Read Jamaican Patois 2 Jan 1 Bible Online

2 Jan 1 - Jamaican Patois bible

2 Jan 1

¹ Mi a Paal. Gad pik mi fi bi wan a Jiizas Krais apasl, kaaz a dat im did waahn. Mi a rait da leta ya tu aal a Gad piipl we de iina Efisos an we riili chos iina Jiizas.

² Mi a prie se Faada Gad an wi Laad Jiizas Krais, wi shuo unu lov iivn duo wi no dizorv it an gi unu piis iina unu aat.

³ Wi priez Gad. Im a di Gad an Faada fi wi Laad Jiizas Krais. Kaaz wi an Krais Jiizas a wan, Faada Gad mek wi spirit api an mek wi kyan tek paat iina evriting gud we kom fram evn.

⁴ Fram wie bak wen, bifuo Gad mek di worl, im pik wi an mek wi an Jiizas wan. Im pik wi, so dat wi kyan liv kliin an no av notn bad iina wi laif fi kip wi we fram im. Siek-a ou im lov wi,

⁵ im mek op im main fram wie bak wen se im wuda tek wi fi im pikni dem, siek-a wa Jiizas Krais wuda du. A dat im did waahn an it mek im api.

⁶ Im du aal dem sopm ya so dat wi wuda priez im fi ou im gud an kain tu wi. An im shuo wi ou im gud an kain tu wi wen im sen Jiizas tu wi.

⁷ Jiizas gi op im laif pan di kraas an fi im blod mek wan wie fi frii wi an paadn wi fram wi sin dem. A chuu Gad gud an kain mek dem sopm ya kyan apm.

⁸ An im did riili gud an kain tu wi — gud an kain kyaahn don. Pan tap a dat, im mek wi waiz an kyan andastan evriting.

⁹ An kaaz Gad did waahn wi fi nuo, im tel wi aal a im plan dem we nobadi neva nuo bout. Fram di staat, im did mek op im main fi yuuz Jiizas fi du aal a di sitn dem wa im plan.

¹⁰ Wen Gad mek op im main se di taim rait, im wi mek Jiizas ruul an av powa uova evribadi an uova aal a di sitn dem we iina evn an wa de pan di ort.

¹¹ Gad mek evriting apm jos laik ou im plan dem fi apm, an fram wie bak wen, im pik wi fi bi im piipl siek-a Jiizas an wa im wuda du.

¹² Im pik wi, so dat wi, we a did di fos wan dem fi chos iina Krais Jiizas, wuda kaaz piipl fi priez Gad, wen dem si ou im big an powaful.

¹³ An wen unu did ier Gad wod — di chuu mesij we siev unu — wen unu biliiv iina Krais Jiizas, Gad gi unu im Uoli Spirit we im did pramis, fi shuo se unu a fi im.

¹⁴ Di Uoli Spirit a onggl paat a aal a wa Gad pramis fi gi wi. Wi wi get di ada sitn dem wen im don frii aal a im piipl dem. Im du it da wie de so dat piipl wuda priez im wen dem si ou im big an powaful iina evri wie.

¹⁵ So nou, siek-a aal a dem sitn ya, fram di fos taim mi ier se unu chos iina di Laad Jiizas an dat unu lov Gad piipl,

¹⁶ mi no tap gi tangks fi unu wen mi a prie.

¹⁷ Mi prie se di Gad fi wi Laad Jiizas, di Faada we big an powaful iina evri wie, wi kaaz unu fi waiz an andastan evriting, so dat unu kyan nuo im beta.

¹⁸ Mi prie se Gad wi uopm unu main, so unu kyan andastan di sitn dem we im kaal wi fi tek paat iina. An mi prie se unu wi andastan se di sitn dem we Gad pramis fi gi im piipl dem big an nof.

¹⁹ Pan tap a dat, mi prie se unu wi andastan se notn kyaahn mach fi im powa we a wok fi di piipl we chos iina im. Da powa de a di siem chrang chrang powa

²⁰ we im yuuz mek Jiizas kom bak alaiv an gi im di tap-a-tap pozishan saida im iina evn.

²¹ Fram im ai pozishan wich paat im sidong iina evn, Krais Jiizas ruul uova evri spirit we av powa fi ruul iina dem taim ya an iina di worl we a kom.

²² Gad put evriting anda Krais Jiizas fut an gi im powa uova evriting. An Gad mek im di liida fi di choch.

²³ Nou, di choch a Jiizas badi. Jiizas gi di choch laif, an a im gi evriting evriwe laif.