Read Jamaican Patois Juud 2 Bible Online

Juud 2 - Jamaican Patois bible

Juud 2

¹ Mi waahn unu nuo ou aad mi a wok fi unu, an fi di piipl dem we de iina Leyodiisiya an fi aal a uu neva miit mi yet an no nuo wa mi luk laik.

² Mi a wok aad, so dat unu aat no jrap wen unu kom kraas prablem, an dat unu kyan kom tugeda an lov unu wan aneda. Da wie de Gad wi bles unu an mek unu get fi nuo an riili andastan di chuu mesij — di mesij bout Gad siikrit, an Gad siikrit a Krais Jiizas.

³ A im wan kyan mek unu andastan di chrezha dem we Gad did aid. Dem chrezha de wi mek unu waiz an kyan andastan, an riili nuo bout Gad. Kaaz a iina Krais Jiizas dem chrezha de de.

⁴ Mi tel unu dis so nobadi kyaahn kom fuul unu op tu ou dem taak, an mek unu go chrie. Wa dem se mait-a soun laik dem mek sens bot a pie lai.

⁵ Kaaz iivn duo mi mait no riili de wich paat unu de, mi spirit de de wid unu siem wie. An mi api fi si se aal a unu tugeda, a tan op chrang an a chos iina Krais Jiizas.

⁶ Sins unu tek Krais Jiizas fi unu Laad, unu fi liv laik sumadi we kluos tu im.

⁷ So, jos laik ou chrii ruut de diip iina grong, a so fi unu ruut fi beri diip dong iina im. An jos laik ou bildin tan op pan sopm, a im unu fi bil unu laif pan. Dat miin se unu fi dipen pan im muo an muo an du wa im tel unu fi du. Unu fi uol aan chrang an gwaan chos iina im jos laik ou wi did tiich unu fi du. An no figet fi gi Faada Gad tangks aal di taim.

⁸ Wach unuself! No mek nobadi chrap unu wid aagiment we onggl soun laik se dem mek sens, bot we no riili mek no sens at aal. Nuo! No mek dem tek unu ton no sliev. Dem aagiment de dis a taak bout ou piipl tingk bout sortn tingz, an bout wa faada tiich dem pikni, an we dem pikni de kom tiich fi dem pikni. Dem sitn de jos diil wid ou piipl luk pan di worl, an a jos taak bout powaful spirit we iina di worl. Dem no av notn fi du wid di chuu mesij bout Krais Jiizas.

⁹ Uu Jiizas bi no difrant fram uu Gad bi. Eniting we mek Gad Gad, de iina Jiizas tu, an aal wen im did de iina man faam im did tan siem laik Gad.

¹⁰ Unu fi wach out tu, kaaz Gad mek unu liv fi riil kaa unu kluos tu Krais Jiizas. Unu no niid notn els kaa evri spirit we av powa an a ruul, a Jiizas ruul uova dem.

¹¹ An kaa unu kluos tu Jiizas im sorkomsaiz unu. Unu no sorkomsaiz laik naamal, laik wen piipl kot we skin fi shuo se dem a Gad piipl. Nuo sa, im kot unu we fram sin. So sin naa no muo powa uova unu.

¹² An wen unu did get baptaiz, a laik se unu did ded an beri wid Krais Jiizas. An a laik se Gad mek unu liv agen tu wen Jiizas kom bak alaiv. Im du dat jos kaaz unu chos iina im powa. A im tek we Jiizas fram mongks ded piipl an mek im kom bak alaiv.

¹³ Wan taim unu did ded. Unu spirit did ded, an unu neehn kot we fram sin yet. So sin did stil av powa uova unu dem taim de. Bot Gad mek Krais Jiizas gi unu laif. Im paadn wi fi aal a wi sin dem.

¹⁴ Im tier op aal we di Laa se wi uo, an niel dem pan di kraas. Im niel it op an muuv it outa wi wie, wen im did ded pan di kraas. An siek-a wa apm tu im, wi no afi pie fi notn agen.

¹⁵ An so, im tek we di powa fram aal a di spirit dem we did a ruul an we did av powa, an shiem dem infronta evribadi. A biit im biit dem wen im ded pan di kraas.

¹⁶ So no mek nobadi joj non a unu an rait unu aaf siek-a wa unu nyam ar jringk. An no pie dem no main wen dem kom a tel unu bout no speshal uoli die we kom evri ier wen piipl worship Gad, ar bout di Nyuu Muun Festival ar wan Sabat die.

¹⁷ Aal a dem ruul de, dem no notn laik di sitn dem we a-go kom. Dem a onggl laik wan sheda fi dem sitn de; dem a no di riil ting. Wa riil, a Krais Jiizas.

¹⁸ No fala nobadi we waahn mek unu fiil bad kaaz dem se unu no worship Gad ou unu fi worship im. Dem gwaan an gwaan bout ou unu fi ombl unuself, an bout ou unu fi worship ienjel. No lisn dem. Dem dis a chat a galang bout wa dem kliem se dem si iina vijan. Bot dem a buos an dem no av notn fi buos bout siek-a dem worliyan main.

¹⁹ Jiizas Krais a di ed, an dem no diil wid di ed no muo. A di ed kanchuol di badi. An di uol badi dipen pan it. Di ed mek di jaint an di mosl dem kom tugeda, an a dem uol op di badi. A dat mek evri paat a di badi wok tugeda, an so di badi gruo ou Gad waahn it fi gruo.

²⁰ Sins Krais Jiizas ded pan di kraas, di spirit dem we ruul iina da worl ya naa no muo kanchuol uova unu. So sins unu did ded wid im, wa mek unu a liv laik se unu bilang tu da worl ya — a fala fi dem ruul an a du wa dem se?

²¹ “No uol op uol op dat!”, “No toch dis!” Ar “No ties dat!”

²² Aal a dem ruul ya a taak bout fuud an jringk we onggl yuuz wan taim an we no wot notn afta dat. An unu no fi fala dem ruul ya, kaaz a jos piipl mek dem op an tiich dem.

²³ Iivn duo dem ruul ya mait-a soun laik se dem mek gud sens, dem push piipl fi worship di wie ou di piipl dem we mek di ruul dem kom tugeda an se piipl fi worship; dem presha piipl fi gwaan laik se dem ombl; an dem push dem fi anggl dem badi bad — bout a sorv dem a sorv Gad wen dem du dat. Dem ruul ya mait-a luk laik se dem mek sens, bot dem no wot a ting. Dem no elp nobadi fi tan op chrang gens di rang sitn dem we di badi waahn, an fi elp dem kip we fram aal a dem sitn de.