Read Jamaican Patois 1 Jan 1 Bible Online

1 Jan 1 - Jamaican Patois bible

1 Jan 1

¹ Da leta ya a kom fram mi, Paal, wan a Jiizas Krais apasl. A no wan gruup a piipl mek mi ton apasl an a no man gi mi da wok ya fi du niida. Bot a Jiizas Krais an Gad we mek im kom bak alaiv sen mi fi bi wan apasl.

² A mi an di uol a di breda dem we de ya wid mi a rait da leta ya, an it a fi aal a di piipl dem we go di choch dem iina Gyaliesha.

³ Mi prie se wi Faada Gad an wi Laad Jiizas Krais wi shuo unu lov iivn duo wi no dizorv it an gi unu piis iina unu aat.

⁴ Jiizas gi op im laif fi siev wi fram wi sin dem an fi frii wi fram aal a di wikid sitn dem we a apm nou. A dat Faada Gad did waahn im fi du an so a dat im du.

⁵ Mi prie se di uol a wi wi priez Gad fi eva an eva! Iemen!

⁶ Mi fraitn fi si ou unu kwik fi ton we fram Gad we pik unu an we sen Jiizas fi bi gud an kain tu unu. Unu ton we fram di chuu mesij an staat fala som ada mesij.

⁷ Dem ada mesij de a no di chuu mesij — a onggl wan chuu mesij de bout. Bot yu av som piipl we a kanfyuuz unu an we waahn fi chienj op di chuu mesij bout Krais Jiizas.

⁸ Bot iivn ef a wan a wi ar wan ienjel fram outa evn kom an a priich sopm difrant fram di chuu mesij we wi did priich tu unu, mi prie se Gad wi fling im dong a el mek im sofa.

⁹ Mi se it bifuo an mi a se it agen, ef nobadi kom an priich sitn we no lain op wid di chuu mesij we unu did ier — mi prie se Gad wi fling im dong a el mek im sofa.

¹⁰ Nou, wen mi taak so, a uu unu tingk mi a chrai fi win uova, Gad ar man? A uu unu tingk mi a chrai fi mek api? Ef mi did stil a chrai fi mek piipl api wid mi, mi wudn bi wan sliev fi Krais Jiizas.

¹¹ Breda an sista mi waahn unu fi nuo se di mesij we mi priich tu unu, a no notn we nobadi mek op an tel mi.

¹² Nobadi neva bring it kom gi mi ar tiich it tu mi. Di mesij we mi priich tu unu kom fram Gad an a Jiizas shuo it tu mi.

¹³ Kaaz unu ier bout ou mi did stie wen mi did a worship Gad laik ou di Juu dem worship Gad. Unu ier bout ou mi yuus tu go roun an a mek Gad piipl sofa bad bad an a mash op dem choch.

¹⁴ Dem die de, mi did wie a’ed a di ada Juu dem we a did di siem iej laik mi. Kaaz mi did a fala di sitn dem we wi faada faada dem kom dong did tiich. An mi fala it muor dan di uol a dem.

¹⁵ Bot Gad gud an kain tu mi. Im pik mi fram mi baan an im kaal mi fi du im wok. An wen im did redi

¹⁶ im mek mi nuo im Bwai Pikni, Jiizas, so dat mi kuda tiich di piipl dem we a no Juu bout im. Mi neva go taak tu nobadi wen dem sitn de apm tu mi,

¹⁷ an mi neva go a Jeruusilem fi si dem we ton apasl bifuo mi. Di fos ting mi du a go a Ariebiya an afta dat mi go baka Damaskos.

¹⁸ A chrii ier afta dat mi go a Jeruusilem go si Siifas an mi spen fiftiin die wid im.

¹⁹ Wen mi de de mi si Jiemz, di Laad breda, bot mi neva si non a di ada apasl dem.

²⁰ Gad a mi witnis. Aal a di sitn dem we mi rait tel unu a chuu sopm — mi naa tel unu no lai.

²¹ Mi lef fram Jeruusilem an go a Siriya an Silisiya.

²² Bot di piipl we fala Jiizas an we go di choch dem iina Judiya neva nuo we mi luk laik.

²³ Dem did onggl ier bout mi. Dem ier se, “Paal, di wan we mek nof a Gad piipl sofa an we chrai mash op nof choch, chienj im wiez an ton roun nou a tiich di mesij bout Jiizas. Im staat du di siem sitn we im did a chrai fi tap.”

²⁴ An dem priez Gad siek-a wa apm tu mi.