Read Jamaican Patois 3 Jan 3 Bible Online

3 Jan 3 - Jamaican Patois bible

3 Jan 3

¹ Mi breda an sista, dem ya a di laas sitn dem we mi av fi se. Mi prie se Krais Jiizas wi mek unu wel api. A no notn fi mi rait tu unu bout di siem sitn dem uova an uova agen. Matarafak, dem wi elp kip unu sief tu.

² Mi a waan unu, wach out fi di daag aat piipl dem. Wach out fi dem — dem a uol wikid. Wach out fi dem man de we aalwiez a kot kot op dem badi.

³ Bot a wi a di piipl we riili get sorkomsaiz — no dem. Wi a di wan we worship Gad iina di Spirit, priez Krais Jiizas, an no buos aaf bout uu wi bi.

⁴ Mi dipen pan Gad iivn duo mi av nof sitn we mi kuda buos bout ef mi did waahn buos. Ef nobadi tingk se dem av notn fi buos bout, mi av nof muor.

⁵ Mi did get sorkomsaiz iet die afta mi baan. Fi mi mada an faada a baan Izrelait. Mi kom fram Benjamin chraib a piipl dem. Mi a Iibruu iina evri wie. Wen it kom tu di Laa, mi a wan Farisii we du evriting we di Laa se fi du.

⁶ Mi did so siiros fi du we mi tingk Gad di se fi du dat mi yuus tu mek Jiizas piipl dem sofa bad bad, kaaz mi did tingk dem did a go gens Gad. Wen it kom tu du we di Laa se, notn neva lef we mi neva du. So nobadi kudn paint no fingga pan mi.

⁷ Bot aal a dem sitn de wa mi yuus tu dipen pan fi mek mi rait iina Gad yai, dem komiin laik gyaabij nou. Dem no mek no sens nou dat mi an Krais Jiizas kluos.

⁸ Bot a no onggl dat, mi si se aal a dem sitn de no wot notn. Dem kyaahn kom kluos tu di powa we kom wen yu nuo mi Laad Jiizas Krais. Wen yu nuo Jiizas Krais, notn at aal kyaahn kom kluos tu dat. Evriting els komiin laik gyaabij tu mi nou. Mi gi op evriting fi get fi nuo Krais Jiizas an dat a di onggl ting we mata tu mi nou.

⁹ Mi waahn Jiizas fi tek ful kanchuol a mi — badi an suol. Mi naa dipen pan notn we di Laa se, ar we mi kyan du fi mek miself rait iina Gad yai. Mi a dipen pan di rait sitn dem we Jiizas du, kaaz fi get rait iina Gad yai yu afi dipen onggl pan wa Jiizas du.

¹⁰ Aal mi kier bout a fi nuo Krais Jiizas, an dat di powa we mek im kom bak alaiv wi wok iina mi. Mi waahn fi kyan go chuu eniting we mi afi sofa fi du we Gad waahn mi fi du, siem laik ou Krais Jiizas go chuu we im did sofa fi du we Gad did waahn im fi du. An siem laik ou im ded fi di rait riizn, mi mek op mi main fi ded fi im tu,

¹¹ so dat, iina som kain-a wie, mi kyan en op mongks di wan dem we kom bak alaiv afta dem ded.

¹² Mi naa se mi riich we mi waahn fi riich aredi, ar dat evriting we Jiizas kaal mi fa mi a it aredi. Bot mi a pres aad aad fi ton di kain-a sumadi Krais Jiizas pik an waahn mi fi bi.

¹³ Mi breda an sista, mi naa se mi a evriting we Krais Jiizas waahn mi fi bi yet. Bot da wan sitn ya mi a mek shuor a, mi naa luk bak pan di sitn dem we mi ton we fram. Mi a pres aad aad an a luk infronta mi an a riich fi wa a kom.

¹⁴ Mi a push aad fi go chuu an finish di ries an fi get di sitn dem we Gad pudong iina evn fi mi, kaaz a dat Gad kaal mi fi chos Krais Jiizas fa.

¹⁵ So aal a wi we tingk di wie Krais Jiizas waahn wi fi tingk, wi fi gwaan tingk da wie de. Bot ef non a unu no si tingz da wie de, Gad wi shuo unu an mek unu andastan wa mi se.

¹⁶ Eniwie, mek wi gwaan uol aan pan wa Gad mek wi nuo aredi.

¹⁷ So breda an sista, aal a unu fi liv laik ou mi liv. Luk fi di piipl dem we liv laik ou mi liv an fala dem.

¹⁸ Di sitn dem we mi a tel unu nou mi did tel unu bout dem nof taim aredi. An nou dat mi a tel unu agen, dem a mek mi baal kaaz nof a dem piipl de we a kaal demself Krais Jiizas falara, dem a muuv laik se dem a Krais Jiizas enimi — Krais Jiizas we ded pan di kraas.

¹⁹ Dem piipl de, fi dem gad a dem beli an wa dem badi waahn. Di sitn dem we dem shuda shiem bout, a dem sitn de dem a buos bout. Di onggl ting we ful op dem main a di sitn dem we iina da worl ya. Gad gweehn mash dong dem piipl de.

²⁰ Bot evn a fi wi konchri. An a de-so di wan we siev wi de, Jiizas Krais wi Laad, an wi kyaahn wiet fi im kom bak!

²¹ Im a-go yuuz im powa an kanchuol evriting. An im a-go yuuz da siem powa de an chienj wi wiik badi dem, an mek dem komiin laik fi im powaful badi.