Read Jamaican Patois 2 Jan 5 Bible Online

2 Jan 5 - Jamaican Patois bible

2 Jan 5

¹ So den, sins unu a Gad pikni an im lov unu, unu fi chrai fi tan jos laik im.

² Lov unu wan aneda, jos laik ou Krais Jiizas lov unu. Im gi op im laif fi wi laik wan swiit sakrifais we dem bon pan alta gi Gad.

³ Unu a Gad speshal piipl. So non a unu no fi get miks op iina naasi laif laik: man a sliip wid uman we a no im waif, man a sliip wid man, ar uman wid uman. Unu no fi waahnti-waahnti niida. Dem de sitn de no fi de mongks Gad piipl at aal at aal.

⁴ No yuuz doti wod, an no bada wid aigl, kielis an fuul-fuul taak, kaaz Gad piipl no du dem sitn de. Wa unu fi du a gi Gad tangks.

⁵ Unu kyan nuo fi shuor se enibadi we sliip wid sumadi dem no marid tu, dem kyaahn tek paat iina di nais sitn dem we put op fi Gad piipl iina Faada Gad an Krais Jiizas kindom. Di siem ting go fi dem we du naasinis an dem we waahnti-waahnti (dem piipl de a worship faalz gad).

⁶ Unu no fi mek nobadi chrik unu wid wod we no mek no sens. Gad beks wid piipl we taak dem sitn de, an im gweehn ponish aal a uu chat fuulinish an no du we im se.

⁷ So, no kip kompni wid dem de saat a piipl de, an no tek paat iina dem fuulinish.

⁸ Wan taim, unu did a liv iina di daak laik piipl we no nuo Gad. Bot nou dat unu ton di Laad pikni, unu no iina daaknis agen, unu iina lait. So nou, unu mos liv laik piipl we de iina di lait,

⁹ (kaaz di sitn dem we kom fram di lait, a onggl wa gud, rait an chuu).

¹⁰ Chrai fain out we di Laad riili waahn unu fi du.

¹¹ Unu no fi tek paat iina di rang sitn dem we piipl we no nuo Gad an we a liv iina di daak a du. Wa unu fi du a mek evribadi si se di sitn dem we dem piipl de a du no mek no sens.

¹² Kaaz di sitn dem we dem a aid an a du, so naasi, piipl shiem fi taak bout dem.

¹³ Bot di lait shuo op aal a di sitn dem we iina di daak mek evribadi si.

¹⁴ Lait shuo op evriting an mek wi si wa dem riili komiin laik. A dat mek Gad wod se, “Unu we a sliip, wiek op, man. Aal a unu we ded, kom bak alaiv, an mek Krais Jiizas shain pan unu laka lait.”

¹⁵ Wach ou unu liv. No gwaan laik unu a fuul. Ak laik se unu av sens.

¹⁶ Evri chaans unu get fi du sopm gud, du it, kaaz a bier wikid sitn a gwaan iina dem taim ya.

¹⁷ So no bada gwaan laik unu chupid. Fain out we di Laad riili waahn unu fi du.

¹⁸ No bada jringk chrang jringk an get jongk an galang bad an gwaan wid aal kain-a naasinis. Wa unu fi du a mek di Uoli Spirit tek kanchuol a unu laif.

¹⁹ Da wie de, wen unu a taak tu wan aneda, unu kyan yuuz saamz, sing som im, an sing di sang dem we di Spirit gi unu. Unu wi kyan sing an mek myuuzik bobl iina unu aat an priez di Laad.

²⁰ Unu fi gi tangks tu Faada Gad aal di taim fi evriting. Unu fi gi im tangks siek-a wa di Laad Jiizas du fi unu.

²¹ Kaaz unu av nof rispek fi di Laad Jiizas, unu fi ombl unuself an lisn tu unu wan aneda.

²² Di uman dem we av ozban mos ombl demself an du we dem ozban se dem fi du jos laik ou dem wuda ombl demself an du we Krais Jiizas se dem fi du.

²³ Dem fi du dis kaaz di ozban a di ed a di waif siem laik ou Krais Jiizas a di ed fi di choch. Im a di wan we siev di choch, an di choch a fi im badi.

²⁴ Siem laik ou di piipl dem we mek op di choch ombl demself an du we Krais Jiizas se dem fi du, a siem so di uman dem fi ombl demself an du we dem ozban waahn dem fi du.

²⁵ Nou, di ozban dem fi lov dem waif siem laik ou Krais Jiizas lov di choch an ded pan di kraas fi it.

²⁶ Jiizas gi op im laif pan di kraas, so dat im kuda mek di choch kliin an set ar wan said fi Gad. A di Gud Nyuuz we powaful dat im tek wash ar an mek ar kliin.

²⁷ Krais Jiizas du dis so im kuda gi op im choch tu imself laik wan gruup a piipl we luk wel gud — wan we no av no doti spat, no ringkl ringkl, ar notn laik dat, bot wan we gud an kliin an no av no faalt at aal.

²⁸ A siem so ozban fi lov dem waif, siem laik ou dem lov dem uona self. Di wie ou im lov im waif shuo se im lov imself.

²⁹ Kaaz piipl no iet dem uona badi. Wa dem du a fiid an tek kier a demself, siem laik ou Krais luk aafa wi we mek op im choch.

³⁰ Im du it, kaaz wi a paat a fi im badi.

³¹ “Siek-a dat wan man wi lef im mada an faada yaad an go marid tu im waif, an di tuu a dem tugeda a-go komiin laik wan sumadi.”

³² It aad fi andastan we dem sitn ya miin. Matarafak, wa mi a taak buot ya-so nobadi neva nuo bout it bifuo. Bot Gad a mek wi nuo bout it nou. Mi a taak bout Krais Jiizas an im choch.

³³ Bot rait nou stil, mi a tel di ozban dem se dem fi lov dem waif jos laik ou dem lov demself. An di waif dem fi rispek dem ozban.