2 Piita 9 Bible Online

2 Piita 9 - Jamaican Patois bible

2 Piita 9

¹ So nou, mi nuo se mi neva afi rait unu bout di sitn dem we unu a gyada op fi sen go Judiya fi di Juu dem we staat biliiv iina Krais Jiizas.

² Mi no afi rait unu kaaz mi nuo se unu wel waahn fi elp. Mi aal buos bout unu tu Gad piipl we de iina Masiduoniya. Mi tel dem ou fram laas ier di uol a unu iina Akaiya redi fi elp an kaaz unu redi fi elp, it mek dem wel waahn fi elp tu.

³ So mi a sen Taitos an di tuu breda dem tu unu kaaz mi waahn fi mek shuor se unu redi, jos laik mi se. Da wie de piipl wi nuo se aal a di sitn dem we mi se bout unu a chuu, an a no jos chat mi a chat.

⁴ Mi waahn fi mek shuor se unu redi kaaz ef som piipl fram Masiduoniya kom wid mi, an wen wi riich de unu no redi, a shiem mi wuda shiem. (Unu wuda muor dan shiem.) Wi wuda shiem kaaz wi did a buos bout ou unu redi.

⁵ A dat mek mi did tingk it impuotant fi wi breda dem kom si unu bifuo mi kom dong de. Mi push dem fi go orli so dat dem kuda mek shuor se aal a di sitn dem we unu did pramis fi gi, gyada op an pudong. Kaaz ef evriting gyada op an redi wen mi riich de, it wi shuo se a gi unu riili waahn fi gi; it wi shuo se nobadi naa fuos unu fi du notn.

⁶ So dis a wa mi waahn unu fi memba: Di wan we plaant likl bit a siid a-go riip likl bit a sitn, an di wan we plaant uol iip a siid a-go riip uol iip a sitn.

⁷ Evribadi mos gi wa dem disaid iina dem aat se dem fi gi. Yu no fi gi an den sari se yu gi. Nobadi shuda afi fuos yu fi du it niida kaaz Gad lov piipl we api fi gi.

⁸ Gad av di powa fi gi unu aal we unu kuda niid an im wi aalwiez gi yu muor dan inof so dat unu kyan gi tu piipl we niid it.

⁹ It rait dong iina Gad wod se: “Gad aalwiez gi di puor we dem niid, im no uol bak notn fram dem; Im gud an kain fi eva an eva.”

¹⁰ Nou, Gad, we gi di faama siid fi plaant an we gi piipl bred fi iit, im wi gi unu aal di siid we unu wuda niid fi plaant an im wi mek dem gruo tu. Im wi mek shuor se unu aalwiez av muor dan unu niid, so dat unu kyan aalwiez gi tu ada piipl.

¹¹ Im wi gi unu evriting we unu niid so dat unu kyan aalwiez gi tu ada piipl. An wen unu shier wa unu av wid ada piipl, unu wi kaaz dem fi gi Gad tangks tu.

¹² So wen unu shier wa unu av wid di Juu dem iina Judiya we biliiv iina Krais Jiizas, unu no onggl a gi dem wa dem niid, bot unu a kaaz dem fi gi Gad tangks nof nof.

¹³ Siek-a wa unu a du, dem wi priez Gad kaaz unu biliiv an fala di Gud Nyuuz bout Krais Jiizas an kaaz unu shier wa unu av wid dem an ada piipl tu.

¹⁴ Dem lov unu an wel waahn fi si unu. An wen dem a prie dem memba unu, kaaz dem si ou Gad bles unu an yuuz unu fi elp dem nof nof.

¹⁵ Tangk Gad fi di gif we im gi wi. Da gif de so big an so gud mi no iivn nuo ou fi taak bout it.