Read Jamaican Patois 1 Korintiyan 3 Bible Online

1 Korintiyan 3 - Jamaican Patois bible

1 Korintiyan 3

¹ Breda an sista ier wa wi a se bifuo wi don ya-so — wi a beg unu fi prie fi wi. Prie se Gad mesij wi pred faas faas an piipl wi ana it no mata wich paat it go, jos laik wa did apm wen it kom tu unu.

² An prie se Gad wi siev wi fram di wikid an torbl piipl dem, kaaz a no evribadi biliiv iina di Laad.

³ Bot, memba se Gad wi aalwiez du wa im se im a-go du. Im a-go mek unu aat chrang, an im wi protek unu fram di wikid wan.

⁴ Di Laad mek wi kyan chos se unu a du aal a wa wi tel unu fi du. An im mek wi kyan chos se unu wi gwaan du dat.

⁵ Nou, mi prie se di Laad wi mek unu andastan umoch im lov unu an elp unu fi eng aan an no gi op siem laik wa Krais Jiizas did du.

⁶ Nou, breda an sista, iina wi Laad Jiizas Krais niem, wi a tel unu, kip we fram enibadi we se dem biliiv bot no waahn wok, an we naa waak laik ou wi tel unu fi waak.

⁷ Kaaz unu siem wan don nuo aredi se unu fi fala wi, an wi neehn aigl an liezi wen wi did de mongks unu.

⁸ Wi neehn tek nobadi fuud an nyam it ef wi neehn pie fa. Nuo, wi wok aad, die an nait so wi no afi presha an bordn dong nobadi.

⁹ A no kaaz wi no av di rait fi du dat mek wi neehn du it yu no, bot a kaaz wi waahn mek shuor se unu si ou unu fi liv, an liv da wie de.

¹⁰ Kaaz aal wen wi did de mongks unu, wi did gi unu da ruul ya, “Ef sumadi no waahn wok no mek dem nyam.”

¹¹ Wi tel unu dat kaaz wi ier bout som a unu we a waak roun aigl an naa wok non at aal. No onggl dat, bot dem aal a faas wid we ada piipl a du tu.

¹² Nou, iina wi Laad Jiizas Krais niem, wi did a tel dem piipl de an wi push dem aad fi go sekl dong an fain wok so dem kyan bai dem uona fuud an nyam.

¹³ Bot breda an sista, unu no fi get taiyad fi du di rait sitn dem.

¹⁴ An ef sumadi no fala wa wi se iina da leta ya maak dem fies, an no diil wid dem so dem fiil shiem.

¹⁵ Bot no chriit dem laik se dem a unu enimi, nuo man. Bot waan dem laik ou unu wuda waan unu uona breda an sista we biliiv iina Jiizas.

¹⁶ Nou mi prie se di Laad imself we gi piis, wi gi unu piis iina unu aat fi eva, no mata wa a gwaan. An mi prie se im wi tan wid di uol a unu.

¹⁷ Dis a mi, Paal. Mi a rait dem wod ya wid mi uona an fi shuo unu se da leta ya a fram mi. A so mi rait aal a mi leta dem.

¹⁸ Mi prie se wi Laad Jiizas Krais wi shuo unu lov iivn duo wi no dizorv it.