Read Jamaican Patois Ruoman 3 Bible Online

Ruoman 3 - Jamaican Patois bible

Ruoman 3

¹ So, wen wi kudn bier it no langga, wi did api fi tan iina Atenz — wi wan.

² An wi sen Timoti tu unu. Timoti wi breda, we a wok wid Gad an a priich di Gud Nyuuz bout Krais Jiizas. Wi sen im fi bil unu op iina wa unu biliiv, an fi mek unu kyan uol aan,

³ so dem sofarieshan ya kyaahn shiek op non a unu. Kaaz unu siem wan nuo se a dat Gad plan fi wi.

⁴ Memba wen wi did de wich paat unu de, wi did waan unu lang bifuo it apm se wi did a go sofa? An si de — a dat apm! Unu don nuo dat aredi.

⁵ A so kom wen wi kudn bier it no langga mi did afi sen Timoti fi fain out ef unu a uol aan chrang an a gwaan chos iina Gad. Kaa mi did fried se Sietan did mek unu du rang an so aal di wok we wi did du mongks unu wudn wot notn.

⁶ Bot nou Timoti kom bak kom gi wi gud nyuuz bout ou unu stil biliiv iina Jiizas chrang chrang an ou unu lov Gad tu. Im tel wi se unu eva a tingk bout wi iina som gud wie, an ou unu lang fi si wi jos laik ou wi lang fi si unu.

⁷ So breda an sista, iivn duo wi de ya an a go chuu wi uona chobl an sofarieshan, wi fiil gud iina wi aat, kaaz unu tan op chrang iina Gad an a gwaan chos iina im siem wie.

⁸ An nou wi riili a liv sins wi nuo se unu a tan op chrang iina Gad.

⁹ Wi kyaahn tangk Gad inof fi unu, an fi ou api unu mek wi fiil wen wi go bifuo Gad.

¹⁰ Nait an die wi prie aad aad fi unu, a aks Gad fi mek wi si unu agen, so wi kyan gi unu wat-eva unu niid fi chos im iina evri wie, laik wa unu sopuoz fi a du.

¹¹ Nou wi prie se Faada Gad imself an wi Laad Jiizas wi mek wi kyan kom luk fi unu.

¹² An wi prie se di Laad Jiizas wi elp unu fi lov unu wan aneda muo an muo an ada piipl tu, so unu wi lov piipl di siem wie ou wi lov unu.

¹³ Da wie ya, unu aat wi get chrang so unu wi du di sitn dem we shuo se unu bilang tu wi Faada Gad. An so im naa go kyan bliem unu fi notn wen unu tan op infronta im wen wi Laad Jiizas kom bak wid aal a im piipl dem.