Read Jamaican Patois 3 Jan 1 Bible Online

3 Jan 1 - Jamaican Patois bible

3 Jan 1

¹ Da leta ya a kom fram mi, Paal. Timoti de ya wid mi tu. Di tuu a wi a Krais Jiizas sliev. Mi a rait tu aal a unu we liv iina Filipai we chos Krais Jiizas. An mi a rait tu aal a di bishop an di diikan dem tu.

² Mi prie se Faada Gad, an wi Laad Jiizas Krais wi lov unu, iivn duo wi no dizorv it. An mi prie tu se im wi gi unu piis iina unu aat.

³ Evritaim mi memba unu, mi gi Gad tangks fi unu.

⁴ Evritaim mi prie fi unu, sitn bobl op iina mi aat an mek mi wel api.

⁵ Mi api fi unu, kaaz fram di fos die unu biliiv unu staat elp mi pred di Gud Nyuuz, an aal nou unu stil a elp mi.

⁶ So mi nuo dis fi shuor se a Gad imself staat op da gud wok ya iina unu, an im naa go tap nou. Im a-go gwaan du we im a du iina unu laif, til Jiizas Krais kom baka ort.

⁷ Mi nuo se it aarait fi mi tingk da wie ya bout aal a unu, kaaz mi lov unu an aal a unu elp mi wen mi did a tan op an a difen di Gud Nyuuz, weda mi did lak op iina prizn ar mi did frii. Aal a unu tek paat iina di gud sitn we Gad gi mi fi du, iivn duo wi no dizorv it.

⁸ Gad si an nuo ou mi lang fi si aal a unu. Siek-a di lov we Krais Jiizas gi mi iina mi aat fi unu, mi riili lang fi si unu.

⁹ So mi riili a prie se unu wi lov unu wan aneda muor an muor, so unu kyan nuo an andastan

¹⁰ an fain out di sitn dem we rait. Mi prie se wen unu fain out dem sitn de unu wi liv rait so nobadi kyaahn paint no fingga pan unu wen Krais Jiizas kom bak,

¹¹ an dat evriting we unu du wi gud fi chuu — a onggl Krais Jiizas kyan mek unu du dem sitn de. Mi a prie fi aal a dat so dat Faada Gad wi get nof rispek an priez.

¹² Ier mi nou breda an sista, mi waahn unu fi andastan se aal we apm tu mi onggl mek di Gud Nyuuz bout Jiizas pred muor an muor.

¹³ Matarafak aal a di speshal suoja dem we gyaad di suoja kyamp wich paat mi de an evribadi els ya nuo se mi get lak op iina prizn kaaz mi a priich bout Jiizas Krais.

¹⁴ An siek-a ou mi iina prizn, muos a di breda an sista dem get briev an a priich Gad wod, an no friedi-friedi no muor.

¹⁵ Som a dem we a priich Gad mesij bad main fi riil an dem a luk waar wid wi. Bot som riili a priich Gad mesij outa wan gud aat.

¹⁶ Di wan dem we priich Gad mesij outa gud aat, du it kaaz dem lov mi an dem nuo se mi de ya fi tan op fi di Gud Nyuuz.

¹⁷ Di ada wan dem priich, bot dem no riili miin we dem a se, dem a du it fi di rang riizn. Dem a du it kaaz dem waahn fi mek mi av muo chobl fi diil wid iina prizn ya.

¹⁸ Bot wa dat tu mi? Di onggl ting we riili mata tu mi a se di Gud Nyuuz bout Krais Jiizas a priich weda dem a du it fi di rait ar fi di rang riizn. An kaaz it a priich, mi api, an mi a-go gwaan mek miself api.

¹⁹ Kaaz Jiizas Krais Spirit a elp mi, an kaaz unu a prie fi mi, mi nuo se aal a di sitn dem we apm tu mi a-go wok out so dat mi get frii.

²⁰ So diip dong iina mi aat, mi riili chos se notn we mi du ar we mi se a-go mek mi shiem. Bot laik mi aalwiez du, an a du rait ya nou, mi eva a-go priich an no fried a notn, an mi eva a-go mek Krais Jiizas get nof rispek, weda mi ded ar alaiv.

²¹ Ou mi si it, a Jiizas Krais mi a liv fa. An ef mi ded, it wuda onggl ton out beta fi mi.

²² Bot ef mi fi gwaan liv iina da badi ya, mi wi get fi du nof muor sitn fi Jiizas. So wich wan mi fi pik? Mi riili no nuo.

²³ Mi no nuo wich wan fi pik. It komiin laik eniwe mi ton maka juk mi. Mi wuda waahn fi ded an go liv wid Krais Jiizas dan tan ya, kaaz dat wuda uol iip beta fi mi.

²⁴ Bot unu niid mi fi elp unu. So, it wuda beta fi mi tan iina da badi ya.

²⁵ An mi nuo fi shuor se mi a-go tan ya wid unu an gwaan elp unu so dat unu wi chos iina Gad muor an muor, an so dat unu wi muor api bout wa unu biliiv.

²⁶ So wen mi kom bak kom luk fi unu agen, unu wi kyan priez Krais Jiizas nof muor, siek-a wa im yuuz mi fi du fi unu.

²⁷ So mek shuor se unu liv ou di Gud Nyuuz bout Krais Jiizas se unu fi liv. Da wie de weda mi kom luk fi unu, ar mi no kom, mi wi ier se aal a unu a tan op chrang tugeda fi di siem ting an a fait fi wa unu biliiv bout di Gud Nyuuz.

²⁸ An no mek nobadi we a fait gens unu fraitn unu niida. Tan op chrang an dat wi shuo dem se dem a-go luuz an dat unu a-go win. A Gad imself a-go mek unu win.

²⁹ Kaaz Gad so gud tu unu, im gi unu di chaans, no onggl fi biliiv iina Jiizas Krais bot fi sofa fi im tu.

³⁰ Di siem sitn dem we unu did si mi go chuu an ier se mi stil a-go chuu, a di siem sitn unu a diil wid nou.