Read Jamaican Patois 2 Jan 3 Bible Online

2 Jan 3 - Jamaican Patois bible

2 Jan 3

¹ Krais Jiizas mek mi, Paal, im prizna, so mi kuda priich tu unu we a no Juu.

² Nou, mi shuor se unu ier aredi ou Gad lov mi iivn duo mi no dizorv it. Im pik mi fi da speshal wok ya — fi priich tu unu we a no Juu.

³ Unu nuo ou Gad mek mi nuo bout im siikrit mesij, we nobadi neehn nuo bout bifuo. Mi no tuu lang rait likl bit bout it.

⁴ Wen unu riid wa mi rait, unu wi andastan wa mi nuo bout di siikrit mesij bout Krais Jiizas.

⁵ Gad neehn shuo da siikrit ya tu piipl bifuo nou. Bot iina dem taim ya, im mek di Uoli Spirit tel im piipl dem we im pik fi bi im apasl an prafit dem bout di siikrit.

⁶ Di siikrit mesij a dat wen piipl we a no Juu biliiv iina di Gud Nyuuz, dem ton Gad pikni an tek paat iina aal a di gud sitn dem Gad gi di Juu piipl dem. Pan tap a dat, aal a dem jain op tugeda wid di Izrel piipl dem we bilang tu Gad, an siek-a wa Jiizas du, dem gweehn get aal a wa Gad pramis fi gi im piipl dem.

⁷ Siek-a ou Gad lov mi iivn duo mi no dizorv it, im yuuz im powa an pik mi fi gi mi da wok ya fi tel piipl bout di Gud Nyuuz.

⁸ Iivn duo mi no impuotant laik di res a Gad piipl dem, Gad shuo mi lov iivn duo mi no dizorv it an pik mi fi priich tu di piipl dem we a no Juu an fi tel dem bout di nais sitn dem we Krais Jiizas gi im piipl. Dem sitn de so big dat nobadi kyaahn figa dem out.

⁹ Gad mek evriting an a im pik mi fi mek evribadi nuo bout im siikrit plan an ou di plan a-go wok out. Im did aid di plan fram evribadi, fram wie bak wen.

¹⁰ Gad du aal a dis so dat, iina dem taim ya, di choch wuda shuo di spirit dem we ruul an we av nof powa iina di skai, ou Gad riili riili waiz.

¹¹ A so Gad did plan it fi apm fram wie bak wen, an im mek Krais Jiizas wi laad mek it apm siem laik ou im did plan it.

¹² Siek-a Jiizas an kaaz wi chos iina im, im mek wi kyan kom tu Gad frii an no fried a notn.

¹³ So, mi a beg unu, no bada fiil bad an fiil laik se unu waahn fi gi op, siek-a ou mi a sofa. No du dat, kaaz wa mi a sofa a fi unu uona gud.

¹⁴ Sins mi nuo aal a dis, mi go dong pan mi nii an prie tu faada Gad.

¹⁵ A im mek evribadi we de a evn an aal uu de pan ort.

¹⁶ Gad powaful an im gud an kain kyaahn don, so mi prie se im Spirit wi mek unu chrang.

¹⁷ Chuu unu chos iina Krais Jiizas, mi prie se im wi liv iina unu aat. Unu tan chrang iina Gad lov jos laik ou chrii tan op chrang wen dem ruut gaan dong diip iina di grong. Siek-a dat,

¹⁸ mi prie se unu an di res a Gad piipl wi kyan andastan Krais Jiizas lov — im lov we big an braad laik di sii an im lov we so nof it riich di skai.

¹⁹ Mi prie se unu wi nuo bout Krais Jiizas lov iivn duo nobadi kyaahn figa out umoch im riili riili lov wi. Wen unu nuo bout Krais lov, Gad wi tek kanchuol a unu laif iina evri wie so til unu komiin jos laik im.

²⁰ Tangks an priez tu di muos powaful Gad! Im kyan du nof nof muor dan wa wi kyan tingk bout an nof muo dan wa wi kyan aks im fa, kaaz a fi im powa a wok iina wi laif!

²¹ Mek evribadi we bilang tu Jiizas, priez Gad fi eva an eva. Iemen!