Read Jamaican Patois 2 Jan 4 Bible Online

2 Jan 4 - Jamaican Patois bible

2 Jan 4

¹ So den, mi we de a prizn kaaz mi a sorv di Laad, a beg unu — unu we Gad pik fi bi im piipl; mi a beg unu fi liv ou Gad waahn unu fi liv.

² Ombl unuself an lorn fi tek taim wid unu wan aneda. No bada rof op nobadi. Insted-a dat, aalwiez shuo lov wen unu a diil wid unu wan aneda. No kwik fi get beks.

³ Di Uoli Spirit mek di uol a unu ton wan. So du unu bes an mek shuor se unu liv gud wid unu wan aneda.

⁴ Aal a wi a wan badi an a onggl wan Uoli Spirit de, we liv iina wi. Gad kaal aal a wi tu im di siem wie. An aal a wi we Gad kaal a luk fi get di siem sitn fram im we im kaal wi fa.

⁵ A onggl wan Laad Jiizas Krais de. Aal a wi biliiv wan chuut an aal a wi get baptaiz fi wan riizn.

⁶ A onggl wan Gad de an a im a Faada fi evribadi, a im ruul uova evribadi, a im mek evribadi fi du im wok, an a im shuo imself iina evribadi.

⁷ Krais Jiizas gi evri wan a wi wan speshal gif fi wi spirit. Dat shuo umoch im lov wi iivn duo wi no dizorv it.

⁸ A dat mek it rait dong iina Gad wod se: “Wen im go op a di ai ai plies, im tek di piipl we a prizna an mek dem fala baka im an im gi nof gud sitn tu piipl.”

⁹ (Wen taim it se dat “Im go op a wan ai ai plies,” we dat miin? It no miin se im go dong iina di diip diip paat a di ort fos bifuo im go bak op?

¹⁰ Di siem wan we go dong iina di diip paat a di ort, a im siem wan go op a di ai ai plies, ai op muor dan di skai. Im du dat, so dat im kuda ruul di uol worl.)

¹¹ A im siem wan tek som a im piipl dem mek dem ton apasl. Im mek som ton prafit an im sen som fi go roun an priich di gud nyuuz. Im mek som ton paasn an tiicha.

¹² Im du aal a dis ya fi get Gad piipl redi fi du Gad wok an fi elp di choch fi gruo chrang

¹³ chrang, so til di uol a wi ton wan; wan, kaaz aal a wi chos iina Gad Bwai Pikni iina di siem wie, an aal a wi gruo op an biyiev jos laik im.

¹⁴ Wen da taim de kom, wi naa go komiin laik likl pikni we iizi fi get fuul op. Wi naa go komiin laik wan likl buot we di sii pich aal bout, ar we briiz bluo aal uova di plies. No laiyad, jinal tiicha kyaahn kom chrik wi ar fuul wi op.

¹⁵ Insted-a gwaan laik se wi a pikni, mek wi taak bout di chuu mesij bout Jiizas an mek wi liv laik ou di mesij se wi fi liv. An mek wi du it wid lov iina wi aat. Da wie de, wi wi gruo op chrang iina aal saat a wie an get fi komiin laik Krais Jiizas, di wan we a di ed fi di choch.

¹⁶ Di ed kanchuol di difrant paat dem pan di badi. An di jaint dem mek di difrant badi paat dem kanek op iina wan fi faam wan badi. Ef aal a di paat dem pan di badi du wa dem fi du, di badi wi gruo chrang. A siem so it go iina di choch. Wen evribadi du we dem supuoz fi du, di piipl dem iina di choch wi gruo chrang wid lov iina dem aat.

¹⁷ So, lisn nou! Mi a Gad sorvant so mi av di rait fi tel unu wa unu fi du. Unu no fi liv no muo laik di piipl dem we no nuo Gad. We dem piipl de main tel dem fi du no mek no sens.

¹⁸ Dem kyaahn andastan notn, an dem no av no lat an paat iina di nyuu laif we Gad gi, kaaz dem no nuo bout Gad. An dem no nou notn bout Gad, kaaz dem ton dem main gens im.

¹⁹ Dem no kier bout we rait ar rang no muo, kaaz dem no av no shiem. Dem eva waahn fi du di sitn dem we dem badi waahn — aal saat a naasi an wikid sitn. Dem jos kyaahn satisfai. Di muo dem du rang, a di muo rang dem waahn fi du.

²⁰ Bot unu nuo se di wie dem a liv no lain op wid wa wi tiich unu bout Jiizas Krais.

²¹ Mi shuor se wa unu ier bout im, an wa unu lorn bout im, a di chuu mesij bout im.

²² Unu lorn se unu fi don we wid di uol laif we unu yuus tu liv an aal a di woklis sitn dem unu yuus tu du, wen unu neva did a fala Jiizas. Dem taim de, unu did lov di wikid sitn dem we onggl did a mash op unu laif.

²³ Unu lorn ou fi kanchuol unu spirit an unu main fi tingk iina wan nyuu wie.

²⁴ An unu lorn fi liv laik wan nyuu sumadi we Gad mek aal uova agen. Gad mek unu fi tan jos laik im — fi du wa rait an wa gud an kliin azkaadn tu di chuut.

²⁵ So den, unu fi tap tel lai. Mek aal a wi taak di chuut tu wi wan aneda, kaaz di choch komiin laik wan badi, an aal a wi a paat a it.

²⁶ Ef unu get beks bout sopm, no mek dat kaaz unu fi sin. An no mek di die don an unu stil beks wid wan aneda.

²⁷ Unu no fi gi di devl no chaans niida. No mek im mek unu sin.

²⁸ Aal uu did a tiif mos tap tiif. Wa dem fi du a wok aad fi wa dem waahn. Da wie de, dem wi av inof fi shier wid piipl we no av notn.

²⁹ Unu fi tap chat doti chat. Taak gud sitn aal di taim. Da wie de, di sitn dem we unu se wi bil op di piipl dem we niid fi get bil op. An enibadi we ier we unu se wi nuo ou Gad lov dem iivn duo dem no dizorv it.

³⁰ No du notn fi mek Gad Uoli Spirit afi baal. A im liv iina unu an put im speshal maak pan unu fi shuo se unu bilang tu Gad an se wan die Gad a-go frii unu kaaz a dat im siev unu fa.

³¹ Tap kyari beli fi unu wan aneda, an beks op beks op an a get mad wid unu wan aneda — tap it. Tap kos out an tier dong unu wan aneda an unu no fi wikid tu unu wan aneda niida.

³² Unu fi kain an gud tu wan aneda. Unu no fi kip op wan aneda iina unu aat. Siem laik ou Gad paadn unu siek-a wa Jiizas Krais du, a siem so unu fi paadn unu wan aneda tu.