Read Jamaican Patois Ruoman 5 Bible Online

Ruoman 5 - Jamaican Patois bible

Ruoman 5

¹ Breda an sista, mi no afi rait unu bout di taim an di die wen dem sitn de a-go apm.

² Kaaz unu don nuo se di die wen di Laad a kom bak a-go kom iin sodn, jos laik wan tiif iina di nait.

³ Wen piipl staat fi se wi av piis an evriting sief, braps — a dat de taim tingz a-go ton opsaid dong. Sofarieshan a-go lik dem so faas laik wen pien staat riich di uman we bout fi av biebi. An dem naa go kyan ron we fram it.

⁴ Bot, breda an sista, unu nuo tu moch fi di die wen di Laad kom, kom fraitn unu laik tiif iina nait.

⁵ Kaaz di uol a unu bilang tu di lait an unu bilang tu di die. Wi no av notn fi du wid nait an daaknis.

⁶ So mek wi no sliip laik dem we a liv iina di daak. Bot mek wi kip wi yai waid uopm an wi ed skruu aan gud.

⁷ Kaaz aal uu sliip — sliip a nait taim. An dem de we jongk aaf demself — a nait taim dem get jongk.

⁸ Bot wi we bilang tu di die, wi fi tingk chriet an chos iina Gad an lov im. Da wie de wi a protek wiself jos laik di suoja dem wen dem wier di metal ves. An jos laik ou di suoja dem put aan di elmit fi protek dem ed, a siem so wi fi protek wiself an luk faawod fi Gad siev wi, an biliiv iina wi aat se im a-go du it.

⁹ Kaaz Gad neehn put wi ya, so im kuda mek wi sofa, bot im du wa im du so di Laad Jiizas Krais kuda siev wi.

¹⁰ Jiizas ded fi wi, so weda wi alaiv ar wi ded di uol a wi kyan go liv wid im.

¹¹ So unu fi taak di sitn dem fi elp unu wan aneda get chrang, laik wa unu a du nou, an gwaan bil op unu wan aneda.

¹² Breda an sista, nou wi a beg unu fi rispek di piipl dem we a wok aad mongks unu, an we a liid an tiich unu.

¹³ Unu fi gi dem nof rispek an shuo dem ou unu tingk dem impuotant. Unu fi lov dem siek-a aal we dem du. Liv iina piis mongks unu wan aneda.

¹⁴ An breda an sista, wi beg unu fi waan di aiglaz dem we no waahn wok; elp di wan dem we friedi-friedi fi get briev, an elp di wan dem we wiik iina eni kain-a wie tu. An beg unu du, tek unu taim wid evribadi.

¹⁵ Mek shuor se nobadi no chriit sumadi bad kaaz dat de sumadi did chriit dem bad, bot unu fi aalwiez chrai fi diil wid unu wan aneda gud, an diil wid ada piipl gud tu.

¹⁶ Unu fi tan api aal di taim.

¹⁷ No tap prie.

¹⁸ No mata wa apm gi Gad nof tangks kaaz a dat Gad waahn unu fi du nou dat unu an Jiizas Krais kluos.

¹⁹ No uol dong ar shot op di Uoli Spirit.

²⁰ No se di mesij we piipl kliem se dem get fram Gad a fuulinish,

²¹ bot tes evriting. Eng aan pan wa gud,

²² an kip we fram aal kain-a sitn we bad.

²³ Wi prie se Gad imself we gi piipl piis, wi put unu wan said fi liv fi im an sorv im wid aal a unu aat, an wi mek unu tan jos laik im iina evri wie. An wi prie se im wi no mek no paat a unu — spirit, suol ar badi, kyan get bliem fi notn wen wi Laad Jiizas Krais kom bak.

²⁴ Di wan we kaal unu, im aalwiez du wa im se im a-go du, an im wi du dis tu.

²⁵ Breda an sista, prie fi wi.

²⁶ Wen unu kom kom worship, kis di breda an sista dem an tel dem oudi.

²⁷ Mi a tel unu iina di Laad niem se unu fi riid da leta ya tu aal a di breda an sista dem.

²⁸ Mi prie se wi Laad Jiizas Krais wi shuo unu lov iivn duo wi no dizorv it.