Read Jamaican Patois 1 Korintiyan 1 Bible Online

1 Korintiyan 1 - Jamaican Patois bible

1 Korintiyan 1

¹ Dis a Paal. A mi, Silvanos an Timoti a rait da leta ya. Wi a rait di uol a unu we de a Tesalonaika we biliiv iina Jiizas Krais, an we bilang tu Gad an Krais Jiizas.

² Wi prie se wi Faada Gad an di Laad Jiizas Krais wi aalwiez shuo unu lov, iivn duo wi no dizorv it, an gi unu piis iina unu aat.

³ Breda an sista, wi fi gi Gad tangks fi unu aal di wail — an dat a di rait ting tu. Wi fi gi tangks, kaaz unu a chos iina Gad muo an muo an a lov unu wan aneda muo an muo tu.

⁴ Siek-a dat, wi fi wan afi buos bout unu iina aal a Gad choch dem, kaaz unu eng aan no mata wa. An unu a chos iina Gad iivn duo unu a sofa an a go chuu nof chraiyal an chibilieshan.

⁵ Aal a dem sitn ya shuo plien plien se Gad joj piipl ou dem fi get joj, kaaz im a get unu redi fi im kindom we unu a sofa fa.

⁶ An sins Gad fier, di piipl dem we kaaz unu fi sofa, im a-go mek dem sofa tu.

⁷ An unu we a sofa, im a-go mek di sofarieshan tap wen di Laad Jiizas kom fram evn an shuo imself. Da taim de aal a wi a-go get fi res, wi naa go sofa no muo. Jiizas a-go kom fram evn wid im powaful ienjel dem,

⁸ wid wan faiya we a bliez. Im a-go bring dong jojment pan aal a uu no nuo Gad an dem de we no fala di Gud Nyuuz bout wi Laad Jiizas.

⁹ Dem a-go get ponish. Dem a-go sofa fi eva an eva, kaaz dem naa go kyan de we di Laad de, an dem naa go eva get fi si ou di Laad big an powaful.

¹⁰ Di Laad Jiizas a-go du aal a dem sopm ya wen im kom bak pan jojment die fi get priez siek-a di wok we im du iina fi im piipl dem. Unu a-go de de a priez im tu. Kaaz unu did biliiv di sitn dem we wi nuo fi wiself an did kom tel unu.

¹¹ A dat mek wi kip aan a prie fi unu. Wi prie se Gad wi mek unu gud inof fi di kain-a laif we im kaal unu fa. An wi prie se Gad wi elp unu so dat wid fi im powa unu wi du aal a di gud sitn dem we unu waahn fi du, an unu wi du dem tu kaaz unu biliiv iina im.

¹² Da wie de, di Laad Jiizas Krais wi get priez an unu kyan get big op tu. Dis kyan apm kaaz fi wi Gad an wi Laad Jiizas Krais lov wi iivn duo wi no dizorv it.