Read Jamaican Patois 1 Jan 4 Bible Online

1 Jan 4 - Jamaican Patois bible

1 Jan 4

¹ So wa mi a se a dat iivn duo wan pikni uon evriting we im faada av an wan die a-go ruul uova it — til im get big, im komiin jos laik wan sliev.

² Im a laik wan sliev kaaz wen im likl im no uon notn ar inchaaj a notn. Ada piipl ruul uova im til di die wen im faada se im kyan ron tingz.

³ So yu si wi, wi a laik da pikni de. Wen wi did yong, di spirit dem we did av kanchuol uova di worl did av wi laik sliev.

⁴ Bot wen di taim we Gad set did kom, im sen im Bwai Pikni, Jiizas. Iivn duo im a did Gad pikni, Jiizas baan jos laik mi an yu. Im did av wan mada an im did afi fala di Laa tu.

⁵ Gad sen im Bwai Pikni fi frii aal a wi we a did sliev tu di Laa so dat di uol a wi kuda ton Gad pikni.

⁶ An kaaz di uol a wi a nou im pikni, Gad sen im Bwai Pikni Spirit fi kom liv iina wi aat. An a da Spirit de we kaaz wi fi baal out, “Faada, mi Faada.”

⁷ So unu a no sliev no muor; unu a Gad pikni. An kaaz unu a im pikni, unu a-go get aal we Gad pramis fi gi im pikni dem.

⁸ Iina di paas, wen unu an Gad neva kluos, unu a did sliev. Unu a did sliev tu di sitn dem we unu kaal gad bot we a no riili gad at aal.

⁹ Bot nou unu an Gad kluos — mi riili shuda se nou Gad mek it so unu an im kyan kluos — ou unu kyan ton unu bak pan im an a go bak go fala di wiik spirit dem we a ruul di worl an we naa no powa? Unu waahn go bak go ton dem sliev agen?

¹⁰ Unu av speshal die, mont an taim iina di ier wen unu go selibriet an av festival.

¹¹ Mi fried fi unu. Yu miin se aal a di wok we mi du — aal di tiich mi did tiich unu — aal a dat a fi notn?

¹² Mi a wan Juu an mi naa fala di Laa — mi komiin jos laik unu we a no Juu. So breda an sista mi a beg unu, du laik mi an no bada fala di Laa. Unu neva du mi notn rang bifuo.

¹³ Unu nuo se a chuu mi did sik mek mi did kom priich di Gud Nyuuz tu unu di fos taim.

¹⁴ An iivn duo mi siknis did mek tingz aad fi unu, unu neva kin op unu nuoz pan mi ar ton unu bak pan mi. Insted-a dat unu welkom mi laik ou unu wuda welkom wan ienjel fram Gad ar laik ou unu wuda welkom Jiizas Krais.

¹⁵ Dem taim de unu did api, a wa apm fi chienj dat? Kaaz mi nuo fi shuor se dem taim de unu wuda du eniting fi mi. Ef unu kuda tek out unu uona yai dem gi mi, unu wuda du it.

¹⁶ So wa, mi a unu enimi nou kaaz mi tel unu di chuut?

¹⁷ Yu si dem piipl de we a chienj op di Gud Nyuuz, dem wel waahn fi win unu uova. Dem waahn unu fi jain dem bot dem no miin unu no gud. Wa dem a chrai fi du a ton unu gens mi, kaaz dem wel waahn unu fi fala dem wid aal a unu aat.

¹⁸ It gud fi fala sitn wid aal a yu aat yu nuo, bot onggl ef wa yu a fala a sopm gud an yu a du it fi di rait riizn. A dat unu fi du aal di taim, no jos wen mi de de wid unu.

¹⁹ Mi pikni we mi lov, jos laik ou mada go chuu nof pien wen dem a av biebi — a siem so mi a fiil pien fi unu. An mi naa go tap fiil pien til unu an Jiizas a wan, an unu staat fi biyiev laik im.

²⁰ Mi wish wid aal a mi aat se mi kuda de de wid unu nou an taak tu unu likl saafa. Kaaz mi kyaahn andastan wa a gwaan wid unu an mi a wori bout unu.

²¹ Tel mi sopm, aal a unu we waahn fi fala di Laa an mek it kanchuol unu, unu no andastan wa di Laa a se?

²² Kaaz it rait dong se Iebriyam did av tuu bwai pikni. Wan a dem mada a did wan sliev bot di neks wan mada did frii.

²³ Di bwai we mada a sliev baan jos laik ou eni ada biebi baan an im mada get im siem laik ou ada mada get biebi. Notn neva speshal bout im. Bot di bwai we mada did frii im did speshal. Im baan kaaz Gad did pramis Iebriyam se im an Siera wuda av wan pikni.

²⁴ Nou wi kyan tek wa apm wid Iebriyam tuu bwai an yuuz it fi shuo di tuu pramis dem we Gad mek. Di fos pramis afi du wid di Laa we Gad gi Muoziz op a Mount Sainai. Da pramis ya a laik Iegar. Jos laik ou fi ar pikni a sliev a siem so di piipl dem we a paat a da pramis ya, a sliev tu.

²⁵ So nou Iegar tan fi Mount Sainai we de iina Ariebiya. Shi komiin laik Jeruusilem iina dem taim ya, kaaz, siem laik ou Iegar an ar pikni a did sliev, a siem so di piipl dem we liv a Jeruusilem a sliev tu di Laa.

²⁶ Bot di ada uman, shi tan fi di nyuu Jeruusilem we a-go de iina evn. Shi frii, an a shi a wi mada so wi frii tu.

²⁷ Kaaz it rait dong iina Gad wod se: “Uman we kyaahn av biebi we naa no pikni — a unu fi a sing priez; Yu we neva fiil biebi pien yet — jomp op an sing an shout; kaaz di uman we naa nobadi — shi a-go av muor pikni dan di uman we av ozban.”

²⁸ So Breda an sista, siem laik ou Aizak baan kaaz a dat Gad did pramis Iebriyam, a siem so wi a Gad pikni kaaz a dat Gad did pramis.

²⁹ Iebriyam bwai pikni Ishmiyel did baan laik ou eni ada pikni baan bot Aizak did baan siek-a Gad Spirit. An siem laik ou Ishmiyel did kaaz Aizak fi sofa a siem so wi we a Gad pikni a sofa nou.

³⁰ Bot wa Gad wod se? It se, “Ron di sliev uman an ar pikni, kaaz fi ar pikni kyan neva get wa di faada a-go lef fi di frii uman an fi ar pikni.”

³¹ So breda an sista, wi a no di sliev uman pikni bot di frii uman pikni.