Read Jamaican Patois Juud 4 Bible Online

Juud 4 - Jamaican Patois bible

Juud 4

¹ Az fi unu we uon sliev, unu fi chriit unu sliev rait an unu fi chriit dem fier. Kaaz unu nuo se unu av wan maasta iina evn tu.

² No tap prie. Unu fi wach out an get unu main redi fi akshan an gi Gad tangks wen unu a prie.

³ An beg unu du, prie fi wi tu. Prie se Gad wi klier di wie, so wi kyan pred di siikrit mesij bout Krais Jiizas — di mesij we nobadi neehn nuo bout. A siek-a da mesij ya dem chien mi op an av mi a prizn ya-so nou.

⁴ Prie se mi wi get fi mek di piipl dem nuo bout da mesij ya, an dat mi wi kyan tel dem it plien plien so dem kyan andastan. Kaaz a dat mi fi du.

⁵ Unu fi gwaan laik se unu av sens wen unu roun piipl we a no Krais Jiizas falara. No wies no taim, evri chaans unu get unu fi du dat.

⁶ Taak tu piipl nais, an mek dem waahn fi iina wa unu a se jos siek-a ou unu taak. Siizn op unu aagiment wid saalt, so dem waahn fi ier muo an muo bout wa unu a se. An unu fi nuo ou fi ansa evribadi tu.

⁷ Taikikos, a wi gud gud breda. Im eva a chos iina Gad. Wi lov im. Im a wok fi di Laad jos laik wi. Im wi tel unu aal a wa a apm tu mi.

⁸ Mi sen im tu unu so im kyan tel unu ou wi a du, an elp push unu fi gwaan an mek unu fiil api agen.

⁹ Im a kom wid Oniisimos, wi gud gud breda we wi lov tu, an we eva chos iina Gad. Im a wan a unu. Di tuu a dem wi mek unu nuo wa a gwaan uova ya-so.

¹⁰ Ieristaakos we de iina prizn wid mi, im sen oudi. Baanabas kozn, Maak, se oudi tu. Mi tel unu bout Maak aredi, so ef im kom tu unu, welkom im.

¹¹ An Jiizas, we piipl kaal Jostos, im sen oudi tu. Dem chrii man ya a di onggl Juu we a wok wid mi fi get piipl fi staat fala Gad an tek im fi dem king an mek im ruul uova dem. An bwai, dem elp an push mi uol iip.

¹² Epafras, we kom fram mongks unu, an we a wan a Krais Jiizas sorvant dem, im se oudi tu. Im eva a prie fi unu wid aal a im aat. Im prie se unu wi tan op chrang iina Gad an no tap chos iina im. Im prie se unu wi biliiv iina Gad so til nobadi kyaahn mek unu tap chos iina im. An im prie aad se unu wi nuo fi shuor wa Gad waahn unu fi du an fi biliiv.

¹³ Mi fi wan kyan tel unu ou aad im wok fi unu an fi di piipl dem we de a Leyodiisiya an Ierapolis.

¹⁴ Wi gud gud fren Luuk, di dakta — im an Diimas sen oudi tu.

¹⁵ Tel di breda an sista dem a Leyodiisiya se mi se oudi. Tel Nimfa oudi an Gad piipl dem we miit op an av choch a ar yaad.

¹⁶ Afta sumadi riid da leta ya tu unu, mek shuor se sumadi riid it fi di piipl dem a Leyodiisiya we biliiv iina Gad. An unu fi riid di leta we mi sen go gi dem.

¹⁷ Tel Aakipos dis fi mi, “Mek shuor se yu don di wok we di Laad gi yu fi du, kaaz a im ya’a wok fa.”

¹⁸ Dis a mi, Paal. Mi a rait an tel unu oudi wid mi uona an. Memba se mi chien op iina jiel. Mi prie se Gad wi lov unu iivn duo wi no dizorv it.