Read Jamaican Patois 1 Jan 5 Bible Online

1 Jan 5 - Jamaican Patois bible

1 Jan 5

¹ Gad frii wi so dat wi wudn afi fala di Laa. So tan op chrang an no mek notn ar nobadi tek unu ton unu bak iina sliev.

² Unu lisn mi gud! Mi, Paal, a tel unu se ef unu go mek dem sorkomsaiz unu, notn we Krais Jiizas du a-go wot notn tu unu at aal.

³ An agen mi a tel evribadi we go get sorkomsaiz se dem afi fala di Laa. An no jos som a di Laa bot di uol a di Laa.

⁴ Yu si di wan dem we gaan bak gaan fala di Laa an tingk se dat a-go mek tingz rait bitwiin dem an Gad — dem kot aaf demself fram Krais Jiizas. Unu a mek it so dat Gad naa go kyan gud an kain tu unu.

⁵ Bot yu si wi, di wan dem we a chos iina Jiizas Krais, di Uoli Spirit mek wi nuo fi shuor se wi a-go get aal a wa Gad pramis fi gi wi. So wi kyan wiet an luk fi aal we Gad pramis fi gi wi kaaz Gad mek tingz rait bitwiin wi an im aredi.

⁶ Kaaz wen yu an Jiizas a wan it no mata ef yu sorkomsaiz ar yu no sorkomsaiz. Di onggl ting wa mata a dat yu chos iina im. An yu shuo se yu chos iina im wen yu shuo lov.

⁷ Unu did a ron so aad an a gwaan so gud! A uu kaaz unu fi tap fala an biliiv iina di chuut?

⁸ A kyaahn Gad we kaal unu fi bi im pikni, a kaaz unu fi tap fala di chuut.

⁹ Laik piipl aalwiez se, “Yu onggl niid wan likl bit a yiis fi mek di uol duo swel op.”

¹⁰ Mi biliiv iina Gad, an so mi shuor se unu naa go ton unu bak pan aal we mi tiich unu an go fala wa dem ada piipl de a se. Bot yu si di wan dem we a chrai fi kanfyuuz unu, uu eva dem waahn fi bi, Gad a-go ponish dem.

¹¹ Nou breda an sista, ef mi did a priich se piipl mos sorkomsaiz stil, unu tingk se di Juu dem wuda stil a mek mi sofa aal nou? Ef mi did a priich dat insted-a priich bout ou Jiizas ded pan di kraas fi wi, dem wudn beks no muor, kaaz mi wuda a du wa dem waahn.

¹² Mi wish se di wan dem we a chrai fi kanfyuuz an a tel unu fi go get sorkomsaiz wuda jos go chap aaf aal a fi dem uon.

¹³ Breda an sista, Gad kaal unu so dat unu kuda frii fram di Juu dem Laa. Bot dat no miin se unu kyan go liv eni ou unu waahn fi liv. Wa unu fi du a sorv an lov wan aneda.

¹⁴ Wen yu luk pan it, aal di Laa riili a tel unu fi du a fi “Lov unu nieba laik ou unu lov unuself.”

¹⁵ Bot ef unu kip aan a bait an chaa op chaa op unu wan aneda laik unu a wail animal, unu beta wach out, kaaz unu a-go mash op unu wan aneda.

¹⁶ Mi a tel unu liv unu laif laik ou Gad Spirit se unu fi liv. Da wie de unu naa go gi iin tu sin an du di rang sitn dem we unu eva waahn fi du.

¹⁷ Kaaz di rang sitn dem we di badi waahn fi du, di Spirit no waahn dat. An di sitn dem we di Spirit waahn fi du, di badi no waahn dat. Di tuu a dem eva a fait wid dem wan aneda, a so mek unu kyaahn aalwiez du wa unu waahn fi du.

¹⁸ Bot ef Gad Spirit liid unu, di Laa naa no powa uova unu.

¹⁹ Aal a wi nuo bout di sitn dem we piipl du wen dem mek dem badi kanchuol dem. Dem de piipl de sliip roun sliip roun wid evribadi an evriting. Dem main an aat doti. Dem naa no kanchuol uova demself.

²⁰ Di piipl we mek dem badi kanchuol dem worship aal kain-a faalz gad an wok uobiya. Dem chriit piipl aad an dem lov kos an fait. Dem bad main piipl fi we dem av an it no tek notn fi set dem aaf. Di piipl dem we mek dem badi kanchuol dem eva waahn piipl fi rispek dem bot dem no rispek nobadi. Dem onggl bizniz wid demself. Dem kaaz piipl fi plit op an dem onggl taak tu dem fren.

²¹ Aal dem waahn, a wa ada piipl av. Dem de piipl de eva a jringk tu moch, an a go aal kain-a wail paati. A dem de kain-a sitn de dem lov du. Mi a waan unu jos laik ou mi did waan unu bifuo: di wan dem we mek dem badi kanchuol dem an we du aal a di sitn dem we mi jos taak bout — dem naa go kyan tek paat iina Gad kindom.

²² Bot Gad Spirit kaaz fi im piipl fi lov evribadi an aalwiez api no mata wa. It kaaz dem fi liv gud wid piipl, no fi lov fait an fi aalwiez tek taim wid ada piipl. Di Spirit mek dem kain an mek dem eva a du gud fi piipl. It kaaz dem fi bi sumadi we piipl kyan chos.

²³ Di Spirit mek dem jengkl an mek dem nuo ou fi kanchuol demself. No Laa no de bout we wi tap yu fram liv so.

²⁴ Di piipl dem we bilang tu Jiizas Krais no mek dem badi ruul dem. Dem no du di wikid sitn dem we dem badi wel waahn du, dem tap dem sitn de. It komiin laik se dem niel dem op pan di kraas an kil dem.

²⁵ So sins Gad Spirit gi wi laif, mek wi liv ou di Spirit waahn wi fi liv.

²⁶ Mek wi no get ful-a wiself an tingk se wi beta dan ada piipl. Mek wi no provuok wan aneda an mek wi no red yai fi wan aneda sitn dem.