Read Jamaican Patois 1 Jan 3 Bible Online

1 Jan 3 - Jamaican Patois bible

1 Jan 3

¹ Unu fuul-fuul Gyalieshan unu! A uu guzum unu? Mi tel unu klier klier tu unu fies ou Jiizas did ded pan di kraas.

² So a wan ting mi waahn unu fi tel mi nou: Unu get di Spirit chuu unu fala di Laa ar kaaz unu biliiv wa unu did ier?

³ A so unu fuul? Unu staat out a fala Gad Spirit an nou waahn go chrai fi don wid unu uona chrent?

⁴ Aal a di sitn dem we unu go chuu — unu did a sofa fi notn? A kyaahn so it go!

⁵ Wa mek Gad gi unu im Spirit an wok mirikl mongks unu? Unu tingk im du it kaaz unu fala di Laa ar kaaz unu biliiv wa unu ier?

⁶ Luk pan Iebriyam, “Im did biliiv iina Gad. An kaaz im chos iina Gad, Gad si im az sumadi we du rait, an tingz did rait bitwiin im an Gad.”

⁷ So unu niid fi andastan se di wan dem we chos iina Gad laik Iebriyam — a dem a Iebriyam pikni.

⁸ Gad did av a plan fi mek tingz rait bitwiin im an di piipl dem we a no Juu. Ef dem biliiv iina im, im wuda siev dem an tek we dem sin. Dis a did di gud nyuuz we Gad tel Iebriyam fram wie bak wen an we rait dong iina Gad wod. Gad tel Iebriyam se, “Piipl fram aal difrant konchri a-go get bles siek-a wa yu du.”

⁹ So enibadi we biliiv iina Gad laik ou Iebriyam did biliiv — Gad a-go bles dem jos laik ou im bles Iebriyam.

¹⁰ Gad a-go ponish di piipl dem we a fala di Laa an tingk se dat a-go siev dem. Kaaz nobadi kyaahn fala aal a di Laa dem an it rait dong iina Gad wod se, “Enibadi we no fala aal a di Laa dem, Gad a-go ponish dem.”

¹¹ So unu mos kyan si klier klier nou se nobadi kyaahn mek tingz rait wid Gad jos chuu dem a fala di Laa. It aal rait dong se, “Di piipl dem we mek tingz rait wid Gad an we get dem sin tek we — dem a-go liv fi eva kaaz dem chos iina Gad.”

¹² Bot yu no afi biliiv iina Gad fi fala di Laa, di Laa no av notn fi du wid dat. It rait dong iina Gad wod se, “Di wan dem we a fala di Laa an du evriting we di Laa se dem fi du — dem wi liv azkaadn tu ou di Laa se dem a-go liv.”

¹³ Nou wi no aalwiez fala aal a di Laa dem an siek-a dat Gad wuda ponish wi. Bot Krais Jiizas siev wi fram get ponish wen im kom an sofa fi wi. Im get ponish so wi wudn get ponish. It aal rait dong iina Gad wod se, “Enibadi we dem eng op pan wan kraas — Gad a ponish dem.”

¹⁴ Jiizas ded fi wi so dat di piipl dem we a no Juu an we biliiv iina im kyan get bles siem laik ou Gad did bles Iebriyam. Im du it tu so dat wen wi chos iina im wi kyan get di Spirit we Gad pramis fi gi wi.

¹⁵ Breda an sista, mi a-go yuuz sopm we wi du evridie fi chrai an mek unu andastan wa mi a taak bout. Se tuu piipl mek a diil an di tuu a dem pramis fi du fi dem paat. Nobadi kyan brok da diil de ar ad notn tu it.

¹⁶ Nou di pramis we Gad mek tu Iebriyam, a did fi Iebriyam an im pikni. Gad wod neva se a nof piipl — it neva se “an tu im pikni dem.” Wa rait dong iina Gad wod a “tu im pikni.” A wan sumadi it a taak bout, an da sumadi de a Krais Jiizas.

¹⁷ Wa mi a chrai fi se a dat Gad did mek wan pramis tu Iebriyam, wan pramis we im naa go brok. Fuo onjrid an toti ier lieta, Gad gi wi di Laa. Da Laa de no miin se Gad naa go kip im pramis tu Iebriyam. Di Laa kyaahn chienj dat.

¹⁸ Nou ef Gad gi wi wa im gi wi kaaz wi fala di Laa — it miin se im wudn a kip im pramis. An siem laik ou Gad bles Iebriyam kaaz a dat im pramis fi du, a siem so im a-go bles wi kaaz a dat im did pramis. So, im naa bles wi kaaz wi fala di Laa, bot kaaz a dat im se im wuda du.

¹⁹ Nou som piipl a-go se, “So wa wi get di Laa fa?” Gad mek wan pramis tu wi bot im gi wi di Laa kaaz wi did a sin an im waahn wi fi liv rait. Gad did waahn piipl fi fala da Laa de til wen Iebriyam pikni, we Gad se im wuda bles, kom. Nou wen Gad did a gi wi di Laa — im sen som ienjel fi tel Muoziz an den Muoziz kom tel wi. So Muoziz a did wi lingk tu Gad.

²⁰ Bot wen Gad did a mek im pramis tu Iebriyam, im neva sen nobadi — im kom taak tu im imself.

²¹ Wiet so dat miin se di Laa a go gens Gad Pramis? Nuo sa! Kaaz ef di Laa we Gad gi wi kuda mek wi liv fi eva, den wi wuda a mek tingz rait wid Gad wen wi fala di Laa.

²² Bot a no so it go. Iina Gad wod it rait dong se, sin av powa uova evribadi iina di worl, it komiin laik se wi iina prizn. An so Gad pramis fi siev wi an mek wi liv fi eva ef wi biliiv iina Jiizas Krais.

²³ Bifuo di taim kom wen wi kuda chos iina Jiizas an get siev, di Laa did av wi laik prizna. An it did av wi laik prizna til a did taim fi Gad shuo se wi kuda mek tingz rait wid im ef wi biliiv iina Jiizas.

²⁴ So di Laa did a gyaad wi til Krais Jiizas kom. It did a elp wi fi liv rait so dat wen Jiizas kom wi kuda mek tingz rait wid Gad, ef wi biliiv iina im.

²⁵ Bot nou a taim wen wi kyan chos iina Jiizas an get siev, so wi no afi fala di Laa no muor — di taim fi it ruul uova wi don.

²⁶ Nou aal a unu a Gad pikni kaaz unu biliiv an chos iina Jiizas Krais.

²⁷ Aal a unu get baptaiz, an so nou unu an Jiizas a wan. An wen unu get baptaiz unu staat fi biyiev an gwaan laik im.

²⁸ Unu no plit op no muor. Unu no av piipl we a Juu an piipl we a no Juu ar piipl we a sliev an piipl we frii. It no iivn mata ef unu a man ar uman, aal a unu a wan kaaz aal a unu biliiv iina Jiizas.

²⁹ An ef unu bilang tu Krais Jiizas, den unu a Iebriyam pikni an aal a di sitn dem we Gad pramis fi gi Iebriyam, unu wi get tu.