Read Jamaican Patois 2 Korintiyan 2 Bible Online

2 Korintiyan 2 - Jamaican Patois bible

2 Korintiyan 2

¹ So fos ting fos, mi a beg yu an di piipl dem fi prie fi evribadi. Beg Gad fi kom chuu fi dem. Gi Gad tangks fi dem an aks im fi gi dem aal we dem niid.

² Prie fi enibadi we ron wan konchri an fi piipl we iina powa. Prie fi dem so wi kyan liv iina piis an kwaiyat, biyiev laik ou wi fi biyiev an worship Gad.

³ A wan gud sopm dis an a so di Gad we siev wi waahn wi fi prie fi evribadi.

⁴ Im waahn evribadi fi get siev an fi nuo di chuut.

⁵ Kaaz a onggl wan Gad de bout, an Jiizas Krais a di migl man, di onggl wan we kyan bring Gad an piipl tugeda.

⁶ Jiizas gi op im laif so dat im kuda bai bak evribadi an frii dem fram sin. Wen Jiizas ded, im shuo se Gad did av wan plan fi siev piipl bot iina fi im uona taim.

⁷ A so mek Gad sen mi fi bi im apasl, so mi kuda priich di chuut. Im sen mi fi tiich aal a di piipl dem we a no Juu an tel dem se Gad wi siev dem ef dem biliiv iina Jiizas. Mi naa lai, mi a tel yu di chuut.

⁸ So mi aks dat wen unu kom tugeda fi worship Gad, dat aal a di man dem wi lif op dem an, an prie. Dem man ya laif mos kliin an wen dem a prie dem no fi av op nobadi iina dem aat ar a kwaril wid dem wan aneda.

⁹ Mi waahn di uman dem fi jres prapa. Dem no fi jres op demself iina big fansi ier stail, guol, porl ar dier kluoz.

¹⁰ Wa dem fi du a jres op demself wid di gud sitn dem we dem du fi ada piipl. A dat uman we a fala Gad fi du.

¹¹ Wen di man dem a tiich, di uman dem fi tan todi, kwaiyat demself an lorn.

¹² Uman mos kwaiyat demself, mi no lou dem fi tiich iina choch ar fi ruul uova man.

¹³ Kaaz Adam did mek bifuo Iiv.

¹⁴ An a no Adam di siniek did chrik, a Iiv an a shi du wa Gad se dem neva fi du.

¹⁵ Bot Gad gweehn siev di uman chuu ar pikni. Im gweehn siev di uman dem ef dem gwaan biliiv iina im, shuo lov an liv ou im waahn dem fi liv.