Read Jamaican Patois Ruoman 1 Bible Online

Ruoman 1 - Jamaican Patois bible

Ruoman 1

¹ Dis a Paal. A mi, Silvanos an Timoti a rait da leta ya. Wi a rait unu — aal a di piipl dem we de a Tesalonaika we biliiv iina Jiizas Krais, aal a uu a Gad an Krais Jiizas piipl dem: Mi prie se Gad wi aalwiez shuo unu im lov iivn duo wi no dizorv it an mek unu av piis iina unu aat.

² Wi eva a gi Gad tangks fi di uol a unu an a prie fi unu.

³ Wi no tap prie an gi Faada Gad tangks fi unu kaaz wi memba ou unu du som gud sitn kaaz unu biliiv iina Jiizas. Wi memba ou unu wok wel aad kaaz unu lov im; an wi tingk bout ou unu neva eva tap luk tu im, an so unu kuda pres aan no mata wa.

⁴ Breda an sista we Gad lov, wi nuo se Gad pik unu fi imself.

⁵ Kaaz wen wi did bring wi Gud Nyuuz kom, a neehn suo-so wod wi bring kom, bot wi bring di mesij wid powa we kom fram di Uoli Spirit. An unu si se wi biliiv wid aal a wi aat se di Gud Nyuuz a chuu. Unu si aal a wa wi did du wen wi did liv mongks unu? Wi did du aal a dem sitn de fi elp unu.

⁶ Unu staat fala wi — an staat fala di Laad tu. An duo unu sofa bad bad unu biliiv iina di Gud Nyuuz siem wie no mata di sofarieshan, kaaz di Uoli Spirit mek unu wel api.

⁷ An chuu dat, unu ton di kain-a piipl we aal a di piipl dem we biliiv iina Gad, we de iina Masiduoniya an Akaiya, kyan fala.

⁸ An siek-a wa unu a du, aal piipl we no de iina Masiduoniya an Akaiya ier di Gud Nyuuz. Piipl aal bout a ier ou unu chos iina Gad — so wi no afi bada se notn tu dem,

⁹ kaaz dem siem wan taak bout ou unu chriit wi gud wen wi did kom wich paat unu de. Dem taak bout ou unu ton we fram unu faalz gad dem, fi kom sorv Gad — di riil Gad we no ded an we gi laif.

¹⁰ An dem taak bout ou unu a wiet fi Jiizas, Gad Bwai Pikni, fi kom fram evn. Jiizas, we Gad mek kom bak alaiv. Jiizas, we siev wi fram Gad jojment we a kom.